Kalyan Station Viral News : मुंबई लोकलमध्ये विनातिकीट किंवा बोगस पासचा वापर करून प्रवास करणाऱ्यांची संख्या दिवसेंदिवस वाढत असल्याचं पाहायला मिळत आहे. कारण कल्याण स्टेशनवर नुकताच एक धक्कादायक प्रकार उघडकीस आला आहे. या घटनेमुळं रेल्वे प्रशासनासह प्रवाशांनाही आश्चर्याचा धक्का बसला आहे. येथे रेल्वे पोलिसांनी एका महिलेला एसी लोकलचा बोगस पाससह पकडले. ही महिला एका खासगी बँकेत चांगल्या पदावर नोकरी करत असल्याचं समोर आल्यानं अनेकांच्या भुवया उंचावल्या आहेत. गुडिया ओमकार शर्मा (28) असं या महिलेचं नाव आहे. ती एका बँकेत सेल्स मॅनेजर म्हणून काम करते. जवळपास एक लाख रुपये मासिक पगार असूनही ती अनेक महिन्यांपासून बोगस पास दाखवून एसी लोकलमध्ये प्रवास करत होती. महिलेचा पती ओमकार आनंदी शर्मा (30) तिला यामध्ये मदत करायचा.
पास UTS App मध्ये असल्याचा दावा केला, पण..
मिळालेल्या माहितीनुसार, 26 नोव्हेंबर रोजी एसी लोकलमध्ये तिकीट तपासणीदरम्यान टीटीआय विशाल तुकाराम नवले यांना महिलेने दाखवलेला डिजिटल पास संशयास्पद वाटला. महिलेने आपला सीझन पास UTS अॅपमध्ये असल्याचा दावा केला, पण प्रत्यक्षात तो पास गूगल क्रोम ब्राउझरमध्ये उघडलेला होता आणि त्यावर QR कोडही नव्हता, जो कोणत्याही खऱ्या डिजिटल पासचा सर्वात महत्त्वाचा भाग असतो. पास क्रमांकाची तपासणी केल्यावर समजले की, हा पास ओमकार शर्मा यांच्या नावावर आहे आणि त्याची वैधता तर फेब्रुवारी 2025 मध्येच संपली होती. पुढे व्हॉट्सअॅप डेटाची तपासणी केल्यावर स्पष्ट झाले की संपूर्ण पासच बनावट आहे.
नक्की वाचा >> रॅपिडो बाईकवर प्रवासाला निघाली, तरुणीसोबत रस्त्यातच घडली भयंकर घटना..Viral Video पाहून सर्वच थक्क
चौकशीत उघड झाले, ‘पास माझ्या पतीने बनवला'
महिलेची डोंबिवली स्टेशनवर उतरवून चौकशी सुरू झाली, तिने लगेच कबूल केले की बोगस पास तिच्या पतीने तयार केला आहे. त्यानंतर ओमकार शर्मा यांनाही ताब्यात घेण्यात आले आणि त्यांनीही कबुल केले की त्यांनी हा पास कोडिंग, AI आणि ChatGPT सारख्या टूल्सच्या मदतीने तयार केला.
फक्त पत्नीच नाही, तर अनेक..
चौकशीत आणखी एक मोठा खुलासा झाला की ओमकार शर्मा फक्त पत्नीची मदत करत नव्हता. त्याच्या मोबाईलमधून 10 आणखी बोगस पास सापडले. जे त्याने वेगवेगळ्या लोकांना पाठवले होते. म्हणजेच प्रकरण खूप मोठे होते आणि तो बेकायदा ‘पास जनरेट' करण्याचा एक चॅनल चालवत होता.
