Pune News: पुणे पोलिसांनी शहरात अंमली पदार्थांच्या विरोधात सुरू असलेल्या मोहिमेत मोठे यश मिळवले आहे. शिवाजीनगर येथील दीनदयाळ मेमोरियल हॉस्पिटलच्या परिसरातील एका निर्जन रस्त्यावर उभ्या असलेल्या टेम्पोतून पोलिसांनी 3 लाख 38 हजार 880 रुपये किमतीच्या प्रतिबंधित अंमली गोळ्या जप्त केल्या आहेत. या कारवाईमुळे अंमली पदार्थ तस्करांचे मोठे जाळे उघड होण्याची शक्यता वर्तवली जात आहे.
गुप्त माहितीवरून पोलिसांनी लावला सापळा
शिवाजीनगर पोलीस ठाण्याचे सहाय्यक पोलीस निरीक्षक संतोष पाटील आणि त्यांचे पथक नियमित गस्तीवर असताना ही कारवाई करण्यात आली. पोलीस नाईक सचिन जाधव यांना एका खबऱ्याकडून माहिती मिळाली की, हॉस्पिटलजवळील एका निर्जन रस्त्यावर संशयास्पद टेम्पो उभा आहे. पोलिसांनी तात्काळ घटनास्थळी धाव घेत टेम्पोची पाहणी केली. टेम्पोच्या मागील बाजूचे दरवाजा उघडला असता, त्यात गोण्यांमध्ये प्रतिबंधित अंमली गोळ्यांची पाकिटे सापडली. या गोळ्यांना स्थानिक भाषेत 'बंट्या' (Bantya Pills) म्हणून ओळखले जाते.
(नक्की वाचा- Vinod Kambli: विनोद कांबळीच्या संघर्षाचा आईस्क्रीम कंपनीकडून सौदा? सोशल मीडियावर तीव्र संताप, काय आहे प्रकरण?)
पोलिसांनी या प्रकरणी विष्णू रामरतन गुप्ता याला अटक केली आहे. त्याच्याकडून एकूण 3,38,880 रुपये किमतीचा मुद्देमाल आणि टेम्पो जप्त करण्यात आला आहे. या तस्करीमध्ये आणखी काही मोठे मासे अडकले असण्याची शक्यता असून पोलीस अधिक तपास करत आहेत. 'द फ्री प्रेस जर्नल' ने याबाबतचं वृत्त प्रसिद्ध केलं आहे.
'फुलचंद पान' आणि अंमली पदार्थांचे धक्कादायक कनेक्शन
पोलीस उपायुक्त ऋषिकेश रावळे यांनी या कारवाईबाबत अत्यंत महत्त्वाची माहिती दिली. त्यांनी सांगितले की, "अटक केलेल्या या प्रतिबंधित गोळ्यांचा वापर अलीकडे पुण्यातील काही भागांत 'फुलचंद पान' तयार करण्यासाठी केला जात असल्याचे समोर आले आहे. यामुळे स्थानिक बाजारपेठेत या गोळ्यांची मागणी वाढली असून ही चिंतेची बाब आहे."
