West Bengal Election Result 2026: पश्चिम बंगालच्या विधानसभा निवडणुकीत भारतीय जनता पक्षाने मिळवलेल्या प्रचंड विजयानंतर संपूर्ण राज्यात परिवर्तनाचे वातावरण आहे. या राजकीय उलथापालथीचा पहिला परिणाम आसनसोलमध्ये पाहायला मिळाला. स्थानिक तणावामुळे गेल्या अनेक वर्षांपासून कुलूपबंद असलेले येथील एक प्रसिद्ध दुर्गा मंदिर भाविकांसाठी पुन्हा खुले करण्यात आले. श्री श्री दुर्गामाता चॅरिटेबल ट्रस्टच्या वतीने चालवले जाणारे हे मंदिर आता केवळ सणासुदीलाच नाही, तर वर्षभर दर्शनासाठी खुले राहणार असल्याने भाविकांमध्ये आनंदाचे उधाण आले आहे.
भाजपाच्या विजयानंतर 'मंदिर आश्वासन' पूर्ण
पश्चिम बंगालमधील निवडणुकीत भाजपने 293 पैकी 206 जागा जिंकून ऐतिहासिक यश मिळवले आहे. विशेष म्हणजे आसनसोल ज्या पश्चिम बर्धमान जिल्ह्यात येते, तिथल्या सर्व 9 विधानसभा जागांवर भाजपने विजय मिळवला आहे. आसनसोल उत्तर मतदारसंघातून नवनिर्वाचित आमदार कृष्णेंदू मुखर्जी यांनी निवडणूक प्रचारादरम्यान एक महत्त्वाचे आश्वासन दिले होते.
आपण निवडून आल्यास वर्षांनुवर्षे बंद असलेले हे मंदिर भाविकांसाठी पूर्ण वेळ खुले करू, असा शब्द त्यांनी दिला होता. विजयी होताच त्यांनी मंदिरात जाऊन हे आश्वासन पूर्ण केले आणि मंदिराचे दरवाजे उघडले.
15 वर्षांच्या तृणमूल सत्तेचा अंत
यावेळच्या निवडणुकीत भाजपने ममता बॅनर्जी यांची 15 वर्षांची जुनी सत्ता मुळापासून उखडून टाकली आहे. बहुमतासाठी आवश्यक असलेला 147 आकडा पार करत भाजपने तब्बल 206 जागांवर ताबा मिळवला आहे. दुसरीकडे तृणमूल काँग्रेसला केवळ 80 जागांवर समाधान मानावे लागले आहे.
या राजकीय धक्क्यामुळे बंगालच्या राजकारणाची समीकरणे पूर्णपणे बदलली असून, सत्तेत झालेल्या या बदलाचे पडसाद आता स्थानिक पातळीवरही उमटू लागले आहेत.
