पुणे शहराच्या तंत्रज्ञान आणि रिटेल क्षेत्रासाठी एक मोठी आणि महत्त्वाची बातमी समोर आली आहे. तंत्रज्ञान विश्वातील दिग्गज कंपनी ॲपल लवकरच पुण्यात आपले पहिले अधिकृत स्टोअर सुरू करणार आहे. कोरेगाव पार्क येथील कोपा (KOPA) मॉलमध्ये हे भव्य स्टोअर उभारले जात असून, या वर्षाच्या सप्टेंबर महिन्याच्या सुरुवातीलाच म्हणजेच 4 सप्टेंबर रोजी ते ग्राहकांसाठी खुले होणार आहे. सुमारे 10,000 चौरस फूट एवढ्या मोठ्या जागेत हे स्टोअर विस्तारले आहे, जे ग्राहकांना एक सर्वसमावेशक आणि आधुनिक खरेदीचा अनुभव देईल.
नक्की वाचा: टॅरिफ वॉरचा फटका! भारत सरकारचा मोठा निर्णय; अमेरिका पोस्ट सेवा बंद, वाचा नवे नियम
या स्टोअरचे उद्घाटन होणे हे केवळ पुणे शहरासाठीच नव्हे, तर ॲपलच्या भारतीय बाजारपेठेतील धोरणात्मक विस्ताराचेही प्रतीक आहे. हे स्टोअर मुंबई आणि दिल्लीनंतर भारतातील चौथे अधिकृत रिटेल केंद्र ठरेल. याव्यतिरिक्त, कंपनीची बंगळूरू येथेही पाचवे स्टोअर सुरू करण्याची योजना आहे. या विस्तारातून हे स्पष्ट होते की ॲपल आता केवळ महानगरांपुरते मर्यादित न राहता, भारतातील इतर प्रमुख शहरांमध्येही आपली पोहोच वाढवण्याचा प्रयत्न करत आहे.
नक्की वाचा: गणेश चतुर्थीनिमित्त पुण्यात वाहतूक मार्गात मोठे बदल, पर्यायी मार्ग कोणते?
या स्टोअरमध्ये ॲपलची सगळ्या उत्पादनांची रेंज उपलब्ध असेल, ज्यात अत्याधुनिक आयफोन्स, मॅकबुक्स, ॲपल वॉच, एअरपॉड्स आणि इतर ॲक्सेसरीजचा समावेश आहे. ग्राहकांना उत्पादनांची निवड करण्यासाठीच्या सहाय्यतेसोबतच, ॲपलच्या तज्ज्ञांकडून मार्गदर्शन आणि तांत्रिक सहाय्य देखील मिळेल. या स्टोअरच्या उद्घाटनासाठी अमेरिकेतील ॲपल कंपनीचे वरिष्ठ अधिकारी उपस्थित राहण्याची शक्यता आहे. ॲपलच्या उत्पादनांना महाराष्ट्रातील प्रमुख शहरांमध्ये मोठी मागणी आहे. मुंबईपाठोपाठ पुण्यातही ॲपलचे स्टोअर सुरू होत असल्याने महाराष्ट्रातील इतर प्रमुख शहरांमध्येही अशाच पद्धतीने ॲपल स्टोअर येत्या काही वर्षांत सुरू होण्याची शक्यता नाकारता येत नाही.
