योगेश शिरसाट, प्रतिनिधी
Akola Crime News : तहसील कार्यालयात आज रेशन कार्डातील नाव कमी करण्याच्या कारणावरून मोठा वाद निर्माण झाल्याची घटना समोर आली आहे. संबंधित व्यक्ती आपल्या जवळच्या नातेवाईकाच्या कुटुंबातील एका सदस्याचे नाव रेशन कार्डातून वगळण्यासाठी कार्यालयात आला होता. मात्र नियमानुसार ज्याचे नाव कमी करायचे आहे त्या व्यक्तीची प्रत्यक्ष उपस्थिती व आवश्यक कागदपत्रांची पूर्तता बंधनकारक असल्याचे महसूल कर्मचाऱ्यांनी स्पष्ट केले. कार्यालयीन प्रक्रियेनुसार अर्ज, ओळखपत्रे आणि संबंधित व्यक्तीची सही आवश्यक असते. ही प्रक्रिया पूर्ण न झाल्यामुळे कर्मचाऱ्यांनी तात्काळ नाव कमी करण्यास नकार दिला. याच कारणावरून संबंधित व्यक्ती आणि महसूल अधिकारी यांच्यात शाब्दिक वादाला सुरुवात झाली.
शाब्दिक वादातून धक्काबुक्की; हल्ल्याचा आरोप
यादरम्यान, प्रत्यक्षदर्शींनी दिलेल्या माहितीनुसार, वाद वाढत जाऊन वातावरण तणावपूर्ण झाले. दोन्ही बाजूंमध्ये तीव्र शब्दांची देवाणघेवाण झाली आणि त्यानंतर धक्काबुक्की झाली, असा आरोप आहे. संबंधित व्यक्तीने आपल्यावर हल्ला करत जीवे मारण्याची धमकी दिल्याचा गंभीर आरोप महसूल अधिकाऱ्यांनी केला आहे. घटनेनंतर तहसील कार्यालयात काही काळ गोंधळाचे वातावरण निर्माण झाले होते. इतर कर्मचारी आणि नागरिकांनी मध्यस्थी करत परिस्थिती नियंत्रणात आणली. या घटनेमुळे कार्यालयीन सुरक्षेचा प्रश्नही ऐरणीवर आला आहे.
नक्की वाचा >> KDMC चा दणका..टिटवाळ्यातील जी.आर.पाटील शाळा अन् कॉलेजवर मोठी कारवाई, विद्यार्थी परीक्षेला मुकणार
सिटी कोतवाली पोलिसांत तक्रार; तपास सुरू
घटनेनंतर महसूल कर्मचाऱ्यांनी संबंधित व्यक्तीविरोधात पोलिस ठाण्यात तक्रार दाखल केली आहे. सिटी कोतवाली पोलिसांनी पुरवठा निरीक्षक विश्वजीत लिंगायत यांच्या शासकीय रुग्णालयातील वैद्यकीय अहवालावरून गुन्हा दाखल करण्याची प्रक्रिया सुरु केली आहे. त्यानुसार पुढील तपास सुरू केला असून सीसीटीव्ही फुटेज आणि प्रत्यक्षदर्शींची माहिती तपासली जात आहे.
नक्की वाचा >> Kalyan News : कल्याणमध्ये शेतकऱ्यांचे भूखंड लाटले? कृषी उत्पन्न बाजार समितीच्या आवारातील बांधकामांना स्थगिती
पोलीस प्रशासनाकडून संपूर्ण घटनेचा तपशील गोळा करण्यात येत असून दोषी आढळल्यास कठोर कारवाई केली जाईल, अशी माहिती सूत्रांकडून मिळत आहे. अधिकृत तपासाअंती संपूर्ण चित्र स्पष्ट होणार आहे. दरम्यान, तहसील कार्यालयासारख्या शासकीय ठिकाणी घडलेल्या या प्रकारामुळे नागरिक आणि कर्मचाऱ्यांच्या सुरक्षेचा मुद्दा पुन्हा एकदा चर्चेत आला आहे.
