Punha Ekda Sade Made Teen Marathi Movie: नाताळ म्हणजे आनंद, भेटवस्तू आणि हसू…आणि याच नाताळच्या निमित्ताने मराठी प्रेक्षकांसाठी एक जबरदस्त हास्याची भेट समोर आली आहे. प्रेक्षकांच्या मनावर अधिराज्य गाजवणारे 'कुरळे ब्रदर्स' पुन्हा एकदा मोठ्या पडद्यावर धमाल करण्यासाठी सज्ज झाले आहेत. 'पुन्हा एकदा साडे माडे तीन' या बहुप्रतीक्षित चित्रपटाचं नवं पोस्टर नुकतंच सोशल मीडियावर झळकलंय, येत्या 30 जानेवारी 2026 रोजी हा सिनेमा प्रेक्षकांच्या भेटीला येणार आहे.
यावेळेस डबल गोंधळ आणि डबल धमाल पाहायला मिळणार असल्याचे पोस्टरद्वारे स्पष्ट होतंय. साध्या परिस्थितीतून मोठा गोंधळ निर्माण करणारी 'साडे माडे तीन'ची ओळख या नव्या पोस्टरमधूनही ठळकपणे जाणवते आणि त्यामुळेच प्रेक्षकांची उत्सुकता अधिकच वाढलीय.
19 वर्षांनंतर आठवणींना उजाळा...
‘साडे माडे तीन'चा पहिला भाग आजही प्रेक्षकांच्या आठवणीत ताजा आहे. भावंडांमधील जिव्हाळा, निरागस विनोद आणि पोट धरून हसवणारे प्रसंग यामुळे हा चित्रपट मराठी प्रेक्षकांच्या हृदयात कायमचा घर करून बसला. विशेष म्हणजे या अविस्मरणीय पहिल्या भागाचं दिग्दर्शनही अंकुश चौधरीनंच केलंय. अभिनेता म्हणून लोकप्रिय असलेला अंकुश चौधरी दिग्दर्शक म्हणूनही तितकेच सक्षम आणि संवेदनशील असल्याचं त्यानं अनेक चित्रपटांतून सिद्ध केलंय. मनोरंजन आणि कथन यांचा अचूक समतोल साधणारी त्याची दिग्दर्शकीय हातोटीच ‘साडे माडे तीन'च्या यशामागचं मोठं बळ ठरली होती.
आता तब्बल 19 वर्षांनंतर त्याच आठवणींना उजाळा देत आणि आजच्या काळाशी जुळवून घेत ‘पुन्हा एकदा साडे माडे तीन' प्रेक्षकांच्या भेटीला येत असल्यामुळे उत्सुकता शिगेला पोहोचली आहे. अंकुश चौधरीसारख्या अनुभवी दिग्दर्शकाच्या हातात ही कथा पुन्हा एकदा साकारली जात असल्यामुळे या वेळी हास्याबरोबरच कथेतली पकडही तितकीच भक्कम असणार, यांचा अंदाज येतोय.
(नक्की वाचा: Hrithik Roshan Dance Video: बाप से बेटा सवाई! तारे गिन गिन गाण्यावर हृतिक रोशननं मुलांसोबत केला धमाकेदार डान्स)
सिनेमाबाबत निर्मात्यांचं काय आहे म्हणणं?
निर्मात्या उषा काकडे म्हणतात, ‘'हा चित्रपट म्हणजे केवळ पुढचा भाग नाही, तर प्रेक्षकांच्या आठवणींवरची प्रेमाची फुंकर आहे. त्यामुळे प्रत्येक गोष्ट जपून आणि मनापासून केली आहे.”
निर्माते अमेय खोपकर सांगतात, ‘'पहिला चित्रपट पाहून मोठा झालेला प्रेक्षक आणि आजचा तरुण प्रेक्षक दोघांनाही एकत्र हसवणं, हीच आमची खरी परीक्षा होती आणि मला खात्री आहे, यात आम्ही यशस्वी झालो आहोत.''
(नक्की वाचा: Rehman Dakait Son: रहमान डकैतच्या 3 पत्नी, 13 मुलं; सर्वात छोटा मुलगा काय करतो? क्राइम नव्हे ही गोष्टी आवडते)
तर निर्माते पुष्कर यावलकर म्हणतात, “आजच्या धावपळीच्या आयुष्यात दोन-अडीच तास मनमुराद हसता आलं, तर त्याहून मोठं यश नाही.”
सिनेमातील तगडी स्टारकास्टअंकुश चौधरी यांची कथा, संदीप दंडवते यांची पटकथा आणि संवाद लाभलेल्या या चित्रपटात अशोक सराफ, भरत जाधव, मकरंद अनासपुरे, सिद्धार्थ जाधव, रिंकू राजगुरू, संकेत पाठक, संजय नार्वेकर आणि समृद्धी केळकर यांच्या प्रमुख भूमिका आहेत. चित्रपटाचे छायाचित्रण प्रसिद्ध छायाचित्रकार संजय जाधव यांनी केलंय.
