PM Modi : पंतप्रधान नरेंद्र मोदींच्या नावे ऐतिहासिक विक्रम; इंदिरा गांधी यांना टाकलं मागे

पंतप्रधान नरेंद्र मोदी यांच्या नावावर आज आणखी एका मोठ्या विक्रमाची नोंद झाली आहे. शुक्रवार, २५ जुलै २०२५ रोजी पंतप्रधान नरेंद्र मोदी यांनी सलग ४,०७८ दिवस भारताचे पंतप्रधान म्हणून कार्यभार सांभाळण्याचा महत्त्वपूर्ण टप्पा पूर्ण केला आहे. यासह, त्यांनी माजी पंतप्रधान इंदिरा गांधी यांच्या सर्वाधिक काळ सलग पंतप्रधानपदी राहण्याच्या विक्रमाला मागे टाकले आहे. ज्यामुळे ते आता भारताचे दुसरे सर्वाधिक काळ सलग पंतप्रधानपदी राहिलेले नेते बनले आहेत.

इंदिरा गांधी यांनी २४ जानेवारी १९६६ ते २४ मार्च १९७७ या कालावधीत सलग ४,०७७ दिवस पंतप्रधान म्हणून काम केले होते. पंतप्रधान नरेंद्र मोदींनी त्यांचा हा विक्रम आज मोडला आहे. सर्वाधिक काळ सलग पंतप्रधानपदी राहण्याचा विक्रम अजूनही भारताचे पहिले पंतप्रधान पंडित जवाहरलाल नेहरू यांच्या नावावर आहे.

पंतप्रधान मोदी यांची इतर कामगिरी

पंतप्रधान मोदींनी जवाहरलाल नेहरूंप्रमाणेच सलग तीन लोकसभा निवडणुकांमध्ये त्यांच्या पक्षाला विजय मिळवून दिला आहे. राज्याच्या आणि केंद्रातील सरकारचे निवडून आलेले प्रमुख म्हणून मोदींनी सर्वाधिक काळ सत्तेवर राहण्याचा विक्रम आधीच केला आहे. ते २००१ मध्ये गुजरातचे मुख्यमंत्री बनले आणि २०१४ मध्ये पंतप्रधान होईपर्यंत या पदावर राहिले.

स्वातंत्र्यानंतर जन्मलेले ते पहिले पंतप्रधान आहेत. तसेच ते सर्वाधिक काळ पंतप्रधानपदी राहिलेले पहिले गैर-काँग्रेसी पंतप्रधान आहेत. तसेच, केंद्रात दोन पूर्ण कार्यकाळ पूर्ण करणारे ते एकमेव गैर-काँग्रेसी नेते आहेत.

एका अधिकाऱ्याने दिलेल्या माहितीनुसार, पंतप्रधान मोदी हे भारतातील एकमेव नेते आहेत, ज्यांनी पक्षाचे नेते म्हणून सलग सहा निवडणुका जिंकल्या आहेत. यात २००२, २००७ आणि २०१२ च्या गुजरात विधानसभा निवडणुका, तसेच २०१४, २०१९ आणि २०२४ च्या राष्ट्रीय निवडणुकांचा समावेश आहे.