Karnataka Politics: कर्नाटकच्या राजकीय वर्तुळातून एक अत्यंत मोठी आणि खळबळजनक बातमी समोर येत आहे. गेल्या अनेक दिवसांपासून सुरू असलेल्या अंतर्गत राजकीय चर्चेला आता पूर्णविराम मिळण्याची शक्यता असून कर्नाटकात लवकरच सत्ता बदल होणार असल्याचे चित्र स्पष्ट झाले आहे. मुख्यमंत्री सिद्धारमैया यांनी गुरुवारी सकाळी सर्व मंत्र्यांसाठी एक विशेष 'ब्रेकफास्ट मीटिंग' आयोजित केली आहे. ही बैठक म्हणजे राज्यातील सत्ता बदलाची अंतिम अधिकृत प्रक्रिया असल्याचे मानले जात आहे. राजकीय सूत्रांनी दिलेल्या माहितीनुसार, सिद्धारमैया याच दिवशी मुख्यमंत्रिपदाचा राजीनामा देऊ शकतात.
शिवकुमार यांच्या नावावर शिक्कामोर्तब?
सर्व गोष्टी जर हायकमांडच्या योजनेनुसार पार पडल्या, तर आगामी एका आठवड्याच्या आत कर्नाटकात नवीन सरकारचा शपथविधी सोहळा पार पडू शकतो. दिल्लीतील काँग्रेसच्या वरिष्ठ गोटातून मिळालेल्या संकेतानुसार, डी. के. शिवकुमार यांचे मुख्यमंत्री बनणे आता जवळपास निश्चित मानले जात आहे. मात्र, तूर्तास वातावरण शांत ठेवण्यासाठी त्यांनी आपल्या समर्थकांना कोणत्याही प्रकारचा जल्लोष न करण्याचे आणि संयम राखण्याचे आदेश दिले आहेत.
(नक्की वाचा- Pune Jamavbandi: पुण्यात आज रात्रीपासून 14 दिवस जमावबंदी लागू! महापालिकेकडून गाईडलाईन्सही जारी)
मल्टी-डेप्युटी सीएम फॉर्म्युला
नवीन सरकारमध्ये प्रादेशिक आणि जातीय संतुलन राखण्यासाठी एकापेक्षा जास्त उपमुख्यमंत्री बनवले जाण्याची शक्यता आहे. सिद्धारमैया यांच्या गोटातील काही अत्यंत महत्त्वाच्या आणि विश्वासू नेत्यांना उपमुख्यमंत्री पद आणि मंत्रिमंडळात वजनदार खाती देऊन त्यांचे पुनर्वसन करण्याची तयारी सुरू आहे.
रणदीप सुरजेवाला बेंगळुरूत
कर्नाटक काँग्रेसचे प्रभारी रणदीप सुरजेवाला बुधवारी दुपारी बेंगळुरूमध्ये दाखल होणार आहेत. याच दिवशी पंडित जवाहरलाल नेहरू यांच्या पुण्यतिथीनिमित्त प्रदेश काँग्रेस कार्यालय आयोजित कार्यक्रमात मुख्यमंत्री सिद्धारमैया आणि डी. के. शिवकुमार हे दोन्ही दिग्गज नेते एकाच मंचावर एकत्र दिसणार आहेत. या माध्यमातून पक्षात कोणतीही फूट नसून पक्ष पूर्णपणे एकसंध आहे, हा 'युनिटी शो' दाखवण्याचा काँग्रेसचा प्रयत्न असेल.
(नक्की वाचा- Mumbai-Pune: मुंबई-पुणे अंतर आता अवघ्या दीड तासांवर! 'ग्रीनफिल्ड एक्सप्रेसवे'वरून प्रवास होणार सुसाट)
सिद्धारमैया यांना राज्यसभेची ऑफर
मुख्यमंत्रिपद सोडल्यानंतर सिद्धारमैया यांना काँग्रेस हायकोर्टाने संसदेच्या वरिष्ठ सभागृहात म्हणजेच राज्यसभेत पाठवण्याचा प्रस्ताव दिला आहे. या प्रस्तावाबाबत त्यांना पुढील काही दिवसांत काँग्रेसचे संघटन सरचिटणीस के. सी. वेणुगोपाल यांना अपना अंतिम निर्णय कळवायचा आहे. राज्यसभेच्या नामांकनाची शेवटची तारीख 8 जून आहे. मात्र, अद्याप सिद्धारमैया राष्ट्रीय राजकारणात जाण्याबाबत कोणताही ठोस निर्णय घेऊ शकलेले नाहीत, असे त्यांच्या निकटवर्तीयांकडून समजते.
काँग्रेस नेतृत्वाने स्पष्ट केले आहे की, कर्नाटकच्या पुढील मुख्यमंत्र्याचा चेहरा कोण असेल, याचा अंतिम निर्णय सिद्धारमैया घेणार नसून केवळ काँग्रेस हायकमांडच करेल. राहुल गांधी यांच्यासोबत झालेल्या 35 मिनिटांच्या वैयक्तिक बैठकीत सिद्धारमैया यांना आगामी 2028 ची विधानसभा आणि 2029 च्या लोकसभा निवडणुका डोळ्यांसमोर ठेवून निर्णय घेण्यास सांगण्यात आले आहे. तसेच, ते देशातील काँग्रेसचा सर्वांत मोठा OBC चेहरा असून राष्ट्रीय राजकारणात त्यांची भूमिका अत्यंत महत्त्वाची असेल, असेही हायकमांडने त्यांना आश्वस्त केले आहे.
