- नगरपालिकेच्या निवडणुकीच्या शेवटच्या टप्प्यात सर्व पक्षांचे नेते प्रचारासाठी मैदानात.
- भाजपच्या माजी खासदार नवनीत राणांनी अकोल्यात प्रचार करताना पुरुष मतदारांबाबत वादग्रस्त वक्तव्य.
- नवनीत राणांनी पुरुषांना पार्टींमध्ये उशिरापर्यंत राहणारे आणि कमी प्रामाणिक असल्याचे म्हटले आहे.
योगेश शिरसाट
सध्या नगरपालिका निवडणुकांचा प्रचार शेवटच्या टप्प्यात आहे. सर्वच पक्षाचे प्रमुख नेते प्रचाराच्या मैदानात उतरले आहे. मतदारांना आपलसं करण्यासाठी मोठ मोठी आश्वासन दिली जात आहेत. त्यातही महिला मतदारांना आकर्षीत करण्यावर सर्वांचाच भर आहे. तेच करत असताना भाजप नेत्या आणि माजी खासदार नवनीत राणा यांनी एक वादग्रस्त वक्तव्य केलं आहे. त्यातून त्यांनी महिलां मतदारांना आपल्या बाजूने करताना पुरूष मतदारांचा रोष मात्र ओढवून घेतला आहे. अकोल्यात त्या प्रचारासाठी आल्या असत्या त्यांनी हे वक्तव्य केलं. त्याची चर्चा संपूर्ण जिल्ह्यात सध्या सुरू आहे.
नवनीत राणा म्हणाल्या सध्या निवडणुका होत आहेत. त्यामुळे रात्री उशिराचे सगळीकडेच कार्यक्रम सुरू आहेत. पार्ट्या सुरू आहेत. त्यामुळे पुरूष मंडळी या पार्ट्यांमध्ये जात असतात. पाहाटे दोन दोन तिन तिन वाजे पर्यंत या पार्ट्या चालतात. पार्टी संपल्यानंतर रात्री उशिरा ही मंडळी घरी येतात. पुरूष मंडळी पार्ट्यांनी भूलतात. ते पार्ट्या झोडत बसतात. त्या तुलनेत महिला मतदार या प्रामाणिक असतात. त्यांना असल्या पार्ट्यांची गरज लागत नाही. किंवा त्या अशा कोणत्या पार्ट्यांनाही जात नाहीत.
यावेळी त्यांनी महिला मतदारांचे कौतूक करताना त्यांना चुचकारण्याचा प्रयत्न केलाय. महिलांच्या तुलनेत पुरुष कमी इमानदार असल्याचा सूर त्यांनी छेडला. महिला मतदार कधीही पैशाला किंवा पार्टींना बळी पडत नाहीत. त्या चटणी-भाकर खाऊनसुद्धा घराला घर बनवतात असं त्या म्हणाल्या. राणांच्या या वक्तव्यामुळे त्यांनी एक प्रकारे पुरुष मतदारांना आरोपीच्या पिंजऱ्यात उभं केलं का, असा प्रश्न उपस्थित झाला आहे. सरसकट त्यांनी सर्वच पुरूषांबाबत केलेल्या यावक्तव्यामुळे त्याचा परिणाम या निवडणुकीतवर होईल का अशी ही चर्चा सुरू झाली आहे.
यावेळी त्यांनी लोकसभेचे विरोधी पक्षनेते राहुल गांधी यांच्यावर टिका केली. लोकसभा निवडणुकीत संविधानाचा मुद्दा काँग्रेसने उपस्थित केला होता. त्यातून मतदारांची दिशाभूल करण्यात आली. त्यामुळे थोड्या मतांना आपला पराभव झाला असं त्या यावेळी म्हणाल्या. अमरावती लोकसभा मतदार संघातून नवनीत राणा यांनी निवडणूक लढवली होती. पण काँग्रेसच्या बळवंत वानखेडे यांनी त्याचा दारूण पराभव केला होता. त्यानंतर राणा या स्थानिक राजकारणात सक्रीय झाल्या आहेत.
Track Latest News Live on Marathi.NDTV.com and get news updates from India and around the world
