प्रार्थना केल्याने गोष्टी सुरळीत होतात का? 'द प्रेयर' उलगडणार मानवी मनाची अवस्था

The Prayer Short Film: प्रार्थना हा आत्म्याचा आवाज असतो. जेव्हा प्रार्थना पूर्णत्वास येते तेव्हा तो विश्वास असतो की ती परिस्थिती असते? हे प्रत्येक जण आपापले ठरवतो. अशाच काहीशा संकल्पनेवर आधारित  'द प्रेयर' (The Prayer Short Film) ही  शॉर्टफिल्म लवकरच प्रेक्षकांच्या भेटीला येणार आहे. मकरंद देशपांडे या शॉर्टफिल्मचे निर्माते आहेत आणि यानिमित्ताने ते प्रथमच शॉर्टफिल्मची निर्मिती करत आहेत. निवेदिता पोहनकर यांनी या शॉर्टफिल्मचे लेखण-दिग्दर्शन केले आहे. 'द प्रेयर'मध्ये अदिती पोहनकर, मकरंद देशपांडे, स्मिता जयकर, संदीप धाबाळे, सुशांत जाधव, सोहिनी नियोगी, साहिल खान, श्रुती श्रीवास्तव यांच्या प्रमुख भूमिका आहेत. 14 मिनिटांची ही शॉर्टफिल्म हिंदी आणि इंग्रजी भाषेमध्ये रिलीज होणार आहे. 

('NDTV मराठी' चं अधिकृत व्हॉट्सअ‍ॅप चॅनल जॉईन करा )

शॉर्टफिल्ममध्ये काय पाहायला मिळणार?

'द प्रेयर' ही एका हृदयस्पर्शी प्रसंगावर आधारित कहाणी आहे. प्रार्थना केल्याने गोष्टी सुरळीत होतात का? की परिस्थिती हे सगळे घडवून आणते? हा विचार करायला लावणारी ही शॉर्टफिल्म असून 'द प्रेयर'मधील मनाला भिडणारी कहाणी आणि कलाकारांच्या दमदार अभिनयामुळे ही शॉर्टफिल्म प्रेक्षकांना नक्कीच आवडेल. अमित रॉय या शॉर्टफिल्मचे डिओपी असून दीपा भाटिया आयुष सपरा यांनी संकलन केले आहे. या सर्व गोष्टींना पूरक ठरणारे टबी यांचे भावनिकदृष्ट्या प्रभावी संगीत या शॉर्टफिल्मचा प्रभाव अधिकच गडद करते. 

(नक्की वाचा: अंकुश चौधरी मोठ्या पडद्यावर पुन्हा धमाका करणार, 'No Entry पुढे धोका आहे 2'ची केली घोषणा)

मनाच्या दोन अवस्था उलगडण्याचा प्रयत्न करणारी शॉर्टफिल्म

लेखिका-दिग्दर्शिका निवेदिता पोहनकर यांनी शॉर्टफिल्मबाबत म्हटलं की, 'विश्वास ही एक अशी स्थिती आहे. जी असते किंवा नसते. 'द प्रेयर' ही मानवी मनाच्या या दोन अवस्था उलगडण्याचा प्रयत्न करणारी शॉर्टफिल्म आहे. जेव्हा एखादी व्यक्ती संकटामध्ये सापडते, तेव्हा मन भांबावून जाते, पळ काढते. पण ज्या क्षणी मन शांत होते, त्या क्षणी अंतःकरणाचा स्पष्ट, अढळ आवाज आपल्याला योग्य दिशा दाखवतो आणि उचित कृतीसाठी मार्गदर्शन करतो. प्रार्थनेवर केवळ विश्वास असणे गरजेचे आहे. हेच आम्ही या 14 मिनिटे 49 सेकंदामध्ये दाखवण्याचा प्रयत्न केला आहे.' 

(नक्की वाचा: 'शिवाजी महाराज लाच देऊन सुटले...' मराठी अभिनेत्याचे वादग्रस्त विधान, नेटकऱ्यांचा संताप; VIDEO व्हायरल)

तर निर्माते मकरंद देशपांडे यांनी म्हटलंय की, "मी पहिल्यांदाच शॉर्टफिल्मची निर्मिती करत आहे. पहिल्याच प्रयत्नात एक उत्तम आणि सखोल आशय असलेल्या कथेचा भाग होणे, हे नक्कीच सुखावह आहे. टीम अप्रतिम आहे. मी निवेदिता पोहनकरचे विशेष कौतुक करेन. तिने एक संवेदनशील, नाजूक विषय अतिशय प्रगल्भतेने हाताळला आहे. ही शॉर्टफिल्म प्रेक्षकांना एक नवीन अनुभव देईल, याची आम्हाला खात्री आहे.'