Tulsi Vivah 2025 Date And Muhurat: कार्तिक महिन्यातील शुक्लपक्षाची द्वादशी तिथी अतिशय शुभ मानली जाते. कारण सुख-समृद्धीचा आशीर्वाद मिळावा, यासाठी लोक तुळशी विवाह सोहळ्याचे विधीवत आयोजन करतात. या दिवशी धनाची देवी लक्ष्मीमातेचे प्रतीक मानल्या जाणाऱ्या तुलसी माता आणि भगवान श्री विष्णू यांच्या शाळिग्रामशी विवाह लावून देण्याची परंपरा जपली जाते. मान्यतेनुसार तुळशी विवाहची पूजा विधीवत केल्यास वर्षभर वैवाहिक जीवन आनंदी होते, असे म्हणतात. यंदा तुलसी विवाह कधी आहे, शुभ मुहूर्त, तिथी, पूजेची सामग्री याबाबत सविस्तर माहिती जाणून घेऊया...
तुळशी विवाह 2025 तिथी कालावधी | Tulsi Vivah 2025 Kartik Dwadashi Tithi Start Time And Time
पंचांगानुसार कार्तिक महिन्यातील शुक्लपक्षाच्या द्वादशी तिथीला 2 नोव्हेंबर 2025 रोजी सकाळी 07:31 वाजता सुरू होणार असून दुसऱ्या दिवशी 3 नोव्हेंबर 2025 रोजी सकाळी 05:07 वाजता तिथी समाप्त होईल. यानुसार 2 नोव्हेंबर 2025 रोजी तुलसी विवाह संपन्न केला जाईल.
तुलसी विवाह 2025 : जुळून आलेले योग | Tulsi Vivah 2025 Shubh Yog
- पंचांगानुसार या दिवशी 2 नोव्हेंबर 2025 रोजी सकाळी 07:31 वाजेपासून ते संध्याकाळी 05:03 वाजेपर्यंत त्रिपुष्कर योग जुळून आलाय.
- 2 नोव्हेंबर 2025 रोजी संध्याकाळी 05:03 वाजेपासून ते दुसऱ्या दिवशी 3 नोव्हेंबर 2025 सकाळी 06:07 वाजेपर्यंत सर्वार्थसिद्ध योग आहे.
कार्तिकी द्वादशी तिथीपासून ते कार्तिक पौर्णिमा या काळादरम्यान तुळशीचा विवाह संध्याकाळी गोरज मुहूर्तावर साजरा केला जातो. बहुतांश लोक कार्तिक महिन्यातील द्वादशी तिथीला तुलसी विवाहचे आयोजन करतात.
तुलसी विवाह 2025 पूजा सामग्री | Tulsi Vivah 2025 Puja Samagri
तुळशीचे रोप, चार ऊस, बोरे, चिंचा, विड्याची पाने, सुपाऱ्या, खारीक, बदाम, फुले-फलं, बाळकृष्णाची मूर्ती, हळद-कुंकू, पळी, ताम्हण, फुलपात्र, आंतरपाटासाठी कापड, हळकुंड, फराळ, अष्टगंध, अक्षता, जानवे जोडे, लाह्या, तूप, धूप-अगरबत्ती, दिवा, प्रसाद, पंचामृत, इत्यादी.
तुळशीसाठी सौभाग्य अलंकार
मणी-मंगळसूत्र, जोडवे-विरोदे, हिरव्या रंगाच्या बांगड्या, करंडा, कंगवा, नवी वस्त्र, हार, घंटा इत्यादी
तुलसी विवाह 2025 पूजा विधी| Tulsi Vivah 2025 Puja Vidhi
- प्रथम तुळशीची कुंडी गेरुने रंगवून सुशोभित करावी.
- पाटावर तुळशी रोप ठेवावे, तुळशीभोवती रांगोळी काढावी.
- तुळशीला हळद-कुंकू अर्पण करा.
- नवीन वस्त्राने तुळशीची कुंडी सजवावी.
- हार, फुले, साडी नेसवून, मंगळसूत्र, नथ, खणा-नारळ सौभाग्य अलंकाराने ओटी भरावी.
- तुळशीमध्ये ऊसाचा तुकडा (शेंड्याकडील पानाचा) चिंच, आवळा ठेवतात नंतर तुळशीची पूजा करून नैवेद्य दाखवावा.
- आंतरपाट धरून मंगलाष्टके म्हणून विवाह लावावा.
- यानंतर आरती, प्रार्थना करून प्रसादाचे वाटप करावे.
तुळशी विवाहाचे धार्मिक महत्त्व | Tulsi Vivah 2025
- मान्यतेनुसार तुळशी विवाहाचा दिन अतिशय शुभ असतो कारण या दिवशी भगवान श्री विष्णू चार महिन्यांच्या योगनिद्रेतून जागे होतात आणि यानंतर शुभ कार्यांना सुरुवात केली जाते.
- तुळशी विवाहाचा सण काही महिला सुखी वैवाहिक जीवनासाठी तर काहीजणी पतीच्या दीर्घायुष्यासाठी साजरा करतात.
(नक्की वाचा: Tulsi Vivah 2025: तुलसी विवाह कधी आहे? सणानिमित्त हातांवर काढा सुंदर मेंदी, पाहा खास डिझाइन)
(Disclaimer: NDTV Marathi या माहितीची जबाबदारी घेत नाही किंवा दावाही करत नाही. अधिक माहितीसाठी संबंधित क्षेत्रातील तज्ज्ञांचा सल्ला घ्यावा.)
