सूरज कसबे, प्रतिनिधी
PCMC Traffic Issue: पिंपरी-चिंचवड शहरात जड आणि अवजड वाहनांमुळे होणाऱ्या वाढत्या अपघातांवर आता कठोर नियंत्रण आणले जाणार आहे. या गंभीर समस्येवर उपाय शोधण्यासाठी पिंपरी-चिंचवड पोलीस आयुक्तालयाच्या वतीने नुकतीच एक उच्चस्तरीय आणि महत्त्वपूर्ण बैठक आयोजित करण्यात आली होती. या बैठकीत अनेक महत्त्वाचे आणि कडक निर्णय घेण्यात आले असून, नियम मोडणाऱ्यांवर आता मोठी आणि थेट कारवाई केली जाणार आहे. हे नवीन नियम केवळ अपघात कमी करणार नाहीत, तर शहरातील वाहतूक व्यवस्था अधिक सुरक्षित आणि शिस्तबद्ध करतील.
पोलिस आयुक्त विनयकुमार चौबे यांच्या प्रमुख उपस्थितीत ही बैठक पार पडली. यामध्ये पीएमआरडीएचे अतिरिक्त आयुक्त सिंगला, पोलीस सहआयुक्त डॉ. महावरकर, अपर पोलीस आयुक्त सारंग आव्हाड, वाहतूक विभागाचे उपायुक्त विवेक पाटील, परिमंडळ 2 चे उपायुक्त विशाल गायकवाड, परिवहन अधिकारी संदेश चव्हाण, आणि उपायुक्त परिवहन राहुल जाधव यांच्यासह इतर वरिष्ठ अधिकारी उपस्थित होते. या सर्व अधिकाऱ्यांनी एकत्रितपणे शहरातील अपघातांची वाढती संख्या लक्षात घेऊन तातडीने उपाययोजना करण्याचा निर्णय घेतला आहे.
काय घेतले निर्णय?
या बैठकीत जड वाहनांच्या मनमानीवर नियंत्रण आणण्यासाठी खालीलप्रमाणे प्रमुख निर्णय घेण्यात आले आहेत, जे तात्काळ अंमलात आणले जाणार आहेत.
1. नियमबाह्य आरएमसी प्लांटवर थेट कारवाई
जड वाहनांच्या वाहतुकीसाठी कारणीभूत असलेल्या नियमबाह्य आरएमसी (RMC - Ready Mix Concrete) प्लांटवर आता थेट कारवाईची तयारी करण्यात आली आहे. नियमबाह्य पद्धतीने चालणाऱ्या आरएमसी प्लांट चालकांना पीएमआरडीए (PMRDA) मार्फत त्यांचे काम थांबवण्यासाठी नोटीस दिली जाईल. याशिवाय, विनापरवाना कार्यरत असलेल्या आरएमसी प्लांटवर निष्कासनाची (Demolition) कारवाई केली जाणार आहे, ज्यामुळे बेकायदेशीर उद्योगांना मोठा धक्का बसेल.
( नक्की वाचा : Pune News : ऑपरेशनमध्ये भयंकर चूक! प्रसूतीनंतर पोटात टॉवेल, महिलेचा जीव गेला; पुण्यातील हॉस्पिटलला मोठा झटका )
2. वेगमर्यादा आणि तंत्रज्ञानाचा वापर
वाहनचालकांच्या वेगावर नियंत्रण ठेवण्यासाठी आता तंत्रज्ञानाची मदत घेतली जाणार आहे. जड-अवजड वाहनांसाठी वेगमर्यादा केवळ 30 किलोमीटर प्रतितास इतकी निश्चित करण्यात आली आहे. जीपीएस (GPS) मॉनिटरिंग सिस्टीम आणि स्पीड गनचा वापर करून या वेगमर्यादेचे पालन होते किंवा नाही याची नियमित तपासणी केली जाईल. नियमांचे उल्लंघन करणाऱ्यांवर कठोर दंडात्मक कारवाई करण्यात येईल.
3. सुरक्षा तपासणी आणि चालकांना विशेष प्रशिक्षण
वाहन आणि चालक दोघेही सुरक्षिततेच्या दृष्टिकोनातून सक्षम असावेत यासाठी संयुक्त मोहीम राबवली जाईल. जड-अवजड वाहनांची कसून सुरक्षा तपासणी केली जाईल आणि वाहन चालकांच्या परवान्यांची (लायसन्स) सखोल तपासणी केली जाईल. वाहन चालकांना वाहतूक नियमांबाबत जागरूकता आणि त्यांच्या पालनाचे विशेष प्रशिक्षण दिले जाईल. यासाठी आरटीओ (RTO), वाहतूक विभाग आणि स्थानिक पोलीस पथक आरएमसी प्लांटच्या ठिकाणीच संयुक्तपणे ही मोहीम राबवतील.
( नक्की वाचा : Axis Bank scam : 12 लाख रुपयांचा 'खेळ' झाला उघड; कॅशियरने Amazon वरून मागवले 'चिल्ड्रन नोट', बँक हादरली! )
4. वाहनांमध्ये महत्त्वाचे बदल अनिवार्य
डंपर, हायवा आणि मिक्सर यांसारख्या वाहनांखाली येऊन होणारे अपघात टाळण्यासाठी वाहनांच्या रचनेत आणि कार्यप्रणालीत बदल करणे बंधनकारक केले आहे.या वाहनांमध्ये चालकासोबत एक सहचालक/क्लिनर ठेवणे आता अनिवार्य केले जाईल, ज्यामुळे चालकाला मदत मिळेल आणि सुरक्षितता वाढेल. आरटीओ विभागामार्फत या वाहनांना अपघात टाळण्यासाठी चाक कव्हर करणारे बंपर आणि कॅमेरे लावणे तातडीने अनिवार्य केले जाईल.
या सर्व उपाययोजनांमुळे पिंपरी-चिंचवड परिसरात जड-अवजड वाहनांमुळे होणाऱ्या अपघातांची संख्या लक्षणीयरीत्या कमी होण्यास मदत होईल. नागरिकांच्या सुरक्षिततेसाठी हा एक महत्त्वपूर्ण आणि निर्णायक टप्पा आहे, असा विश्वास अधिकाऱ्यांनी व्यक्त केला आहे.
Track Latest News Live on Marathi.NDTV.com and get news updates from India and around the world
