सूरज कसबे, प्रतिनिधी
Pune Crime News : पुण्यातील उच्चभ्रू समजल्या जाणाऱ्या विमाननगर परिसरात एक धक्कादायक घटना घडली आहे. येथील रूट स्पा सेंटरवर पोलिसांनी छापा टाकला. त्यानंतर मॅनेजरसह महिलेनं पळून जाण्याचा प्रयत्न केला. यावेळी खिडकीतून उडी मारण्याच्या प्रयत्नात महिलेचा जागीच मृत्यू झाला. तर स्पा सेंटर मधील मॅनेजर गंभीर जखमी झाला असून त्याची प्रकृती चिंताजनक आहे. या घटनेमुळे शहरात मोठी खळबळ उडाली आहे.
नेमकं काय घडलं?
मिळालेल्या माहितीनुसार,विमाननगर येथील रूट स्पा मध्ये वेश्याव्यवसाय सुरू असल्याची खबर पोलिसांना मिळाली होती. त्यानंतर पोलिसांनी आज सोमवारी या ठिकाणी छापा टाकला.पोलिसांची टीम स्पा सेंटरमध्ये आल्याची माहिती मिळताच कर्मचाऱ्यांची मोठी पळापळ झाली आणि गोंधळ निर्माण झाला.या भीतीपोटी एका महिलेने आणि स्पाच्या मॅनेजरने इमारतीच्या खिडकीतून खाली उडी मारली.
नक्की वाचा >> Pune News : पुण्यावर मोठं संकट? स्थानिकांसह प्रवाशांनी राहा अलर्ट, 'या' भागात नागरिकांची पळापळ; Video व्हायरल
महिलेचा जागीच मृत्यू, मॅनेजरची प्रकृती चिंताजनक
इमारतीच्या उंचावरून खाली पडल्यामुळे संबंधित महिलेचा जागीच मृत्यू झाला. तर,मॅनेजर या अपघातात गंभीर जखमी झाला असून त्याला तातडीने जवळच्या रुग्णालयात दाखल करण्यात आले आहे. सध्या त्याची प्रकृती चिंताजनक असल्याचे सांगण्यात येत आहे. अद्याप मृत महिला आणि जखमी मॅनेजरची ओळख पटवण्याचे काम सुरू आहे.पुण्यात गेल्या काही दिवसांपासून स्पा सेंटरच्या नावाखाली चालणाऱ्या बेकायदेशीर कृत्यांवर पोलिसांनी कडक नजर ठेवली आहे.मात्र,या कारवाई दरम्यान घडलेल्या महिलेच्या मृत्यू प्रकरणामुळे पोलीस प्रशासनासमोर आता तपासाचे नवीन आव्हान उभे राहिले आहे.
Track Latest News Live on Marathi.NDTV.com and get news updates from India and around the world
