सुरज कसबे, पुणे: गेल्या काही दिवसांपासून राज्यात गंभीर गुन्ह्याच्या घटना समोर येत आहेत. पुणे, पिंपरी चिंचवड भागात हत्या, मारामारीच्या घटनांमध्ये वाढ होत असून यामध्ये अल्पवयीन मुलांचा वाढता सहभाग चिंतेचा विषय ठरत आहे. अशातच पिंपरी चिंचवडमधून एक धक्कादायक प्रकार समोर आला असून तीन अल्पवयीन मुलांनी एका 37 वर्षीय व्यक्तीची हत्या केल्याचे उघडकीस आले आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
याबाबत समोर आलेल्या माहितीनुसार, पिंपरी चिंचवड शहरातील चिखली पोलिस ठाण्याच्या हद्दीत एका 37 वर्षीय व्यक्तीचा खून करण्यात आला होता. चिखलीमधील शरदानगर भागात 8 मे 2025 रोजी सकाळी 9 च्या सुमारास महेश शिवाजी चामे याचा व्यक्तीचा कोयत्याने वार करून खून करण्यात आला होता. ही हत्या कोणी व कोणत्या कारणाने केली याचा तपास करण्याचे आव्हान पोलिसांसमोर होते.
याचबाबत आता एक महत्त्वाची अपडेट समोर आली आहे. या प्रकरणी चिखली पोलिसांनी अखेर तीन अल्पवयीन आरोपींना ताब्यात घेतलं आहे. व्यसनाच्या आहारी गेलेल्या या अल्पवयीन मुलांनी दारूच्या नशेत मयत महेश चामे यांच्या कडे माचिस आणि सिगरेट मागितली. त्यावेळी त्यांनी नकार दिला असताना आमचा आणि मयत यांचा वाद झाला आणि त्यातून आम्ही कोयत्याने त्यांच्यावर वार केल्याचं या अल्पवयीन आरोपींनी म्हटले आहे. या घटनेने परिसरात एकच खळबळ उडाली आहे.
ट्रेंडिंग बातमी - Operation Sindoor: बाबा वेंगाची भविष्यवाणी खरी ठरणार? काय केली होती भविष्यवाणी?
दरम्यान, शेअर ट्रेडिंगमध्ये ज्यादा पैशाचे आमिष दाखवून एकाची 44 लाख 50 हजार रुपयांची फसवणूक केल्याचा प्रकारही उघडकीस आला आहे. याप्रकरणी आरोपीस पिंपरी चिंचवड पोलिसांच्या सायबर पोलिसांनी बेड्या ठोकल्यात. अक्षय राजेंद्र बनेकर असे अटक करण्यात आलेल्या व्यक्तीचे नाव आहे. पोलिस याबाबतचा अधिक तपास करत आहेत.
