लाखो वारकऱ्यांचे श्रद्धास्थान आणि महाराष्ट्राचे सांस्कृतिक वैभव असलेल्या आषाढी वारी सोहळ्याला पुणे शहर पोलिसांनी यंदा अत्यंत आधुनिक, तंत्रज्ञानाची जोड दिली आहे. संत ज्ञानेश्वर महाराज आणि संत तुकाराम महाराज यांच्या पालखी सोहळ्यात सहभागी होणाऱ्या लाखो भाविक, स्वयंसेवक आणि नागरिकांच्या सुरक्षेसाठी तसेच सोयीसाठी 'स्मार्ट' देखरेख प्रणाली कार्यान्वित करण्यात आली आहे. 24 तास सातत्याने चालणारे सीसीटीव्ही नेटवर्क, एआय-संचालित वाहतूक व्यवस्थापन आणि प्रगत सार्वजनिक सुरक्षा यंत्रणांच्या एकात्मिकरणामुळे यंदाची वारी अधिक सुरक्षित आणि सुलभ होणार आहे.
डिजिटल वारी: लाईव्ह जीपीएस ट्रॅकिंग आणि अपडेट्स
वारीच्या मार्गावर भाविकांना कोणत्याही अडचणीचा सामना करावा लागू नये म्हणून विशेष डिजिटल प्लॅटफॉर्म तयार करण्यात आला आहे. याद्वारे नागरिकांना खालील माहिती घरबसल्या आणि मोबाईलवर एका क्लिकवर मिळणार आहे.
- लाईव्ह जीपीएस लोकेशन्स: दोन्ही संतांच्या पालख्या नेमक्या कुठे आहेत, याचे रिअल-टाइम (थेट) लोकेशन पाहता येईल.
- मार्ग आणि मुक्कामाची ठिकाणे: पालखीचा मार्ग, पुढील विसावा आणि रात्रीच्या मुक्कामाची अचूक माहिती मिळेल.
- अंदाजित वेळ : पालखी ठराविक ठिकाणी किती वाजता पोहोचेल, याचा अचूक अंदाज भाविकांना घेता येईल.
पुणे पालखी ट्रॅक करण्यासाठी या लिंकवर क्लिक करा...
संत ज्ञानेश्वर महाराज पालखी सोहळा
- 8 जुलैः आळंदीहून पंढरपूरकडे प्रस्थान.
- 9 आणि 10 जुलैः पुणे शहर पुणे शहरात आगमन आणि मुक्काम.
- 11 आणि 12 जुलैः सासवड पालखीचे सासवडकडे प्रस्थान, सासवडमध्ये भक्तीपर कार्यक्रम आणि मुक्काम.
- 13 जुलैः जेजुरी - आध्यात्मिक प्रवचन आणि संध्याकाळचे भजन.
- 14 जुलैः वाल्हे - पारंपरिक अर्पण आणि सामुदायिक संवाद.
- 15 जुलैः लोणंद - भक्तीगीत गायन आणि विश्रांतीसाठी मुख्य विराम.
- 16 जुलैः तरडगाव - चांदोबाचा लिंब येथे पहिले रिंगण आणि तरडगाव येथे मुक्काम.
- 17 जुलैः फलटण - आध्यात्मिक उपक्रम आणि व्याख्याने.
- 18 जुलैः बरड - विश्रांती आणि आध्यात्मिक उपक्रम.
- 19 जुलैः नातेपुते - संत ज्ञानेश्वरांच्या अभंगांचा आणि ओव्यांचा जप.
- 20 जुलैः माळशिरस - पुरंदवडे येथे पहिले गोल रिंगण घेऊन पालखीचे माळशिरस येथे मुक्काम.
- 20 जुलैः खुडूस फाटा खुडूस फाटा येथे दुसरे गोल रिंगण करून वेळापूरळा मुक्काम.
- 21 जुलै: वेळापूर - ठाकूरबुवाची समाधी येथे तिसरे गोल रिंगण.
- 22 जुलैः भंडीशेगाव - दुसरे उभे रिंगण.
- 23 जुलैः वाखरी - वाखरी येथे पादुका आरती आणि तिसरे उभे रिंगण
- 24 जुलैः श्री क्षेत्र पंढपूरमध्ये आगमन वाखारी येथे शेवटचा मुक्काम मोठा मुक्काम करून पालखीचे पंढरपूर मध्ये आगमन.
- 25 जुलैः नगर प्रदक्षिणा - उत्सव आणि दर्शन.
संत तुकाराम महाराज पालखी सोहळा
- 7 जुलैः देहू - देहूहून पंढरपूरकडे प्रस्थान.
- 8 जुलैः आकुर्डी - पिंपरी चिंचवड परिसरात पालखीचे स्वागत.
- 9 आणि 10 जुलैः पुणे शहर सांस्कृतिक आणि आध्यात्मिक कार्यक्रमांसह भव्य स्वागत समारंभ.
