ऋतिक गणकवार, प्रतिनिधी
Mumbai News : संजय गांधी राष्ट्रीय उद्यानाच्या हद्दीत एक धक्कादायक प्रकार समोर आला आहे. शनिवारी, १४ मार्च २०२६ रोजी सकाळच्या वेळेत संजय गांधी राष्ट्रीय उद्यानाच्या हद्दीत आणि मालाड क्षेत्रांतर्गत येणाऱ्या भागात, विहिरीवरून पाणी आणण्यासाठी गेलेले चंदू खरपडे हे बिबट्याच्या हल्ल्यात जखमी झाले. त्यांच्या आर्त किंकाळ्या ऐकून, त्यांचा मुलगा उमेश चंदू खरपडे (वय २४) हा त्यांच्या मदतीला धावून गेला. या घटनेत चंदू खरपडे यांच्या डोक्याला (कानाच्या जवळ) दुखापत झाली, तर त्यांचा मुलगा उमेश खरपडे याच्या बोटाला किरकोळ दुखापत झाली. जखमी झालेल्या या दोघांनाही उपचारासाठी कांदिवली येथील शताब्दी रुग्णालयात दाखल करण्यात आलं होतं. तेथे किरकोळ वैद्यकीय उपचार घेतल्यानंतर, त्या दोघांनाही रुग्णालयातून डिस्चार्ज देण्यात आलं आहे.
एकटं फिरू नका...
या घटनेच्या पार्श्वभूमीवर, संजय गांधी राष्ट्रीय उद्यानाच्या कार्यालयाने सर्वसामान्य जनतेला अलर्ट राहण्याचं आवाहन केलं आहे. उद्यानाच्या परिसरात बिबट्यांचा वावर असल्याने, नागरिकांनी उद्यानाच्या अंतर्गत भागात एकटे प्रवेश करताना अत्यंत सावधगिरी बाळगावी किंवा अशा भागात जाणं टाळावे, असं आवाहन करण्यात आलं आहे. शिवाय, उद्यानाच्या सीमेला लागून असलेल्या मानवी वसाहतींमधील रहिवाशांनी आपल्याजवळील कचऱ्याची योग्य विल्हेवाट लावण्याची खात्री करावी असंही सांगण्यात आलं आहे. ज्यामुळे बिबट्या मानवी वस्तीला लागून असलेल्या भागात भरकटत येण्याची शक्यता कमी करता येईल.
एका तासात बिबट्या जेरबंद...
या घटनेनंतर, तो बिबट्या एका खड्ड्यात (चरमध्ये) लपून बसला. आर.एफ.ओ. (RFO) निकेत शिंदे यांनी, SGNP च्या पथकासह आणि 'WWA' या स्वयंसेवी संस्थेच्या मदतीने, एक कृती आराखडा तयार केला; आणि SGNP च्या अधिकाऱ्यांनी एका तासापेक्षाही कमी कालावधीत त्या बिबट्याला यशस्वीरित्या 'डार्ट' (भूल देणारे इंजेक्शन) मारून जेरबंद केले. त्यानंतर त्या बिबट्याला उद्यानातील बचाव केंद्रात हलवण्यात आले. या घटनेत चंदू खरपडे यांच्या डोक्याला दुखापत झाली, तर त्यांच्या मुलाच्या हाताला मार लागला.
