Adani Airports and IHG Partnership: भारतातील विमानतळ क्षेत्रातील मोठी कंपनी 'अदाणी एअरपोर्ट होल्डिंग्स लिमिटेड' (AAHL) आणि जागतिक स्तरावरील आघाडीची हॉस्पिटॅलिटी कंपनी 'आयएचजी हॉटेल्स अँड रिसॉर्ट्स' (IHG) यांनी एका महत्त्वपूर्ण करारावर स्वाक्षरी केली आहे. या भागीदारीमुळे भारतातील प्रमुख विमानतळ आणि व्यावसायिक भागात 5 नवीन हॉटेल्स उभारली जाणार आहेत. या प्रकल्पामुळे देशातील हॉस्पिटॅलिटी क्षेत्रात तब्बल 1,500 पेक्षा जास्त नवीन रूम्सची भर पडणार आहे.
लक्झरी ब्रँड 'किम्पटन'चे भारतात पदार्पण
या कराराचे सर्वात मोठे वैशिष्ट्य म्हणजे आयएचजीचा जगप्रसिद्ध लक्झरी लाइफस्टाइल बुटीक ब्रँड 'किम्पटन हॉटेल्स अँड रेस्टॉरंट्स' आता भारतात प्रवेश करत आहे. आपल्या नाविन्यपूर्ण डिझाइन आणि उत्कृष्ट खानपान अनुभवासाठी प्रसिद्ध असलेले पहिले किम्पटन हॉटेल जयपूरमध्ये साकारले जाणार आहे. प्रीमियम लाइफस्टाइल अनुभवाची आवड असणाऱ्या पर्यटकांसाठी हे मोठे आकर्षण ठरेल.
अदाणी आणि आयएचजीची ही नवीन हॉटेल्स प्रामुख्याने विमान वाहतूक आणि शहरी विकास केंद्रांमध्ये विकसित केली जातील. यामध्ये जयपूरसह मुंबई महानगर प्रदेश (MMR), मंगळुरू आणि तिरुवनंतपुरम या शहरांचा समावेश आहे. या पोर्टफोलिओमध्ये किम्पटनसह 'हॉलिडे इन' आणि 'हॉलिडे इन एक्सप्रेस' यांसारख्या प्रसिद्ध ब्रँड्सचाही समावेश असेल.
( नक्की वाचा : Edible Oil: विदेशी तेलाचा विळखा सुटणार! देशात खाद्य तेलात क्रांती होणार; पाहा काय आहे केंद्र सरकारचा नवा प्लॅन )
विमानतळ आता केवळ प्रवासाचे साधन नाही
अदाणी एंटरप्रायजेस लिमिटेडचे संचालक प्रणव अदाणी यांनी या भागीदारीबद्दल माहिती दिली. ते म्हणाले की, अदाणी ग्रुप केवळ विमानतळांचा विस्तार करत नसून, त्याभोवती प्रवास, मुक्काम आणि जागतिक दर्जाच्या नागरी सुविधांचे एक जाळे निर्माण करत आहे. विमानतळ परिसरामध्ये सुमारे 663 एकरवर पसरलेल्या 'एअरपोर्ट सिटी' विकासाच्या माध्यमातून प्रवाशांचा अनुभव अधिक समृद्ध करण्याचा कंपनीचा प्रयत्न आहे.
आयएचजीचा भारतासाठी मोठा प्लॅन
आयएचजी हॉटेल्स अँड रिसॉर्ट्सचे सुदीप जैन यांनी सांगितले की, भारतात विमानतळ आधारित प्रकल्पांमध्ये व्यवसाय आणि पर्यटनासाठी येणाऱ्या प्रवाशांची संख्या मोठी आहे. आयएचजी सध्या भारतात 6 ब्रँड्सच्या अंतर्गत 52 हॉटेल्स चालवत असून, येणाऱ्या 3 ते 5 वर्षांत आणखी 98 हॉटेल्स सुरू करण्याचे त्यांचे नियोजन आहे. या विस्तारामुळे भारतातील हॉस्पिटॅलिटी पायाभूत सुविधा अधिक प्रबळ होतील.
(अस्वीकार: नवी दिल्ली टेलिव्हिजन ही अदानी समुहाच्या AMG मीडिया नेटवर्क्स लिमिटेडची उपकंपनी आहे.)
Track Latest News Live on Marathi.NDTV.com and get news updates from India and around the world
