National Awards:मुक्काम पोस्ट बोंबिलवाडी सर्वोत्कृष्ट मराठी चित्रपट; राष्ट्रीय चित्रपट पुरस्कारात मराठीचा डंका

72nd National Film Awards : दिग्दर्शक परेश मोकाशी यांच्या 'मुक्काम पोस्ट बोंबिलवाडी' या चित्रपटाला यंदाच्या ७२व्या राष्ट्रीय चित्रपट पुरस्कारांमध्ये सर्वोत्कृष्ट मराठी चित्रपटाचा बहुमान मिळाला आहे. सर्वोत्कृष्ट राष्ट्रीय चित्रपटाचा पुरस्कार 'आर्टिकल 370 ' ला जाहीर झाला आहे. 

भारतीय चित्रपटसृष्टीतील प्रतिष्ठेचे मानले जाणारे ७२ वे राष्ट्रीय चित्रपट पुरस्कार (२०२४) आज केंद्रीय माहिती व प्रसारण मंत्रालयाने जाहीर केले. यंदाच्या पुरस्कारांमध्ये मराठी चित्रपटसृष्टीने फीचर आणि नॉन-फीचर या दोन्ही विभागांत उल्लेखनीय कामगिरी करत विविध मानाचे पुरस्कार आपल्या नावे केले. त्याचबरोबर हिंदी आणि प्रादेशिक भाषांमधील चित्रपटसृष्टीतील कलाकारांनीही अभिनय, दिग्दर्शन आणि तांत्रिक क्षेत्रातील प्रमुख पुरस्कार पटकावले.

राष्ट्रीय पुरस्कारांमध्ये मराठीचा डंका...

फीचर फिल्म्स विभागात विवेक फिल्म्स आणि मयसभा करमणूक मंडळी एलएलपी निर्मित 'मुक्काम पोस्ट बोंबिलवाडी' या चित्रपटाची सर्वोत्कृष्ट मराठी चित्रपट म्हणून निवड करण्यात आली. दुसऱ्या महायुद्धाच्या पार्श्वभूमीवर ग्रामीण महाराष्ट्रातील विनोदी आणि उपरोधिक कथानक प्रभावीपणे मांडणाऱ्या या चित्रपटाला राष्ट्रीय परीक्षकांनी सर्वोच्च पसंती दिली. 'घरत गणपती' चित्रपटातील 'नवसाची गौरी माझी' या गीतासाठी गायक अभय जोधपूरकर यांना सर्वोत्कृष्ट पार्श्वगायक हा राष्ट्रीय पुरस्कार जाहीर झाला. तसेच 'स्वरगंधर्व सुधीर फडके' या चरित्रपटासाठी योगेश देशपांडे यांना सर्वोत्कृष्ट रुपांतरित पटकथा या श्रेणीतील राष्ट्रीय पुरस्कार जाहीर झाला.

'चंदू चॅम्पियन' चित्रपटासाठी कार्तिक आर्यन आणि 'ब्रॅमायुगम' चित्रपटासाठी मामुटी यांना संयुक्तपणे सर्वोत्कृष्ट अभिनेता हा राष्ट्रीय पुरस्कार जाहीर झाला. 'आर्टिकल  ३७०' या चित्रपटातील प्रभावी अभिनयासाठी यामी गौतम यांची सर्वोत्कृष्ट अभिनेत्री म्हणून निवड जाहीर झाली. याच चित्रपटाला सर्वोत्कृष्ट फीचर फिल्म पुरस्कारही जाहीर झाला. आदित्य जांभळे यांनी हा चित्रपट दिग्दर्शित केला आहे.

याशिवाय, 'भक्षक' चित्रपटासाठी संजय मिश्रा यांना सर्वोत्कृष्ट सहाय्यक अभिनेता हा राष्ट्रीय पुरस्कार जाहीर झाला. 'श्रीकांत' या चित्रपटाला सर्वोत्कृष्ट हिंदी चित्रपट पुरस्कार जाहीर झाला, तर रणदीप हुड्डा यांना 'स्वातंत्र्यवीर सावरकर' या चित्रपटासाठी सर्वोत्कृष्ट पदार्पण करणारा दिग्दर्शक हा राष्ट्रीय पुरस्कार जाहीर झाला.

नक्की वाचा - 'गौरी हिंदू नाही तर...'; लव जिहाद आरोपांवर पहिल्यांदाच आमिरने मांडली भूमिका, पहिल्या 2 पत्नींविषयी म्हणाला...

नॉन-फीचर विभागातही मराठी चित्रपटांनी आपला ठसा उमटवला. 'भंगार (Obsolete)' या चित्रपटाला सर्वोत्कृष्ट नॉन-फीचर फिल्म हा सर्वोच्च सन्मान जाहीर झाला. 'हमसफर' या चित्रपटाला सर्वोत्कृष्ट लघुचित्रपट पुरस्कार जाहीर झाला. 'परत ४१° च्या मागावर (On the Trail of 41°)' या चित्रपटासाठी शिवपाल सिंग कांग यांना सर्वोत्कृष्ट संगीत दिग्दर्शन पुरस्कार जाहीर झाला. तसेच 'स्टॅच्यू ऑफ युनिटी – एकता का प्रतीक' या चित्रपटाला सर्वोत्कृष्ट दिग्दर्शन पुरस्कार जाहीर झाला.

यंदाच्या राष्ट्रीय चित्रपट पुरस्कारांमध्ये मराठी चित्रपट, कलाकार, लेखक, संगीतकार आणि तंत्रज्ञांनी विविध श्रेणींमध्ये उल्लेखनीय यश संपादन करून राष्ट्रीय स्तरावर मराठी चित्रपटसृष्टीची समृद्ध परंपरा, आशयघनता आणि दर्जेदार चित्रनिर्मिती पुन्हा एकदा अधोरेखित केली आहे.