- 11 जुलैः लोणी काळभोर भक्त्ती संमेलन कार्यक्रम.
- 12 जुलैः यवत - अनेक वारकऱ्यांच्या आणि दिंड्यांचा सहभाग.
- 13 जुलैः वरवंड - पारंपारिक प्रार्थना आणि अल्पकालीन विश्राम.
- 14 जुलैः उंडवडी गवळ्याची आध्यात्मिक व्याख्याने आणि मुक्काम.
- 15 जुलैः बारामती - स्थानिकांकडून भक्तिभावासह स्वागत.
- 16 जुलैः सणसर - आध्यात्मिक प्रवचने, विश्रांती आणि सांस्कृतिक कार्यक्रम.
- 17 जुलैः निमगाव केतकी संत तुकारामांच्या अभंगांचा आणि कीर्तनांचा जप.
- 18 जुलैः इंदापूर - विश्रांती मुक्काम
- 19 जुलैः सराटी - भक्तीगीत गायन आणि व्याख्याने.
- 20 जुलैः आकालुज - आकालुज येथे गोल रिंगण.
- 21 जुलैः बोरगाव भेगाव माळीनगर येथे उभे रिंगण करून बोरगाव इथे मुक्काम.
- 22 जुलैः पिराची कुरोली स्थानिकांकडून भक्तिभावासह स्वागत.
- 23 जुलैः वाखरी - पंढरपूरला पोहोचण्यापूर्वी शेवटचा मोठा मुक्काम.
- 24 जुलैः श्री क्षेत्र पंढपूरमध्ये आगमन वाखारी येथे शेवटचा मुक्काम मोठा मुक्काम करून पालखीचे पंढरपूर मध्ये आगमन.
- 25 जुलैः नगर प्रदक्षिणा - उत्सव आणि दर्शन.
रथावर सीसीटीव्ही अन् आकाशातून ड्रोनची नजर
यंदाच्या पालखी सोहळ्याच्या सुरक्षेसाठी पुणे पोलिसांनी मल्टी-टीअर सुरक्षा कवच तयार केले आहे.
स्मार्ट पाळत: मुख्य पालखी रथावर विशेष सीसीटीव्ही लावण्यात आले असून, संपूर्ण मार्गावर अतिरिक्त 226 सीसीटीव्ही कॅमेरे बसवण्यात आले आहेत.
फेस रेकग्निशन सिस्टम: गर्दीमध्ये गुन्हेगारांवर लक्ष ठेवण्यासाठी चेहेरा ओळखणारे प्रगत तंत्रज्ञान आणि व्हिडिओ ॲनालिटिक्सचा वापर केला जात आहे.
ड्रोन आणि अँटी-ड्रोन यंत्रणा: आकाशातून ड्रोनद्वारे संपूर्ण परिसरावर लक्ष ठेवले जात आहे, तसेच सुरक्षेचा उपाय म्हणून 'अँटी-ड्रोन' यंत्रणाही तैनात आहे.
सुरक्षा जवान: वरिष्ठ अधिकाऱ्यांच्या मार्गदर्शनाखाली सुमारे 7000 पोलीस कर्मचारी, एसआरपीएफ कंपन्या, होमगार्ड, क्यूआरटी पथके आणि चोरी रोखण्यासाठी 20 विशेष 'अँटी-थेफ्ट' टीम्स तैनात करण्यात आल्या आहेत.
'AI' आधारित वाहतूक नियंत्रण आणि विशेष व्यवस्था
पालख्या पुण्यात दाखल झाल्यानंतर शहराची वाहतूक कोंडी होऊ नये, यासाठी विशेष कृती आराखडा तयार करण्यात आला आहे. वाहतुकीवर लक्ष ठेवण्यासाठी आर्टिफिशियल इंटेलिजन्स (AI) आणि लाईव्ह जीपीएस रूट ट्रॅकिंगचा वापर केला जात आहे. 300 वाहतूक वॉर्डन आणि 1428 स्वयंसेवक पोलिसांच्या मदतीला रस्त्यावर असतील. तात्काळ मदतीसाठी अवजड क्रेन तैनात ठेवण्यात आल्या आहेत. विश्रांतवाडी उड्डाणपूल आणि अत्यंत खडतर समजल्या जाणाऱ्या 'दिवे घाटात' वारकऱ्यांच्या सुरक्षिततेसाठी आणि सोयीसाठी विशेष बॅरिकेडिंग आणि संरक्षक उपाययोजना करण्यात आल्या आहेत.
तंत्रज्ञानाच्या या जोडणीमुळे लाखो वैष्णवांचा हा मेळा अधिक शिस्तबद्ध आणि सुरक्षित वातावरणात पार पडेल, असा विश्वास पुणे पोलीस प्रशासनाने व्यक्त केला आहे.
