Footwear Odor Removal Tips: कधी तुमच्यासोबत असं घडलंय का की तुम्ही एखाद्या मित्राच्या घरी गेले आहात किंवा एखाद्या महत्त्वाच्या मीटिंगमध्ये पोहोचले आहात आणि तुम्ही तुमचे शूज काढताच तिथे एक विचित्र घाणेरडा वास पसरला, ज्यामुळे तुम्हाला कमालीची लाज वाटली? पावसाळ्याच्या दिवसांत या समस्येचा मोठ्या प्रमाणात सामना करावा लागतो. कारण या दिवसात हवेतील दमटपणा खूप वाढतो. जेव्हा आपले पाय घामाने ओले होतात किंवा शूजमध्ये पावसाचे पाणी जाते, तेव्हा बुटांमध्ये बॅक्टेरिया तयार होतात. याच बॅक्टेरियांमुळे बुटांना भयंकर घाणेरडा वास येतो.जर तुम्हीही या समस्येचा सामना करत असाल तर अजिबात काळजी करू नका. किचन आणि घरात उपलब्ध असणाऱ्या काही गोष्टींचा वापर करून तुम्ही या समस्येपासून सुटका मिळवू शकता. चला तर मग जाणून घेऊया सोप्या टिप्स.
फुटवेअरला येणारी दुर्गंध दूर करण्यासाठी सोपे घरगुती उपाय
1. संत्र्याची किंवा लिंबाची सुकी साल (Orange or Lemon Peels)
लिंबूवर्गीय फळांच्या (Citrus fruits) सालीमध्ये नैसर्गिक सुगंधी तेल आणि अँटी-बॅक्टेरियल घटक असतात. संत्री किंवा लिंबू खाल्ल्यानंतर त्यांची साल कचऱ्यात फेकून न देता सुकवून घ्या. रात्री झोपताना या सुकलेल्या साली शूजच्या आत ठेवून द्या. रात्रभरात या साली शूजमधील दुर्गंधी शोषून घेतील आणि सकाळी शूजमधून फ्रेश सुवास येईल.
2. व्हिनेगर स्प्रे (White Vinegar Spray)
व्हिनेगरमध्ये असणारे ॲसिड दुर्गंधी निर्माण करणाऱ्या बॅक्टेरियांचा नाश करते. एका स्प्रे बॉटलमध्ये समप्रमाणात पांढरे व्हिनेगर (White Vinegar) आणि पाणी एकत्र करा. शूज वापरून झाल्यानंतर त्यांच्या आत या मिश्रणाचा हलका स्प्रे करा आणि शूज सुकू द्या. यामुळे बुटांमधील बॅक्टेरिया लगेच मरतात आणि वास येणे बंद होते. (टीप: लेदरच्या शूजवर याचा वापर करणे टाळावे).
(नक्की वाचा: पावसाळ्यात सांधेदुखी,अंग आखडण्याच्या समस्येने हैराण आहात? निरोगी आरोग्यासाठी डॉ धामणकरांनी सांगितल्या 8 टिप्स)
3. लवंग आणि कापूर (Cloves and Camphor)
लवंग आणि कापूर हे दोन्ही त्यांच्या तीव्र सुवास आणि जंतुनाशक गुणधर्मांसाठी ओळखले जातात. चार ते पाच लवंग आणि कापराच्या दोन ते तीन वड्या एका सुती कापडात किंवा टिश्यू पेपरमध्ये बांधून त्याची छोटी पोटली बनवा. ही पोटली शूजमध्ये ठेवा. कापूर शूजमधील ओलसरपणा शोषून घेईल आणि लवंग बॅक्टेरिया वाढू देणार नाही, ज्यामुळे शूज फ्रेश राहतील.
4. कडुनिंबाची सुकी पाने (Dry Neem Leaves)
कडुनिंब हा नैसर्गिक जंतुनाशक (Antiseptic) म्हणून ओळखला जातो. कडुनिंबाची काही पाने सुकवून घ्या आणि ती रात्री शूजच्या आत पसरवून ठेवा. ही पाने शूजमधील बॅक्टेरिया आणि फंगस (बुरशी) पूर्णपणे नष्ट करतात. विशेषतः पावसाळ्यात पाय इन्फेक्शनपासून वाचवण्यासाठी आणि बुटांचा सडलेला वास घालवण्यासाठी हा सर्वात सुरक्षित आणि आयुर्वेदिक उपाय आहे.
(Disclaimer: NDTV Marathi या माहितीची जबाबदारी घेत नाही किंवा दावाही करत नाही. अधिक माहितीसाठी संबंधित क्षेत्रातील तज्ज्ञांचा सल्ला घ्यावा.)
Track Latest News Live on Marathi.NDTV.com and get news updates from India and around the world
