अंबरनाथमध्ये एका 6 वर्षीय चिमुकलीचा २३ वर्षीय नराधमाने विनयभंग केल्याची घटना घडली आहे. या घटनेनंतर परिसरातील लोकांनी त्याला बेदम चोप दिला. त्यानंतर त्याला पोलिसांच्या हवाली करण्यात आलं. अंबरनाथच्या पूर्व भागातील शिवाजीनगर पोलीस ठाण्याच्या हद्दीत पीडित 6 वर्षीय मुलगी आणि 23 वर्षीय आरोपी एकाच परिसरात राहातात. शनिवारी सायंकाळच्या सुमारास पीडित मुलगी रस्त्यावरून एकटी जात असल्याचं पाहून या नराधमाने तिला आपल्या सोबत नेण्याचा प्रयत्न केला.
( 'NDTV मराठी' चं अधिकृत व्हॉट्सअ‍ॅप चॅनल जॉईन करा )
नराधम तरूण तिला आपल्या सोबत घेवून जात होता. त्यामुळे ती चिमुकली रडू लागली. मुलगी रडत असल्याने तिथे असलेल्या लोकांच्या ही बाब लगेचच लक्षात आली. त्यानंतर लोकांनी या नराधमाला पकडून त्याला बेदम चोप दिला. त्यानंतर काही लोकांनी या घटनेची माहिती पोलीसांना दिली. पोलीसांनी यातरूणाला ताब्यात घेतले. या घटनेप्रकरणी शिवाजीनगर पोलिसांनी विनयभंगासह पोक्सो कायद्यांतर्गत गुन्हा दाखल करण्यात आला आहे. या नराधमाला बेड्या ठोकल्याची माहिती शिवाजीनगर पोलीस ठाण्याचे वरिष्ठ पोलीस निरीक्षक अशोक भगत यांनी दिली आहे.
काही दिवसांपूर्वी बदलापूरमध्येही सर्वांनाच हादरवून सोडणारी घटना घडली होती. त्याचे पडसाद संपूर्ण राज्यात उमटले होते. त्यानंतर अशा आरोपींना जरब बसेल अशी अपेक्षा होती. पण राज्यात बलात्कार, विनयभंगाच्या घटना या होतच असल्याचे समोर येत आहेत. या घटना थांबण्याचे नाव घेत नाहीत. बदलापूर प्रकरणात तर जनता रस्त्यावर उतरली होती. त्यांच्या रागाचा भडका उडाला होता. रेल रोको बरोबरच ज्या शाळेत हा प्रकार झाला तिथेही तोडफोड झाली होती. त्यानंतर सरकारने तातडीने पाऊले उचलण्याचा निर्णय घेतला होता. त्यानंतर अंबरनाथमध्ये ही घटना घडली आहे.
