Sayaji Shinde New Project : मनोरंजनविश्वात आपला ठसा उमटवत काहीतरी वेगळे करू पाहणारे कलाकार एकत्र आले की काहीतरी खास पाहायला मिळणार याची खात्री असते. रंगभूमीवर वैविध्यपूर्ण नाटकं नव्या वर्षात पाहायला मिळणार असताना एका सशक्त नाटकाच्या निमित्ताने मराठी रंगभूमीवर दोन अवलिया रंगकर्मी एकत्र आले आहेत. अभिनेते सयाजी शिंदे यांनी आपल्या दमदार अभिनयाच्या जोरावर मराठीसह हिंदी, साऊथ सिनेसृष्टीतही स्वतःचा ठसा उमटवला आहे. तर दुसरीकडे स्वतःमधील कौशल्यांचा पुरेपूर वापर करत डबिंग आर्टिस्ट,अभिनय, दिग्दर्शन ते नाट्यनिर्माता अशी चौफेर मुशाफिरी करत अजित भुरे यांनी आपले वेगळेपण दाखवून दिलं आहे. या दोन कलाकारांना या नाटकाने एकत्र आणले आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
सुमुख चित्र आणि आर्यन्स ग्रुप ऑफ कंपनीने नव्या नाटकासाठी या दोन दिग्गज मान्यवरांना एकत्र आणलंय. या निर्मिती संस्थेचे हे तिसरे नाटक आहे. या दोन अनुभवी कलाकारांच्या एकत्र येण्याने हे नवे नाटक कोणते? याची उत्सुकता शिगेला पोहोचलीय. या दोन अवलिया कलाकारांव्यतिरिक्त या नाटकात कोणकोण असणार आहेत? या नाटकाचे नाव काय? या सर्व प्रश्नांची उत्तरं गुलदस्त्यात आहेत. लवकरच या नाटकाचा शुभारंभ केला जाणार आहे. या निमित्ताने अभिनेते सयाजी शिंदे 22 वर्षांनी रंगभूमीवर पुनरागमन करणार आहेत, तर नाट्यनिर्माता अजित भुरे सहा वर्षांनंतर पुन्हा दिग्दर्शनाकडे वळले आहेत.
(नक्की वाचा: सयाजी शिंदेंचा मुलगा दिसतो हीरोसारखा हँडसम! लेकाला कधी करताय लाँच? नेटकऱ्यांचा प्रश्न)
नव्या प्रोजेक्टबाबत सयाजी शिंदेंची प्रतिक्रिया
नव्या प्रोजेक्टबाबत अभिनेते सयाजी शिंदे म्हणाले की,"नाटकात काम करण्याच्या हेतूने मी मुंबईत आलो होतो. पुढे चित्रपटांमध्ये व्यस्त झालो. आता पुन्हा एकदा रंगभूमीवर काम करता येणार याचा आनंद आहेच. दर पाच वर्षांनी माणूस आणि गोष्टी बदलतात असे म्हणतात. या बदलाला या नव्या नाट्यकृतींच्या माध्यमातून जाणून घेण्याचा माझा प्रयत्न असणार आहे.'जुनं ते सोनं' असं म्हणतात, याच जुन्या विषयाचा नव्या अंगाने आढावा घेणारं काहीतरी करण्याची इच्छा असताना या नाट्यकृतीची विचारणा झाली. अजित भुरेसारखा कलासक्त माणूस ज्याच्यासोबत मी प्रायोगिक काम केलं. आता या नाटकाच्या निमित्ताने व्यावसायिक काम करताना त्याच्याकडून नवं काहीतरी शिकायला मिळणार. कलाकारापेक्षा माणूस महत्त्वाचा असं म्हणणाऱ्या अजित आणि मी मनोरंजनाचा समृद्ध असा काळ पहिला आहे. त्यामुळे याच समृद्धतेचा अनुभव त्याच्या सोबतीने नाट्यरसिकांना पुन्हा देता येणार हे मला खूप महत्त्वाचं वाटतं".
(नक्की वाचा: धनश्री-चहलच्या नात्यात वादळ, लोक सुरभीला का देताहेत शिव्याशाप?)
सयाजी शिंदेंसारख्या जबरदस्त कलाकारासोबत काम करण्यांची संधी मिळतेय - अजित भुरे
तर अजित भुरे यांनीही सयाजी शिंदेंचे कौतुक करत म्हटलं की, "सयाजी शिंदेंना झुलवा नाटकात पाहाणं हा एक अविस्मरणीय अनुभव होता.अशा जबरदस्त कलाकारासोबत प्रत्यक्ष काम करण्याची संधी लवकरच प्राप्त होते आहे. मला खात्री आहे की यामुळे मी सुद्धा एक कलाकार म्हणून समृद्ध होईन. सयाजी शिंदे एका महत्त्वाच्या नाटकात भूमिका करत आहेत. मराठी नाट्यसृष्टीत माइलस्टोन ठरलेली ही कलाकृती आहे.आजच्या काळात या नाटकाला भिडणं आव्हानात्मक वाटलं आणि सुमुख चित्र या संस्थेच्या पुढाकाराने ते जुळून आलं. त्या विषयी मला आनंद आहे".
