IPL 2026 Qualification Scenario: आयपीएल २०२६ च्या प्लेऑफसाठीची शर्यत आता अत्यंत रोमांचक ली झाली आहे. धरमशाला येथे मुंबई इंडियन्सकडून पराभूत झाल्यामुळे पंजाब किंग्सला स्पर्धेतील सलग पाचव्या पराभवाला सामोरे जावे लागले. या मोठ्या पराभवानंतरही, पंजाब १२ सामन्यांतून १३ गुणांसह गुणतालिकेत चौथ्या स्थानावर कायम आहे. गुणतालिकेतील पहिली तीन स्थाने रॉयल चॅलेंजर्स बंगळूर (१२ सामन्यांतून १६ गुण), गुजरात टायटन्स (१२ सामन्यांतून १६ गुण) आणि सनरायझर्स हैदराबाद (१२ सामन्यांतून १४ गुण) यांनी पक्की राखली आहेत. पंजाबच्या खाली, पाचव्या आणि सहाव्या स्थानावर चेन्नई सुपर किंग्स आणि राजस्थान रॉयल्स आहेत, ज्यांनी ११ सामन्यांतून प्रत्येकी १२ गुण मिळवले आहेत आणि ते पंजाबला कडवी झुंज देत आहेत.
कसे आहे प्लेऑफचे समीकरण?
गुणतालिकेकडे पाहता, रॉयल चॅलेंजर्स बंगलोर आणि गुजरात टायटन्स सर्वात मजबूत स्थितीत आहेत. दोन्ही संघांनी १२ पैकी आठ सामने जिंकले असून ते १६ गुणांसह अव्वल स्थानी बरोबरीत आहेत. आरसीबीचा प्रभावी नेट रन रेट (+१.०५३) गुजरातपेक्षा वरचढ ठरवतो. आता दोन्ही संघ प्लेऑफमध्ये पोहोचलेले मानले जात आहेत.
पंजाब किंग्ससाठी परिस्थिती अत्यंत नाजूक झाली आहे. पंजाबने १२ पैकी सहा सामने जिंकले आहेत, परंतु गेल्या पाच सामन्यांतील सलग पराभवांनी त्यांचा आत्मविश्वास खालावला आहे. १३ गुणांसह ते अजूनही चौथ्या स्थानावर आहेत, पण आता त्यांना कोणतीही चूक करण्याची संधी नाही. जर ते पुढचा सामनाही हरले, तर त्यांचे स्पर्धेतील आव्हान संपुष्टात येणार आहे.
तिसऱ्या स्थानावर असलेला सनरायझर्स हैदराबाद १४ गुणांसह सुरक्षित दिसत आहे. तथापि, खरी लढत चेन्नई सुपर किंग्स आणि राजस्थान रॉयल्स यांच्यात आहे. दोन्ही संघांनी ११ सामन्यांतून १२ गुण मिळवले आहेत. दोन्ही संघांचे तीन सामने शिल्लक आहेत, जे त्यांना १८ गुणांपर्यंत पोहोचवू शकतात. सीएसकेचा रनरेट राजस्थानपेक्षा चांगला आहे, जे शेवटी निर्णायक ठरू शकते. मुंबई इंडियन्सने पंजाबला हरवून आठ गुण मिळवले आहेत, पण १२ सामन्यांनंतर ही आघाडी पुरेशी वाटत नाही. गुणतालिकेत तळाशी, कोलकाता नाईट रायडर्स नऊ गुणांवर आणि लखनौ सुपर जायंट्स केवळ सहा गुणांवर आहेत.
