आधुनिक आणि नियोजनबद्ध शहर म्हणून ओळखल्या जाणाऱ्या नवी मुंबईत अल्पवयीन मुलांच्या सुरक्षिततेचा प्रश्न पुन्हा एकदा ऐरणीवर आला आहे. नेरूळ पोलीस ठाण्यात एका 10 वर्षांच्या अल्पवयीन मुलावर लैंगिक अत्याचार, मानसिक छळ आणि धमकी दिल्याप्रकरणी POCSO कायदा 2012 अंतर्गत गंभीर गुन्हा दाखल करण्यात आला आहे. या घटनेमुळे पालकांमध्ये चिंतेचे आणि भीतीचे वातावरण निर्माण झाले आहे.
ऑक्टोबर 2024 पासून सुरू होता छळ
फिर्यादीने दिलेल्या माहितीनुसार, हा अत्यंत संतापजनक प्रकार ऑक्टोबर 2024 पासून सातारा जिल्ह्यातील कराड येथील कोपर्डे हवेली परिसरात घडत होता. आरोपींनी या अल्पवयीन मुलाला प्रेमसंबंधांचे आमिष दाखवून आणि धमकावून शारीरिक व मानसिक त्रास दिला. इतकेच नाही तर आरोपींनी कथित शारीरिक संबंधांचे व्हिडीओ, फोटो तयार करून ते सार्वजनिक करण्याची धमकी दिली होती. या ब्लॅकमेलिंगच्या भीतीपोटी पीडित मुलाने दीर्घकाळ ही बाब कोणालाही सांगितली नव्हती.
कायदेशीर कारवाई आणि पोलीस तपास
नेरूळ पोलिसांनी या प्रकरणी तक्रार प्राप्त होताच POCSO Act 2012: कलम 11 व 12 (लैंगिक छळ), Juvenile Justice Act 2015: कलम 75 व 77 (बालकांवरील क्रूरता आणि अमली पदार्थांचा वापर) तातडीने गुन्ह्याची नोंद केली आहे.
(नक्की वाचा- Navi Mumbai: नवी मुंबईतील खारघर आणि कोपरखैरणेतून पुन्हा दोन मुली बेपत्ता; आकडा 458 वर)
या प्रकरणात पीडिताचा जबाब 'ई-साक्ष' प्रणालीद्वारे नोंदवण्यात आला आहे, ज्यामुळे पीडित बालकाला सुरक्षित वातावरणात आपली बाजू मांडता आली. सध्या या प्रकरणाचा तपास पोलीस करत आहेत. मात्र, अद्याप या प्रकरणात कोणालाही अटक झालेली नसल्याने नागरिकांमध्ये संताप व्यक्त होत आहे.
नवी मुंबईत वाढती गुन्हेगारी - धोक्याची घंटा
मागील काही वर्षांत नवी मुंबईत अल्पवयीन मुला-मुलींवरील लैंगिक गुन्ह्यांमध्ये लक्षणीय वाढ झाली आहे. प्रामुख्याने खालील प्रकारच्या घटना वारंवार समोर येत आहेत.
1. सोशल मीडियाच्या माध्यमातून ओळख वाढवून होणारी फसवणूक.
2. प्रेमसंबंधांच्या नावाखाली अल्पवयीन मुलांचे लैंगिक शोषण.
3. व्हिडीओ आणि फोटोंच्या माध्यमातून केले जाणारे ब्लॅकमेलिंग.
4. अल्पवयीन मुले बेपत्ता होण्याचे वाढते प्रमाण.
या घटनेनंतर पालकांनी मुलांच्या सुरक्षिततेबाबत ठोस उपाययोजनांची मागणी केली आहे. मुलांच्या मोबाईल वापरावर पालकांनी नियंत्रण ठेवणे, शाळा आणि पालकांमध्ये नियमित संवाद असणे आणि संशयास्पद व्यक्तींवर लक्ष ठेवणे आता काळाची गरज बनली आहे. पोलिसांनी देखील केवळ गुन्हा घडल्यावर कारवाई करण्यापेक्षा प्रतिबंधात्मक उपाययोजनांवर भर द्यावा, अशी मागणी सामाजिक कार्यकर्त्यांनी केली आहे.
