राहुल तपासे, प्रतिनिधी
Satara News : गुजरात राज्यातून आलेल्या नार्को ड्रग पथकाने सातारा जिल्ह्यातील दुर्गम भाग समजल्या जाणाऱ्या एका गावात केलेल्या कारवाईने संपूर्ण महाराष्ट्रात खळबळ उडाली आहे. या कारवाईत सुमारे 6000 कोटी रुपयांच्या एमडीचा साठा सापडल्याची प्राथमिक माहिती सूत्रांकडून दिली जात आहे. आयपीएस रँकच्या तीन अधिकाऱ्यांनी केलेल्या कारवाईत हा मोठा साठा सापडला आहे. हे सर्व अधिकारी आणि त्यांची टीम गुजरातमधून आल्याची प्राथमिक माहिती आहे. या प्रकरणात स्थानिक आणि बिहार राज्यातील काही तरुणांना ताब्यात घेतलं आहे. विशेष म्हणजे ही कारवाई करत असताना पथकाने इतकी गोपनीयता पाळली की याची पुसटशी कल्पनाही सातारा पोलिसांना होऊन दिली नाही. गुजरात राज्यातून आलेले हे पथक अजूनही कराडमध्ये तळ ठोकून आहे.
मिळालेल्या सूत्रांकडून सातारा जिल्ह्यातील कराड तालुक्यातील पाचपुतेवाडी या ठिकाणी असलेल्या एका मोठ्या शेडवर गुजरातमधून आलेल्या डी आर आय विभागाच्या पथकाने कारवाई केली आहे. त्यांनी या शेडचा मालक बाबा मोरे याला ताब्यात घेतलं असून पुढची कारवाई सुरू केली आहे. या शेडमध्ये सुमारे 6000 कोटी रुपयांचं एमडी ड्रग बनवण्याचं सर्व साहित्य जप्त केल्याचं सांगितलं जात आहे. पथकाने सर्व ड्रग्स आणि कच्चामाल ताब्यात घेतला असून या संपूर्ण परिसराला सील ठोकण्यात आलं आहे. या ठिकाणी काही बिहार राज्यातील युवकही काम करत असल्याचं समोर आले आहे.
बाबा मोरे खून प्रकरणातील आरोपी...
सर्वात महत्त्वाचं म्हणजे या प्रकरणातील प्रमुख आरोपी बाबा मोरे हा एका मोठ्या खून प्रकरणातील प्रमुख आरोपी आहे. बाबा मोरेने महाराष्ट्र केसरी पटकावणारा संजय पाटील यांचा गोळ्या झाडून खून केला होता. बाबा मोरे या खून प्रकरणातला प्रमुख आरोपी समजला जातो. इतकच नाही तर त्याच्यावर असंख्य गंभीर स्वरूपाचे गुन्हे दाखल आहेत. याच परिसरामध्ये त्याचा बनावट दारू बनवण्याचा कारखाना सुरू होता. तो उघडकीस आणून त्याच्यावरती गुन्हा दाखल करण्यात आला होता. या एमडी ड्रगच्या कारवाईमुळे संपूर्ण महाराष्ट्रात सध्या खळबळ उडाली आहे. याबाबत सातारा पोलिसांना कोणतीच माहिती नसल्याचे सांगितले जात आहे.
साधारण एक महिन्यापूर्वी साताऱ्यातील बामणोली परिसरातही अशाच प्रकारे दुर्गम भागात एक एमडी ड्रग बनवण्याचा कारखाना उघडकीस आला होता. मुंबई येथून आलेल्या नार्को टेस्ट पथकाने धाड टाकून कोट्यावधी रुपयाचा एमडी ड्रगचा माल हस्तगत केला होता. त्याचा तपास अद्याप पूर्ण झाला नसताना साताऱ्यात जिल्ह्यातली ही दुसरी कारवाई म्हणजे सातारा पोलिसांच्या कार्यक्षमतेवर संशय घेणारी ठरू शकते. या कारवाईबाबत अद्यापपर्यंत कोणीही बोलण्यास तयार नाही.
