विशाल पुजारी, प्रतिनिधी:
Kolhapur Crime: कोल्हापूरमधून एक धक्कादायक बातमी समोर आली आहे. प्रेमविवाहात मध्यस्थी केल्याच्या रागातून एका दांपत्यावर कोयत्याने खुनी हल्ला करण्यात आल्याची धक्कादायक घटना कबनूर ग्रामपंचायतसमोर घडली आहे. शनिवारी झालेल्या या हल्ल्यात पती-पत्नी गंभीर जखमी झाले असून, या प्रकरणी शिवाजीनगर पोलिसांनी चार अज्ञातांविरोधात गुन्हा दाखल केला आहे. हल्लेखोरांनी तोंडाला स्कार्फ बांधून हा हल्ला केला. या घटनेने परिसरात एकच खळबळ उडाली आहे.
पोलिसांनी दिलेल्या माहितीनुसार, कबनूर येथील प्रमोद शिंगे आणि अश्विनी शिंगे या दांपत्याने एका प्रेमविवाहात मध्यस्थी केली होती. याच गोष्टीचा राग मनात धरून काही अज्ञात व्यक्तींनी या दांपत्यावर हल्ला करण्याचे षडयंत्र रचले. शनिवारी कबनूर ग्रामपंचायतसमोर प्रमोद आणि अश्विनी त्यांच्या चारचाकी वाहनात असताना, तोंडाला स्कार्फ बांधून आलेल्या चार हल्लेखोरांनी अचानक त्यांच्यावर कोयत्याने वार करण्यास सुरुवात केली. हा हल्ला इतका भयानक होता की, हल्लेखोरांनी दांपत्यावर वार करून त्यांच्या गाडीचीही हत्यारांनी तोडफोड केली.
MP Crime: गरबा खेळणाऱ्या महिलेला उचललं, 6 जणांनी फरफटत नेलं, अपहरणाचा LIVE थरार|पाहा VIDEO
या हल्ल्यात प्रमोद शिंगे आणि त्यांची पत्नी अश्विनी शिंगे गंभीर जखमी झाले आहेत. हल्लेखोरांनी केलेल्या वारामुळे प्रमोद यांच्या हाताची बोटे तुटून बाजूला पडली होती. हल्ल्याची माहिती मिळताच शिवाजीनगर पोलिसांनी घटनास्थळी धाव घेतली. पोलिसांनी घटनास्थळावरून हल्ल्यासाठी वापरलेली तीन हत्यारे जप्त केली आहेत. तसेच, प्रमोद यांचे तुटलेले बोटही घटनास्थळी सापडले.
पोलिसांनी जखमी दांपत्याला तातडीने उपचारासाठी रुग्णालयात दाखल केले आहे. सध्या त्यांची प्रकृती स्थिर असल्याचे सांगण्यात आले आहे. या प्रकरणाचा अधिक तपास शिवाजीनगर पोलीस करत असून, हल्लेखोरांचा शोध घेण्यासाठी पथके रवाना करण्यात आली आहेत. प्रेमविवाहासारख्या वैयक्तिक कारणामुळे झालेल्या या क्रूर हल्ल्याने समाजात चिंतेचे वातावरण निर्माण झाले आहे.
Track Latest News Live on Marathi.NDTV.com and get news updates from India and around the world
