Ketan Agrawal Case: पुण्यातील रिअल इस्टेट व्यावसायिक केतन अग्रवालच्या हत्या प्रकरणाचा तपास जसजसा पुढे सरकत आहे, तसतसे धक्कादायक खुलासे होत आहेत. तांत्रिक तपासातील माहितीनुसार, आरोपींनी केतनच्या हत्येचे वेगवेगळे मार्ग शोधण्यासाठी गुगलची मदत घेतली होती. एवढेच नाही तर आरोपींनी 14 जून रोजीही केतनची हत्या करण्याचा पहिला प्रयत्न केला होता, जो अपयशी ठरला होता.
सिया आणि चेतन गुगलवर शोधायचे हत्येचे मार्ग
केतन अग्रवाल हत्याकांडात तपास करणाऱ्या पुणे ग्रामीण पोलिसांच्या हाती धक्कादायक माहिती लागली आहेत. आरोपींच्या गुगल सर्च हिस्ट्रीवरून समजले आहे की, हत्या कोणकोणत्या मार्गांनी केली जाऊ शकते, या गोष्टीशी संबंधित अनेक व्हिडीओ त्यांनी पाहिले होते. यासोबतच पोलिसांच्या मते, आरोपी सिया गोयल आणि चेतन चौधरीने केतनची हत्या घडवून आणण्यासाठी लोहगड किल्ल्यावर जाऊन रीतसर हत्येची तालीम (रिहर्सल) केली होती.
स्वतःला वाचवण्यासाठी आरोपींनी हुशारीने योजना आखली होती. पोलिसांच्या दाव्यानुसार, पकडले गेल्यास चौकशीदरम्यान काय आणि कसे उत्तर द्यायचे, याचा आरोपींनी आधीच सराव केला होता. याशिवाय पोलिसांचा संशय टाळण्यासाठी त्यांनी स्वतःचा वेश बदलण्याचीही योजना आखली होती. सिया गोयलने पोलिसांना कथितरीत्या सांगितले की, तिला अग्रवालसोबत लग्न करायचे नव्हते आणि लग्न मोडल्यास कुटुंबाची बदनामी होईल असे तिला वाटले म्हणूनच तिने चौधरीसोबत मिळून अग्रवालच्या हत्येचा कट रचला.
(नक्की वाचा : Pune News: "केतनच्या हत्येच्या दिवशी काही लोक लोहगडावर..", या प्रकरणाचा फासा पलटणार? विशाल अग्रवाल म्हणाले..)
डिजिटल पुरावे नष्ट करण्याचा प्रयत्न
केतनची हत्या केल्यानंतर आरोपींनी चॅट्स आणि इतर डिजिटल पुरावे देखील पूर्णपणे नष्ट करण्याचा प्रयत्न केला. सध्या पुणे ग्रामीण पोलीस डिजिटल आणि तांत्रिक पुराव्यांना आधार बनवून प्रकरणाच्या पुढील तपास करत आहेत.
केतन अग्रवाल हत्याकांडात क्राइम सीन रीक्रिएशन
आरोपी सिया गोयल आणि चेतन चौधरी यांना घेऊन पोलीस लोहगडावर पोहोचले होते. या दोघांनी केतन अग्रवालला डोंगरावरून खाली कसे ढकलले? मी जेव्हा खाली बसेन, तेव्हा केतनला धक्का दे, असा इशारा सियाने चेतन चौधरीला कसा दिला? चेतन हुडी घालून, तिकीट न घेता लोहगड किल्ल्यावर कसा पोहोचला? आणि तो सतत सिया आणि केतनचा पाठलाग कसा करत होता? हे पोलिसांना जाणून घ्यायचे होते. या क्राइम सीन रीक्रिएशनचे व्हिडीओ रेकॉर्डिंगही करण्यात आले.
(नक्की वाचा : Siya Goyal News : केतन अग्रवालच्या हत्येसाठी सिया गोयलने काय काय केलं? संपूर्ण Google हिस्ट्री आली समोर)
लोणावळा पोलिसांनी दोन्ही आरोपी सिया गोयल आणि चेतन चौधरीला लोहगड किल्ल्यावर नेऊन हे समजून घेण्याचा प्रयत्न केला की, केतन अग्रवाल कोणत्या वेळी लोहगडला पोहोचला? चेतन चौधरी कधी तिथे हजर होता? दोन्ही आरोपींनी काय-काय केले आणि हत्येची घटना कोणत्या क्रमाने घडली? तपास प्रक्रियेचा भाग म्हणून घटनास्थळी संपूर्ण गुन्ह्याची पुनरावृत्ती करण्यात आली, जेणेकरून आरोपींच्या जबाबांची पडताळणी घटनास्थळावरून मिळालेल्या पुराव्यांशी करता येईल
पोलीस सर्व बाजूंनी करत आहेत तपास
पुणे ग्रामीण पोलिसांच्या एका वरिष्ठ अधिकाऱ्याने सांगितले की, पोलिसांनी एक पुतळा (डमी) तयार केला आणि सिया गोयलला हे दाखवण्यास सांगितले की तिने केतनला त्या ठिकाणाहून कसे ढकलले होते. गोयलने गुन्ह्याच्या ठिकाणापर्यंत पोहोचण्यासाठी त्यांनी वापरलेला रस्ताही दाखवला. त्यांनी पुढे सांगितले की, तपासकर्ते गुन्ह्याचा कट, घटनेपूर्वी आणि नंतरची आरोपींची हालचाल, त्यांचे डिजिटल रेकॉर्ड आणि हत्येचा हेतू यासह प्रकरणाच्या विविध बाजूंचा तपास करत आहेत.
सीन रीक्रिएशनमुळे लोहगड किल्ला सर्वसामान्यांसाठी बंद ठेवण्यात आला होता. पोलिसांनी सुरक्षेच्या कारणास्तव कोणत्याही पर्यटकाला किंवा इतर व्यक्तीला प्रवेश देण्यास तात्पुरती बंदी घातली होती. 20 वर्षीय सिया गोयल आणि तिचा मित्र चेतन चौधरीने (वय 22 वर्ष) 25 वर्षांच्या केतन अग्रवालला किल्ल्यावरून ढकलून त्याची हत्या केल्याचा आरोप आहे.
