Pune News : गणेश विसर्जन पूर्वसंध्येला पुणे हादरलं; नाना पेठेत गँगवॉर, कुख्यात आरोपीच्या मुलाचा खून

रेवती हिंगवे, प्रतिनिधी

Pune Gang War: शनिवारी (6 सप्टेंबर) होणाऱ्या गणेश विसर्जनाचे वेध आता सर्वांना लागले आहेत. विसर्जन मिरवणुकीत कोणताही अनुचित प्रकार घडू नये म्हणून राज्यभर पोलिसांना दक्षतेच्या सुचना दिल्या आहे. पुण्यातील विसर्जन मिरवणूक ही विशेष लक्षवेधी असते. या मिरवणुकीमध्ये मोठी गर्दी होत असल्यानं अनुचित प्रकार रोखण्यासाठी शहरात मोठा बंदोबस्त असतो. पण, गणपती विसर्जनाच्या पूर्वसंध्येला पुण्यात गँगवॉरची घटना घडली आहे. त्यामध्ये एकाचा मृत्यू झालाय.

पुण्याच्या नाना पेठ परिसरात गँगवॉरची घटना घडली. या घटनेत हल्लेखोरांनी केलेल्या गोळीबारात एका तरुणाचा मृत्यू झाला. मृत तरुणाची ओळख गोविंद कोमकर अशी पटली असून, तो एक वर्षापूर्वी झालेल्या वनराज आंदेकर खून प्रकरणातील आरोपी गणेश कोमकर याचा मुलगा आहे.

( नक्की वाचा : Pune News : पुणे गणेश विसर्जन मिरवणुकीची जय्यत तयारी; मानाच्या गणपतींच्या वेळापत्रकासह नियमावली जाहीर )
 

काय आहे प्रकरण?

ही घटना शुक्रवारी (5 सप्टेंबर) रात्रीच्या वेळी नाना पेठ भागात घडली. अज्ञात हल्लेखोरांनी गोविंद कोमकर याच्यावर अंदाजे तीन गोळ्या झाडल्या. गोळ्या लागल्यामुळे तो गंभीर जखमी झाला आणि त्याचा जागीच मृत्यू झाल्याची प्राथमिक माहिती पोलिसांनी दिली आहे. या हत्येमुळे परिसरात तणावपूर्ण आणि भीतीचे वातावरण निर्माण झाले आहे.

गोविंदचा वडील गणेश कोमकर हा राष्ट्रवादी काँग्रेसचे माजी नगरसेवक वनराज आंदेकर यांच्या खून प्रकरणातील आरोपी आहे. त्यामुळे, या घटनेचा संबंध जुन्या वैमनस्यातून झाला असावा असा संशय पोलिसांनी व्यक्त केला आहे.

( नक्की वाचा : Pune News : पुण्यातील वाहतूक व्यवस्थेत मोठा बदल, गणेश विसर्जन मिरवणुकीसाठी शहरातील 15 रस्ते बंद )
 

पोलिसांची कारवाई

या घटनेची माहिती मिळताच पोलिसांनी तात्काळ घटनास्थळी धाव घेतली आणि तपास सुरू केला. पोलिसांनी या प्रकरणी गुन्हा दाखल केला असून काही संशयितांना ताब्यात घेतले आहे. पुढील तपास सुरू असून लवकरच या प्रकरणातील आरोपींना अटक केली जाईल, अशी शक्यता आहे.

गणेशोत्सवाच्या कालावधीमध्ये झालेल्या या गँगवॉरच्या घटनेमुळे पुण्यात एकच खळबळ उडाली आहे.