Rana Ayyub : 'The Washington Post'च्या पत्रकार राणा अय्यूब यांना जीवे मारण्याची धमकी; नवी मुंबईत गुन्हा दाखल

Rana Ayyub receives death threat : भारतातील प्रख्यात पत्रकार आणि The Washington Post या वृत्तपत्राच्या स्तंभलेखिका राणा अय्यूब यांना व्हॉट्सॲपवरून आंतरराष्ट्रीय क्रमांकावरून जीवे मारण्याची धमकी मिळाल्याचा प्रकार समोर आला आहे. या प्रकरणी त्यांनी नवी मुंबईतील कोपरखैरणे पोलीस ठाण्यात तक्रार दाखल केली असून पोलिसांनी गुन्हा नोंदवून तपास सुरू केला आहे. प्राप्त माहितीनुसार, राणा अय्यूब (वय ४१), या कोपरखैरणे सेक्टर १४ येथे राहतात. २ नोव्हेंबर २०२५ रोजी संध्याकाळी ७.१७ ते ७.३७ या वेळेत त्यांना "Harry Shooter Canada" नावाच्या एका अज्ञात आंतरराष्ट्रीय नंबरवरून वारंवार व्हॉट्सॲप कॉल्स आले. अय्यूब यांनी हे कॉल उचलले नाहीत. त्यानंतर संबंधित व्यक्तीने व्हॉट्सॲपवरून धक्कादायक असा संदेश पाठवला.

पोलीस अधिकाऱ्यांच्या माहितीनुसार, त्या संदेशात असं म्हटलं होतं की —

“तुम्ही The Washington Post मध्ये १९८४ च्या शीख हत्याकांड आणि माजी पंतप्रधान इंदिरा गांधी यांच्या खुनांबाबत लेख लिहा, अन्यथा तुमच्या घरी शूटर्स पाठवून न्यू इयर साजरा करू.” संदेशात केवळ धमकीच नव्हे, तर पत्रकारांच्या वैयक्तिक माहितीचा उल्लेख करून भय निर्माण करण्याचा प्रयत्नही करण्यात आला. तुझा पत्ता आणि सर्व माहिती आमच्याकडे आहे. तू आणि तुझे वडील सध्या आजनगर येथे आहात, तुम्हाला मारण्यात येईल. योगी आणि त्यांचे पोलिसदेखील काही करू शकणार नाहीत,” असे धमकीत नमूद करण्यात आले आहे. या प्रकरणी कोपरखैरणे पोलीस ठाण्यात भारतीय न्याय संहिता (Bharatiya Nyaya Sanhita) कलम ३५१(४) (गंभीर धमकी/Criminal intimidation) अंतर्गत गुन्हा नोंदविण्यात आला आहे. पोलिसांनी या घटनेचा तपास सुरू केला असून अद्याप कोणतीही अटक झालेली नाही. 

नक्की वाचा - Mumbai airport : 13 किलो ड्रग्स, 87 लाखांचं परकीय चलन; मुंबई विमानतळावर 4 दिवसात 5 मोठी कारवाई

पत्रकारिता क्षेत्रात आणि सोशल मीडियावर तीव्र संताप

राणा अय्यूब या Gujarat Files: Anatomy of a Cover-Up या चर्चित तपास पत्रकारितेवरील पुस्तकाच्या लेखिका असून त्यांनी केंद्र आणि राज्य सरकारवरील भ्रष्टाचार, अन्याय आणि दहशतवादाशी संबंधित विषयांवर तीव्र भूमिका घेतली आहे. यापूर्वी देखील त्यांना सोशल मीडियावरून धमक्या मिळाल्या होत्या, मात्र या वेळेस प्रत्यक्ष जीवघेणी धमकी दिल्याने पत्रकारिता क्षेत्रात आणि सोशल मीडियावर तीव्र संताप व्यक्त होत आहे. नवी मुंबई पोलिसांनी संबंधित आंतरराष्ट्रीय क्रमांकाचा तपास सायबर शाखेकडे सोपवला असून त्या नंबरचा स्रोत, IP अ‍ॅड्रेस आणि लोकेशन शोधण्याचे प्रयत्न सुरू आहेत. पत्रकार राणा अय्यूब यांच्या सुरक्षिततेबाबत काही माध्यम संस्था आणि मानवाधिकार संघटनांनीही चिंता व्यक्त केली असून केंद्र सरकारकडून योग्य ती कारवाई करण्याची मागणी होत आहे.

View this post on Instagram

A post shared by Rana Ayyub (@ranaayyub)

महत्त्वाचे मुद्दे:

व्हॉट्सॲपवरून "Harry Shooter Canada" या नावाने जीवघेणी धमकी.

लेख लिहिण्यास नकार दिल्यास "शूटर्स पाठवू" असा इशारा.

वैयक्तिक पत्ता आणि कुटुंबाविषयी माहिती देत धमकी.

भारतीय न्याय संहिता कलम ३५१(४) अंतर्गत गुन्हा नोंद.

कोपरखैरणे पोलीस आणि सायबर शाखा तपास करीत आहे.