Akola News : अक्षय नागलकर हत्या प्रकरणात पोलिसांना मोठं यश, आता DNA रिपोर्ट ठरवणार...

योगेश शिरसाट, प्रतिनिधी

Akola News : अकोल्यात मोठी खळबळ उडवून देणाऱ्या अक्षय विनायक नागलकर यांच्या हत्येचा अखेर अकोला पोलिसांनी छडा लावला आहे. या प्रकरणी पोलिसांनी वेगाने तपास करत मुख्य सूत्रधारासह एकूण 9 आरोपींना अटक केली आहे. बहुतांश आरोपींना पहिल्या 48 तासांत अटक करण्यात आली होती, तर या प्रकरणातील शेवटच्या आरोपीला आज (तारीख) ताब्यात घेण्यात आले आहे. या निर्घृण हत्येसाठी दोन देशी पिस्तूल आणि धारदार कोयत्याचा वापर करण्यात आला होता. विशेष म्हणजे, आरोपींनी खुनानंतर मृतदेह जाळून त्याची राख नदीपात्रात टाकून पुरावे नष्ट करण्याचा प्रयत्न केला होता.

जिल्हा पोलीस अधीक्षक अर्चित चांडक यांनी दिलेल्या माहितीनुसार, पोलिसांनी घटनास्थळावरून राख आणि हाडांचे अवशेष ताब्यात घेतले असून, डीएनए तपासाची प्रक्रिया सुरू आहे.

'15 मिनिटांत येतो' सांगून गेलेल्या अक्षयचा शेवटचा प्रवास

अक्षय विनायक नागलकर (वय 26) हे 22 ऑक्टोबर 2025 रोजी सायंकाळी 5 वाजता "15 मिनिटांत येतो" असे सांगून घरातून बाहेर पडले, पण ते परतलेच नाहीत. कुटुंबीयांनी 23 ऑक्टोबर रोजी डाबकीरोड पोलीस ठाण्यात मिसिंगची तक्रार नोंदवली. काही नातेवाईकांनी सुरुवातीपासूनच घातपाताचा संशय व्यक्त केल्याने पोलीस अधीक्षक अर्चित चांडक यांनी प्रकरणाचे गांभीर्य ओळखत तत्काळ विशेष पथके स्थापन केली.

'MH 30' हॉटेलमध्ये रचला खुनाचा कट

पोलिसांच्या तपासामध्ये धक्कादायक माहिती समोर आली. आरोपी चंद्रकांत (चंदू) बोरकर याने आपले साथीदार आशु वानखडे आणि इतरांच्या मदतीने अक्षय नागलकरला गायगाव रोडवरील ‘एमएच 30' या हॉटेलवर जेवणाच्या बहाण्याने बोलावले. हॉटेलचे शटर बंद करून, अक्षयच्या डोळ्यांत मिरचीपूड फेकत दोन देशी पिस्तूल आणि धारदार शस्त्रांनी त्याची निर्घृणपणे हत्या करण्यात आली.

( नक्की वाचा : Satara Doctor Suicide Case : 'महिला डॉक्टरचे दोघांशीही संबंध, चॅट समोर आले ते...' मंत्र्यांच्या आरोपानं खळबळ )

पुरावा नष्ट करण्याचा प्रयत्न

हत्येनंतर, आरोपींनी मृतदेह शेतातील टीनच्या शेडमध्ये नेऊन पेटवला. पुरावे पूर्णपणे नष्ट व्हावेत यासाठी त्यांनी मृतदेहाची राख बाळापूरच्या नदीपात्रात टाकून दिली होती. या गुन्ह्याचा तपास करण्यासाठी स्थानिक गुन्हे शाखेची चार, शहर विभागाची दोन आणि डाबकीरोड पोलीस ठाण्याची दोन अशी एकूण 8 विशेष पथके तयार करण्यात आली होती. गुप्त माहिती व तांत्रिक विश्लेषणाच्या आधारे पोलिसांनी अवघ्या 48 तासांच्या आत 8 आरोपींना देशभरातील विविध ठिकाणांहून ताब्यात घेतले. त्यानंतर आज (तारीख) या कटातील नवव्या आणि शेवटच्या आरोपीलाही बेड्या ठोकण्यात आल्या.

अटक करण्यात आलेले आरोपी:

यातील काही आरोपींना अहमदनगर, जळगाव आणि मध्यप्रदेशातील बैतूल येथून ताब्यात घेण्यात आले होते.

जप्त करण्यात आलेला मुद्देमाल

पोलिसांनी आरोपींकडून मृतकाचे हाडांचे तुकडे, दोन देशी पिस्तूल, 8 जिवंत काडतुसे, तसेच गुन्ह्यात वापरलेली चारचाकी आणि दुचाकी वाहने जप्त केली आहेत. तपासादरम्यान हत्येसाठी वापरलेली सर्व साधने पोलिसांना सापडली आहेत.

( नक्की वाचा : Akola News: पीक विम्यात शेतकऱ्यांची क्रूर थट्टा; अकोल्यात खात्यात जमा झाले फक्त 3, 5, आणि 21 रुपये 85 पैसे! )

जुन्या वादातून सूडातून रचला खुनाचा कट

तपासात उघड झाले की, मृतक अक्षयचा भाऊ शुभम नागलकर याचा मुख्य आरोपी चंदू बोरकर याच्यासोबत वाद झाला होता, ज्यातून शुभमला एमपीडीए कायद्यांतर्गत तुरुंगवास भोगावा लागला होता. या वादातून अक्षयने चंदू बोरकरला धमकावले होते. याच जुन्या वादाचा सूड घेण्यासाठी चंदू बोरकरने काही महिन्यांपूर्वी खुनाचा कट रचला आणि अत्यंत योजनाबद्धरीत्या ही हत्या घडवून आणली.

अकोला पोलिसांच्या अचूक तांत्रिक तपास, माहिती संकलन आणि प्रभावी टीमवर्कमुळे हा गुंतागुंतीचा गुन्हा पूर्णपणे उघडकीस आला आहे. जिल्हा पोलीस अधीक्षक अर्चित चांडक यांच्या मार्गदर्शनाखाली ही यशस्वी कारवाई करण्यात आली.

पुढील तपास डीएनए अहवालावर अवलंबून

पोलिसांनी जप्त केलेल्या राख आणि हाडांच्या अवशेषांचा डीएनए अहवाल आल्यानंतर प्रकरणाला अंतिम स्वरूप दिले जाईल. सर्व आरोपींना न्यायालयात हजर करून पोलीस कोठडी घेण्यात आली असून, त्यांच्याकडून अधिक माहिती मिळण्याची शक्यता तपास यंत्रणांनी व्यक्त केली आहे.