Boy makes trendy tshirt from sack: सध्या तरुणाई नोकरीपेक्षा नवनवीन बिझनेस आयडिया, पैसे कमावण्याच्या वेगवेगळ्या आयडिया शोधत असते. अनेकजण टाकाऊ वस्तूंचा वापर करुन पैसे कमावण्याचा मार्ग शोधत असतात. सध्या अशीच एक भन्नाट बिझनेस आयडिया नेटकऱ्यांचे लक्ष वेधत आहे. दिल्लीतील एका तरुणाने जुन्या गोण्यांचा (बोरा) वापर करून तयार केलेला ‘जुगाड' टी-शर्ट सध्या सोशल मीडियावर चर्चेचा विषय बनला आहे.
बारदाण्यांपासून टी- शर्ट अन् पैसा..
आजच्या फॅशनच्या युगात ब्रँडेड कपड्यांवर हजारो रुपये खर्च केले जातात. अशातच या तरुणाने जुना गोण्यांचा वापर करून एक नवीन ट्रेंड सेट केला आहे. व्हिडिओमध्ये दिसतो की, हा तरुण जुन्या गोण्या घेऊन एका शिंप्याकडे जातो. त्या गोणीपासून टी-शर्ट कापून तयार केला जातो. महत्त्वाचे म्हणजे, हा टी-शर्ट घालताना अस्वस्थता वाटू नये म्हणून आतून आरामदायक अस्तरही लावले आहे. ही प्रक्रिया पूर्ण झाल्यावर तो तरुण आपला माल घेऊन थेट दिल्लीतील सर्वात पॉश आणि उच्चभ्रू समजल्या जाणाऱ्या 'कनॉट प्लेस' मार्केटमध्ये पोहोचतो.
सुरुवातीला त्याला पाहून लोक हसले, चेष्टाही केली, कारण गोणीपासून बनवलेला टी-शर्ट विकायला कोणीतरी प्रतिष्ठित ठिकाणी येईल, हे कोणाच्या कल्पनेतही नव्हते. पण या तरुणाचा आत्मविश्वास दांडगा होता. त्याने न डगमगता लोकांना हा टी-शर्ट दाखवला. आणि या ‘रीसायकलिंग' कल्पनेची आणि डिझाईनची लोकांना भुरळ पडली. केवळ भारतीयच नव्हे, तर अनेक परदेशी पर्यटकही ही अनोखी कलाकृती पाहून प्रभावित झाले आणि त्यांनी आवर्जून या टी-शर्टची खरेदी केली.
भन्नाट बिझनेस आयडियाचे कौतुक
या तरुणाने सांगितले की, एका टी-शर्टच्या निर्मितीसाठी त्याला साधारण ३५० इतका खर्च आला, पण तो टी-शर्ट त्याने तब्बल ३,७०० पर्यंत विकला! म्हणजेच, सामान्य कचऱ्यातून त्याने १० पटीने अधिक नफा कमावला. हा नफा फक्त पैशांचा नाही, तर समाजात सकारात्मक बदल घडवण्याच्या त्याच्या दृष्टिकोनाचा आहे. एका बाजूला पर्यावरणाचा विचार, तर दुसरीकडे असामान्य व्यवसाय कल्पना.
सोशल मीडियावर लोक या तरुणाच्या मेहनतीचे आणि आत्मविश्वासाचे कौतुक करत आहेत, आणि त्याला 'बिझनेस आयडियाजचा पॉवरहाऊस' म्हणत आहेत. यातून हे स्पष्ट होते की, यशस्वी होण्यासाठी केवळ पैशाची नव्हे, तर असामान्य विचारांची गरज आहे. हा जुगाडु टी-शर्ट नेटकऱ्यांनाही चांगलाच आवडला आहे.
VIDEO: रात्रीचे 11.45 वाजता बाईकची चेन तुटली, अंधारात 'ती' अन् रॅपिडो रायडर, पुढे जे घडलं...
