ठाणे आणि मुंबई परिसरातील दररोज प्रवास करणाऱ्या लाखो लोकल रेल्वे प्रवाशांच्या अडचणी आणि समस्यांची दखल घेत, सार्वजनिक बांधकाम मंत्री रवींद्र चव्हाण यांच्या उपस्थितीत एक महत्त्वाची बैठक पार पडली. डोंबिवली जिमखाना येथे पार पडलेल्या या बैठकीत ठाणे व मुंबई परिसरातील तब्बल 48 विविध रेल्वे प्रवासी संघटनांच्या प्रतिनिधींनी एकत्र येत रवींद्र चव्हाण यांची सदिच्छा भेट घेतली.
या बैठकीदरम्यान रेल्वे प्रवाशांच्या विविध प्रलंबित प्रश्नांवर, लोकल फेऱ्यांच्या वेळेवर, स्थानकांतील सुविधांवर आणि प्रवाशांच्या सुरक्षेवर सविस्तर चर्चा करण्यात आली.
बैठकीतील महत्त्वाचे मुद्दे अन् चर्चा
ठाणे आणि मुंबई उपनगरीय रेल्वे मार्गावरील प्रवाशांचे प्रतिनिधित्व करणाऱ्या ४८ संघटनांच्या प्रतिनिधींनी बैठकीला हजेरी लावली आणि आपल्या भागातील प्रवाशांच्या समस्या मांडल्या. प्रवासी संघटनांच्या प्रतिनिधींनी आपल्या विविध मागण्यांचे सविस्तर निवेदन रवींद्र चव्हाण यांना सुपूर्द केले.
निवेदनातील सर्व समस्यांचा आढावा घेत, रवींद्र चव्हाण यांनी चर्चेला अत्यंत सकारात्मक प्रतिसाद दिला आणि प्रवाशांच्या अडचणी समजून घेतल्या. "रेल्वे प्रवाशांच्या समस्या लवकरात लवकर मार्गी लावण्यासाठी सर्वतोपरी प्रयत्न केले जातील आणि यासंदर्भात शासनस्तरावर आणि रेल्वे प्रशासनासोबत आवश्यक तो पाठपुरावा केला जाईल," असे स्पष्ट आश्वासन रवींद्र चव्हाण यांनी या वेळी दिले.
प्रवाशांच्या आशा पल्लवित
मुंबई आणि ठाणे परिसरातील लोकल प्रवाशांना दररोज तुडूंब गर्दी, गाड्यांचे उशिरा धावणे आणि सोयी-सुविधांचा अभाव यांसारख्या अनेक समस्यांना तोंड द्यावे लागते. लोकप्रतिनिधींनी या प्रश्नांमध्ये थेट लक्ष घालून सकारात्मक आश्वासन दिल्याने, येत्या काळात लोकल प्रवाशांचा प्रवास अधिक सुखकर होईल, अशी आशा व्यक्त केली जात आहे.
