- तिरुवनंतपुरममधील 18 महिन्यांच्या बाळाच्या पोस्टमार्टेम रिपोर्टमध्ये शरीरावर 91 जखमांचे निशाण आढळले
- बाळाच्या 7 बरगड्या मोडल्या असून अंतर्गत अवयवांना गंभीर दुखापत झाली
- आरोपी अशकर याने बाळाच्या छातीवर जोरदार दाब दिल्यामुळे अवयवांचे गंभीर नुकसान
Kerala Crime News: केरळमच्या तिरुवनंतपुरममधील एका 18 महिन्यांच्या बाळाच्या मृत्यूचे प्रकरण पुन्हा एकदा चर्चेत आले आहे. बाळाच्या पोस्टमार्टेम रिपोर्टमधून अतिशय धक्कादायक आणि थरकाप उडवणारे खुलासे झाले आहेत. रिपोर्टनुसार या बाळाच्या शरीरावर जखमांचे अनेक जुने निशाण आढळले, त्याला सातत्याने आणि अत्यंत क्रूरपणे शारीरिक छळाला सामोरे जावे लागल्याचे यातून समोर येत आहे. या प्रकरणी पोलीस आता बाळाचे आई-वडील आणि त्यांच्या जवळच्या लोकांची कसून चौकशी करत आहेत. पोलिसांनी या प्रकरणातील आरोपी अशकर याच्याविरुद्ध एससी/एसटी (SC/ST) कायद्यांतर्गत गुन्हा दाखल केला आहे. रिमांड रिपोर्टनुसार, त्या निष्पाप चिमुरड्यावर प्रदीर्घ काळापासून प्रचंड प्रमाणात शारीरिक अत्याचार केले जात होते.
शरीरावर 91 जखमांचे निशाण
पोस्टमार्टेम रिपोर्टमध्ये असे समोर आले आहे की, छातीवर आणि डोक्यावर झालेल्या गंभीर दुखापतींमुळे बालकाचा मृत्यू झाला. डॉक्टरांना बाळाच्या शरीरावर तब्बल 91 जखमा आढळल्या आहेत. यामध्ये छातीच्या 7 बरगड्या मोडल्याचे, अंतर्गत अवयवांना दुखापत झाल्याचे आणि कवटीच्या आत अनेक ठिकाणी सूज येऊन रक्तस्त्राव झाल्याचे नमूद करण्यात आले आहे. तपास अधिकाऱ्यांच्या म्हणण्यानुसार, आरोपी अशकर याने बाळाच्या छातीवर पाय देऊन जोरात दाबल्यामुळे त्याच्या बरगड्या तुटल्या आणि यामुळे अंतर्गत अवयवांचे मोठे नुकसान झाले.
याशिवाय रिपोर्टमध्ये बाळाच्या गुप्तांगावर आणि उजव्या पायाच्या तळव्यावर भाजल्याच्या जखमा असल्याचाही उल्लेख आहे, जे कथित स्वरुपात सिगरेट लाइटरने चटके देण्यात आल्याचा आरोप आहे. या जखमांवरून बालकावर वारंवार अमानुष अत्याचार केले जात असल्याचे स्पष्ट होत असल्याचे पोलिसांचे म्हणणे आहे.
(नक्की वाचा : पुण्याच्या घटनेनंतर पोलीस अॅक्शन मोडमध्ये! मुंबईत पोलिसांकडून अवैध दारूभट्टी उद्ध्वस्त, लाखोंचा माल जप्त)
पायऱ्यांवरुन पडल्याचा आईने रचला बनाव
तपास अधिकारी बाळाच्या हाताचे हाड पूर्वीच मोडले असल्याच्या घटनेचाही तपास करत आहेत. आरोपी अशकर आणि बाळाची आई अखिला यांनी असा दावा केला होता की, मुलगा पायऱ्यांवरून खाली पडल्यामुळे ही दुखापत झाली होती. पण पोलिसांना यामध्ये संशयास्पद वाटत असून, अखिलाविरुद्ध गुन्हा करण्यास प्रवृत्त केल्याचा गुन्हा नोंदवला जाऊ शकतो, असे संकेत पोलिसांनी दिले आहेत. चौकशीदरम्यान अशकर याने पोलिसांसमोर कबुली दिली की, अखिलासोबतच्या त्याच्या नात्यात ते मूल एक अडथळा बनले होते. हा छळ पूर्वनियोजित होता का आणि यामध्ये इतर कोणाचा सहभाग होता का, याचा तपास आता पोलीस करत आहेत.
आरोपी अशकर याने यापूर्वी आपल्या पहिल्या पत्नीलाही इतकी बेदम मारहाण केली होती की, ती शारीरिकदृष्ट्या अपंग झाली होती, अशी माहितीही पोलिसांच्या हाती लागली आहे. अधिकारी आता त्या महिलेच्या मृत्यूशी संबंधित परिस्थितीचीही सखोल चौकशी करणार आहेत, जी काही काळापूर्वी त्याच्यासोबत राहत होती.
