अविनाश पवार, पुणे
What is AB Form: निवडणुकीच्या काळात वारंवार चर्चेत येणारा एक महत्त्वाचा शब्द म्हणजे AB फॉर्म. उमेदवारी अर्ज, चिन्ह वाटप आणि अधिकृत उमेदवार ठरवण्यामध्ये या फॉर्मची भूमिका अत्यंत निर्णायक असते. सर्वसामान्य मतदारांपासून ते राजकीय वर्तुळापर्यंत AB फॉर्मकडे विशेष लक्ष दिले जाते.
AB फॉर्म म्हणजे नेमकं काय?
AB फॉर्म हा राजकीय पक्षाकडून निवडणूक आयोगाला दिला जाणारा एक अधिकृत दस्तऐवज आहे. या फॉर्मद्वारे संबंधित पक्ष आपला अधिकृत उमेदवार कोण आहे, हे निवडणूक अधिकाऱ्यांना कळवतो. कोणत्याही पक्षाच्या वतीने निवडणूक लढवायची असल्यास हा फॉर्म अत्यावश्यक असतो.
AB फॉर्म का महत्त्वाचा आहे?
एखाद्या मतदारसंघातून एकाच पक्षाकडून अनेक इच्छुक उमेदवार अर्ज दाखल करू शकतात. अशा परिस्थितीत AB फॉर्म ज्याच्याकडे आहे, तोच त्या पक्षाचा अधिकृत उमेदवार मानला जातो. या फॉर्मच्या आधारेच उमेदवाराला पक्षाचे अधिकृत निवडणूक चिन्ह दिले जाते.
(नक्की वाचा- Pune Traffic: भीमा-कोरेगाव शौर्य दिनासाठी प्रशासन सज्ज, बुधवारपासून वाहतुकीत मोठे बदल, चेक करा पर्यायी मार्ग)
AB फॉर्ममध्ये कोणती माहिती असते?
या फॉर्ममध्ये राजकीय पक्षाचे नाव, अधिकृत उमेदवाराचे नाव, संबंधित मतदारसंघ, तसेच पक्षाच्या अधिकृत पदाधिकाऱ्याची सही असते. ही सही पक्षाध्यक्ष, प्रदेशाध्यक्ष किंवा निवडणूक आयोगाकडे नोंदणीकृत अधिकृत व्यक्तीची असणे आवश्यक असते.
AB फॉर्म नसेल तर काय होते?
जर उमेदवाराकडे AB फॉर्म नसेल, तर तो उमेदवार अपक्ष म्हणून निवडणूक लढवतो. अशा उमेदवाराला पक्षाचे चिन्ह, अधिकृत प्रचार आणि पक्षाचा अधिकृत पाठिंबा मिळत नाही.
(नक्की वाचा- वसईत खळबळ! प्रेयसीसोबत लॉजवर गेलेल्या विवाहित तरुणाचा अचानक मृत्यू, नेमकं काय घडलं?)
मतदारांसाठी AB फॉर्मचा अर्थ काय?
मतदारांना उमेदवाराच्या नावासमोर दिसणारे पक्षाचे चिन्ह हे त्या उमेदवाराकडे वैध AB फॉर्म असल्याचे द्योतक असते. त्यामुळे मतदारांना कोणता उमेदवार खरोखरच त्या पक्षाचा अधिकृत उमेदवार आहे, हे समजते.
थोडक्यात सांगायचं तर, AB फॉर्म हा उमेदवार आणि राजकीय पक्ष यांच्यातील अधिकृत नात्याचा पुरावा आहे. निवडणूक प्रक्रियेत पारदर्शकता आणि शिस्त राखण्यासाठी या फॉर्मचे महत्त्व अत्यंत मोठे आहे.
