- नांदेडमधील महापालिका हॉस्पिटलमध्ये डॉक्टर बालाप्रसाद कुंटूरकर यांना मारहाण.
- महिला कर्मचाऱ्याने डॉक्टरवर त्रास देण्याचा आरोप.
- नातेवाईकांनी डॉक्टरांच्या केबिनमध्ये शिरकाव करून केली जबर मारहाण.
योगेश लाटकर
डॉक्टरांना मारहाण होण्याच्या घटना काही नवीन नाहीत. रुग्णावर उपचार न केल्यामुळे, रुग्णांच्या नातेवाईकांसोबत कठोर पणे बोलल्यामुळे, किंवा चुकीचे उपचार केल्यामुळे या मारहाणीच्या घटना या आधी घडल्या आहेत. पण नांदेडमध्ये एक धक्कादायक घटना घडली आहे. नांदेडमध्ये वैद्यकीय अधिकाऱ्याला मारहाण केल्याचा व्हिडीओ सोशल मीडियावर जोरदार व्हायरल झाला आहे. या मारहाणीचं कारण ही भयंकर आहे. या व्हिडीओ दोन तीन तरुणी आणि काही महिला डॉक्टरला अक्षरश: बदडून काढत आहेत.
नांदेड शहरातील कौठा परिसरात महापालिकेचे हॉस्पिटल आहे. या रुग्णालयात बालाप्रसाद कुंटूरकर वैद्यकीय अधिकारी आहे. हे कुंटूरकर रुग्णालयातील महिला कर्मचाऱ्यास त्रास देत असल्याचा त्यांच्यावर एका महिला कर्मचाऱ्याने आरोप केला आहे. ही बाब त्या महिला कर्मचाऱ्याने आपल्या नातेवाईकांना सांगितली. त्यानंतर सर्व नातेवाईक त्या रुग्णालयात आले. त्यात काही तरूण आणि महिला ही होत्या. या जमावाने आधी डॉक्टर कुंटूरकर यांच्या केबिनमध्ये शिरकाव केला.
केबिनमध्ये गेले त्यावेळी तिथे डॉ. बालाप्रसाद कुंटूरकर हे आपलं काम करत होते. त्यावेळी सर्व नातेवाईक त्या महिलेसह त्या केबिनमध्ये गेल्याचे त्या व्हिडीओ मध्ये दिसत आहेत. त्यानंतर ती महिला आवातावाने बोलत असल्याचा आवाज त्या व्हिडीओत येत आहे. डॉ. बालाप्रसाद कुंटूरकर हे काही तरी बोलण्याचा प्रयत्न करत आहे. त्याच वेळी त्यांच्या बाजूला बसलेल्या एका तरुणांना डॉ. बालाप्रसाद कुंटूरकर यांना काही बोलण्यास देण्या आधीच त्यांच्यावर हात उगारला. कधी त्यांच्या कानाखाली लगावली तर कधी त्यांची कॉलर धरली. डॉ. बालाप्रसाद कुंटूरकर यांनी याचा प्रतिकार करण्याचा प्रयत्न केला. त्यांनी या तरुणांना रोखण्याचा प्रयत्न केला. शिवाय माझं ऐकून घ्या असं ते बोलत होते.
ही महिला रूग्णालयाचं वातावरण खराब करत आहे असं ते या व्हिडीओत बोलताना दिसत आहेत. पण संबंधीत महिलेचे नातेवाईक आक्रमक झालेले दिसत होते. त्यांनी डॉक्टरांना पुढे तर लाथा बुक्क्यांनी मारहाण करण्यास सुरूवात केली. प्रकरण वाढत गेले. शेवटी मी पोलीसांना बोलवतो असं सांगत डॉक्टरांनी मोबाईल काढला. शिवाय ते ही सर्व घटना आपल्या मोबाईलमध्ये ही रेकॉर्ड करू लागले. प्रकरण वाढत आहे हे लक्षात आल्यानंतर संबंधीत महिलेच्या नातेवाईकांनी तिथून पळ काढल्याचं ही व्हिडीओत स्पष्ट दिसत आहे. महिला तक्रार निवारण समितीच्यावतीने या प्रकरणाची चौकशी करण्यात येत आहे. तर डॉक्टरही या प्रकरणी पोलीसात तक्रार देणार असल्याचे समजते.
Track Latest News Live on Marathi.NDTV.com and get news updates from India and around the world
