आकाश सावंत, प्रतिनिधी
Beed News : बीड जिल्ह्यात ऊस उत्पादक शेतकऱ्यांच्या आंदोलनाने निर्णायक वळण घेतलं असून परिस्थिती आणखी चिघळली आहे. भाववाढीच्या मागणीसाठी गेल्या महिनाभरापासून सुरु असलेल्या आंदोलनाने आता तीव्र स्वरूप धारण केलं आहे. शेतकऱ्यांनी “कोयता बंद, वाहतूक बंद, कारखाना बंद” अशी घोषणा देत ऊस तोडणी आणि वाहतूक पूर्णपणे रोखून धरली आहे.
भाववाढीच्या मागणीसाठी शेतकरी आक्रमक...
शेतकऱ्यांची ठाम मागणी — पहिली उचल ३ हजार रुपये, तर अंतिम दर ४ हजार रुपये प्रति टन करावा. या मागणीसाठी अनेक बैठका झाल्या, आंदोलने झाली, पण तोडगा न निघाल्याने शेतकऱ्यांचा संताप उसळला आहे. त्याआधी शेतकऱ्यांनी गावागावात आंदोलन छेडले. टायर पेटवून रास्ता रोको केला आणि दोन वेळा माजलगाव येथे राष्ट्रीय महामार्ग रोखून धरला. कारखानदार आणि शेतकरी प्रतिनिधींमध्ये झालेली बैठक निष्फळ ठरल्याने संघर्ष आणखी तीव्र झाला आहे.
नक्की वाचा - Sugar Price : 7 वर्षांनंतर साखरेचे दर वाढणार, केंद्र सरकारचा शेतकऱ्यांसाठी खास 'प्लॅन', कारखान्यांनाही फायदा
३ मोठे साखर कारखाने बंद...
सध्या बीड जिल्ह्यातील तीन मोठे साखर कारखाने आणि तीन गुळ निर्मिती युनिट बंद पडली आहेत. यात आमदार प्रकाश सोळंके यांच्या सुंदरराव सोळंके कारखान्याचा, मोहन जगताप यांच्या छत्रपती सहकारी साखर कारखान्याचा आणि जय महेश खासगी साखर कारखान्याचा समावेश आहे. तसेच तीन मोठ्या गुळ कारखान्यांसह लहान उद्योगही ठप्प झाले आहेत. युवा शेतकरी संघर्ष समितीच्या कार्यकर्त्यांनी वाहतूक थांबवण्यासाठी रात्रीदेखील पहारा ठेवण्यास सुरुवात केली आहे. कडाक्याच्या थंडीतही शेतकरी रस्त्यावर ठामपणे उभे आहेत.
दरम्यान, या संघर्षावर लवकर निर्णय न झाल्यास पुढील दिवसांत आंदोलकांचा स्वर आणखी आक्रमक होण्याची शक्यता व्यक्त केली जात आहे. सरकार किंवा कारखानदारांनी तोडगा काढला नाही तर संपूर्ण जिल्ह्यात गाळप हंगाम ठप्प पडण्याची भीती निर्माण झाली आहे.
