Jodhpur School Teacher Suicide: राजस्थानमधील जोधपूर जिल्ह्यात एक अत्यंत दुर्दैवी आणि हृदयद्रावक घटना घडली आहे. येथील डांगियावास पोलीस स्टेशनच्या हद्दीतील सरनाडा गावात एका 32 वर्षांच्या शिक्षिकेने आपल्या तीन वर्षांच्या चिमुकल्या मुलीसह स्वतःला जाळून घेतले. या घटनेत मुलीचा जागीच मृत्यू झाला, तर दुसऱ्या दिवशी उपचारादरम्यान आईचाही मृत्यू झाला. या प्रकरणी, मृत महिलेच्या माहेरच्यांनी तिच्या सासरच्या मंडळींवर हुंड्यासाठी छळ करून आत्महत्येसाठी प्रवृत्त केल्याचा आरोप केला आहे.
काय आहे प्रकरण?
संजू बिश्नोई नावाच्या 32 वर्षीय स्कूल शिक्षिकेने शुक्रवारी दुपारी शाळेतून लवकर घरी परतल्यानंतर स्वतःला आणि आपली तीन वर्षांची मुलगी यशस्वीला पेट्रोल टाकून पेटवून घेतले. ही घटना घडली तेव्हा घरात कोणीही नव्हते. घरातून धूर निघताना पाहून शेजारच्यांनी आणि नातेवाईकांनी तात्काळ घटनास्थळी धाव घेतली. तात्काळ दोघांनाही रुग्णालयात दाखल करण्यात आले, परंतु यशस्वीचा जागीच मृत्यू झाला. संजूवर उपचार सुरू असताना शनिवारी सकाळी तिनेही अखेरचा श्वास घेतला.
( नक्की वाचा : Love Story : '15 दिवस नवऱ्यासोबत, 15 दिवस प्रियकरासोबत...' 10 वेळा पळून गेलेल्या विवाहितेची अजब मागणी )
सासरच्या मंडळींवर गंभीर आरोप
या घटनेनंतर, संजूच्या माहेरच्यांनी, विशेषतः तिचे वडील ओमाराम बिश्नोई यांनी पोलिसांत तक्रार दाखल केली आहे. त्यांनी संजूचा पती दिलीप बिश्नोई, सासू, सासरे, पोलीस कॉन्स्टेबल असलेली तिची नणंद लीला आणि गणपत सिंह नामक व्यक्तीवर संजूचा हुंड्यासाठी छळ केल्याचा आणि तिला आत्महत्येसाठी प्रवृत्त केल्याचा आरोप केला आहे.
सुसाइड नोट आणि मोबाईल जप्त
पोलिसांनी घटनास्थळी एफएसएल टीमच्या मदतीने तपास केला असता, त्यांना एक सुसाइड नोट सापडली आहे. या चिठ्ठीत संजूने पती दिलीप, सासू, सासरे, नणंद आणि गणपत सिंह यांच्याकडून होणाऱ्या शारीरिक आणि मानसिक छळाचा उल्लेख केला आहे. पोलिसांनी संजूचा मोबाईल फोनही जप्त केला असून तो तपासणीसाठी पाठवण्यात आला आहे. त्यामध्ये काही व्हिडिओ रेकॉर्डिंग सापडण्याची शक्यता पोलिसांनी व्यक्त केली आहे.
घटनेनंतर संजूचा मृतदेह कोणाला द्यायचा यावरून सासरच्या आणि माहेरच्या मंडळींमध्ये वाद झाला. अखेर, पोलिसांनी मृतदेह माहेरच्या लोकांना सोपवला. त्यानंतर, एकाच वेळी आई आणि मुलीवर अंत्यसंस्कार करण्यात आले. पोलीस या प्रकरणाचा सखोल तपास करत असून, आरोपींवर कठोर कारवाई करण्याची मागणी करण्यात येत आहे.
| Helplines | |
|---|---|
| Vandrevala Foundation for Mental Health | 9999666555 or help@vandrevalafoundation.com |
| TISS iCall | 022-25521111 (Monday-Saturday: 8 am to 10 pm) |
| (If you need support or know someone who does, please reach out to your nearest mental health specialist.) | |
Track Latest News Live on Marathi.NDTV.com and get news updates from India and around the world
