मुंबई महानगरपालिकेने 10 वर्षांनंतर पहिल्यांदाच 2025-26 साठी मालमत्ता कराचे दर वाढवले आहेत. मालमत्ता कर दरवाढीचा थेट परिणाम मुंबईतील 9 लाखांहून अधिक मालमत्ता मालकांवर झाला आहे. मुंबई महापालिकेने दावा केला की, मालमत्ता करात जास्तीत जास्त वाढ ही फक्त 15 टक्के आहे. परंतु अनेक भागात नागरिकांना 23 टक्के ते 40 टक्क्यांपर्यंत वाढीसह कर बिले मिळाली आहेत.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
मालमत्ता कर वाढीचं कारण
करवाढीचे मुख्य कारण मार्च 2025 मध्ये रेडी रेकनर दरांमध्ये सरासरी 3.88 टक्के वाढ झाल्याचे म्हटले जात आहे. ज्याच्या आधारे मालमत्ता कर निश्चित केला जातो. मात्र 500 चौरस फुटांपेक्षा लहान घरांना या दरवाढीतून पूर्णपणे वगळण्यात आले आहे, ज्यामुळे सुमारे 3.6 लाख नागरिकांवर या मालमत्ता कर वाढीचा काहीही परिणाम होणार नाही.
(नक्की वाचा- Devendra Fadnavis: 'धारावीचा आत्मा जपत होणार समृद्ध भविष्याकडे वाटचाल', फडणवीसांनी केले स्पष्ट)
परंतु या वाढीला तीव्र राजकीय विरोध होत आहे. सर्वोच्च न्यायालयाच्या आदेशाला न जुमानता मुंबई महापालिकेने जुनी कर पद्धत सुरू ठेवल्याचा आरोप अनेक माजी नगरसेवक आणि काँग्रेस नेत्यांनी केला आहे. जर नवीन प्रणाली लागू केली असती तर कर दर 40 टक्क्यांपर्यंत कमी करता आले असते, असा दावा विरोधकांनी केला आहे.
मुंबई महापालिकेने यावर्षी 5200 कोटी मालमत्ता कर महसूल गोळा करण्याचे उद्दिष्ट ठेवले आहे, जे गेल्या वर्षीइतकेच आहे. परंतु कर दरात वाढ झाल्यामुळे सामान्य जनतेवर आर्थिक भार वाढला आहे. नागरिकांसाठी कर भरण्याची अंतिम तारीख 30 जून 2025 निश्चित करण्यात आली आहे.
(नक्की वाचा- - ऑपरेशन लग्नकार्य! हुंडा घेणारा कळवा 5000 मिळवा, 'या' राजकीय पक्षाचा भन्नाट उपक्रम)
नागरिकांनी वेळेवर कर भरल्यास सूट मिळू शकते, तर विलंब झाल्यास दंड आकारला जाईल. मुंबई महापालिकेने नागरिकांना बीएमसी पोर्टलवर जाऊन त्यांची माहिती अपडेट करण्याचे आणि केवायसी प्रक्रिया पूर्ण करण्याचे आवाहन केले आहे जेणेकरून त्यांना वेळेवर कर संबंधित माहिती मिळू शकेल.
