Rahul Gandhi Speech : पहलगाममध्ये झालेला दहशतवादी हल्ला आणि त्यानंतरचे ऑपरेशन सिंदूर अभियान यावर संसदेत चर्चा सुरु आहे. लोकसभेत या चर्चेला सोमवारी चर्चा झाली. त्यानंतर आज (मंगळवार, 29 जुलै 2025) देखील या विषयावर दोन्ही बाजूंच्या खासदारांमध्ये जोरदार वाद झाला. विरोधी पक्षनेते राहुल गांधी (Rahul Gandhi) यांनीही या चर्चेत भाग घेतला. त्यांनी या चर्चेत मोदी सरकारवर हल्ला करत पंतप्रधानांना आव्हान दिलं.
पंतप्रधानांना आव्हान
राहुल गांधी यांनी पंतप्रधान नरेंद्र मोदींना आव्हान देत म्हटले की, अमेरिकेचे माजी राष्ट्राध्यक्ष डोनाल्ड ट्रम्प आत्मसमर्पण आणि युद्धविरामाबद्दल (ceasefire) खोटे बोलत असतील, तर पंतप्रधानांनी स्पष्टपणे सांगितले पाहिजे की ट्रम्प खोटे बोलत आहेत. राहुल गांधींनी दावा केला की, ट्रम्प यांनी 29 वेळा सांगितले की त्यांनी भारत-पाकिस्तानमध्ये युद्धविराम घडवून आणला. हे खरे नसेल, तर सरकार गप्प का आहे, असा सवाल त्यांनी उपस्थित केला.
( नक्की वाचा : Rajnath Singh: 'ऑपरेशन सिंदूर का थांबवलं? ', संरक्षणमंत्र्यांनी सांगितलं नेमकं कारण )
परराष्ट्र धोरणावर प्रश्नचिन्ह
राहुल गांधी म्हणाले, "पहलग्राम हल्ल्यानंतर कोणत्याही देशाने पाकिस्तानचा निषेध केला नाही. याचा अर्थ काय?" त्यांनी असाही आरोप केला की, ट्रम्प यांनी दहशतवादी हल्ल्यांचा आरोपी असलेल्या मुनीरसोबत रात्रीचे जेवण (dinner) केले आणि नियमांचे उल्लंघन केले. ते म्हणाले, "ज्याने दहशतवादी हल्ले घडवून आणले, तो ट्रम्पसोबत भोजन करत आहे."
राहुल गांधींनी सरकारला विचारले, "पुढचा दहशतवादी हल्ला झाला तर तुम्ही काय कराल? पुन्हा युद्ध कराल का?" हा सरकारचा परराष्ट्र धोरणाचा (foreign policy) पराभव असल्याचा आरोप त्यांनी केला. ते म्हणाले की, भारत सरकारने विचार केला की ते पाकिस्तानशी युद्ध करत आहेत, परंतु जेव्हा युद्ध सुरू झाले तेव्हा कळले की हा संघर्ष पाकिस्तानसोबतच चीनसोबतही आहे. चीन पाकिस्तानला युद्धाशी संबंधित सर्व माहिती देत असल्याचा दावा त्यांनी केला.
( नक्की वाचा : S. Jaishankar : 193 पैकी फक्त 3 देश... परराष्ट्र मंत्र्यांनी ऑपरेशन सिंदूर'बाबत सर्व सांगितलं )
इंदिरा गांधींनी स्वातंत्र्य दिलं होतं....
लोकसभेत विरोधी पक्षनेते राहुल गांधी यांनी सांगितले की, इंदिरा गांधींनी जनरल माणेकशॉ यांना पूर्ण स्वातंत्र्य दिले होते, तेव्हा 1 लाख पाकिस्तानी सैनिकांनी आत्मसमर्पण केले होते. ते म्हणाले की, आज दोन देशांमध्ये संघर्षाची परिस्थिती आहे, परंतु संरक्षण मंत्र्यांनी पाकिस्तानला सांगितले की 'आम्ही एक थप्पड मारली आहे, आता आणखी मारणार नाही'. राहुल गांधींनी आरोप केला की यामुळे भारतीय वैमानिकांचे हात बांधले गेले आणि हवाई संरक्षण प्रणालीवर हल्ला न करण्याची सूचना देण्यात आली. ते म्हणाले की, आपण जी लढाऊ विमाने गमावली, ती आपल्या राजकीय नेतृत्वाच्या मर्यादांमुळे गमावली. त्यांनी प्रश्न विचारला की, 'विमानं खाली का पडली? काय चुका झाल्या?'
लोकसभेत ऑपरेशन सिंदूर (Operation Sindoor) वर चर्चा करताना विरोधी पक्षनेते आणि काँग्रेस खासदार राहुल गांधी म्हणाले की, ज्या क्षणी ऑपरेशन सिंदूर सुरू झाले, किंबहुना त्याआधीच, विरोधी पक्षाने हा संकल्प केला होता की ते सेना आणि भारताच्या निवडून आलेल्या सरकारसोबत खंबीरपणे उभे राहतील.
राहुल गांधी म्हणाले, 'एका पतीला त्याच्या पत्नीसमोर गोळी मारण्यात आली. हे खूप वेदनादायक आहे. प्रत्येक भारतीयाला याचे दुःख जाणवते. जे काही घडले ते चुकीचे होते. आपण राजकीय कामांसाठी देशभरात फिरतो, पण सेना देशासाठी लढायला आणि मरायला तयार असते. जर तुम्हाला सेनेचा वापर करायचा असेल, तर त्यांना पूर्ण स्वातंत्र्य द्यावे लागेल. वाघाला (Tiger) मोकळीक द्यावी लागते.'
