Kamini Kaushal: ज्येष्ठ अभिनेत्री कामिनी कौशल यांचं वयाच्या 98 व्या वर्षी निधन झालं आहे. त्यांनी चित्रपट आणि टेलिव्हिजनमध्ये तब्बल सात दशकांहून अधिक काळ काम केलं आहे. त्यांच्या निधनामुळे मनोरंजन विश्वावर शोककळा पसरली आहे.
कामिनी कौशल यांनी गुरुवारी, रात्री उशिरा मुंबईतील राहत्या घरी अखेरचा श्वास घेतला. त्यांच्या निधनाच्या बातमीला त्यांच्या जवळचे कुटुंबीय मित्र साजन नारायण यांनी दुजोरा दिला. त्यांनी पीटीआयला दिलेल्या माहितीनुसार, "कामिनी कौशल यांचं गुरुवारी रात्री उशिरा त्यांच्या मुंबईतील घरी निधन झाले.
कान्स फिल्म फेस्टिव्हलपासून सुरुवात
कामिनी कौशल या हिंदी सिनेसृष्टीतील सर्वोत्तम अभिनेत्रींपैकी एक मानल्या जात. त्यांनी 1940 च्या दशकापासून ते थेट 2010 च्या दशकापर्यंत चित्रपट आणि टेलिव्हिजन या दोन्ही माध्यमांत महत्त्वपूर्ण योगदान दिलं. त्यांचं काम नेहमीच समीक्षकांच्या कौतुकास पात्र ठरलं.
त्यांच्या अभिनयाची सुरुवात 'नीचा नगर' (1946) या चित्रपटातून झाली. या चित्रपटानं कान्स फिल्म फेस्टिव्हलमध्ये प्रतिष्ठित 'पाम डी'ओर' (Palme d'Or) पुरस्कार जिंकला होता. त्यानंतर कामिनी कौशल यांनी 'बिराज बहू' (1954) या चित्रपटातून एक अत्यंत अविस्मरणीय भूमिका साकारली. या भूमिकेसाठी तिला 1956 मध्ये 'सर्वोत्कृष्ट अभिनेत्री'चा फिल्मफेअर पुरस्कार मिळाला होता. त्यांच्या उल्लेखनीय चित्रपटांमध्ये 'पारस' (1949), 'आरझू' (1950), 'जेलर' (1958), आणि 'गोदान' (1963) यांचा समावेश आहे.
मनोज कुमार यांच्या 'शहीद', 'उपकार' आणि 'पूरब और पश्चिम' यांसारख्या अनेक चित्रपटांमधील दमदार व्यक्तिरेखांसाठीही त्यांना विशेष ओळख मिळाली होती.
( नक्की वाचा : VIDEO : 'नीली साडी' ट्रेंडवर गिरीजा ओकचं कळकळीचं आवाहन, म्हणाली, 'माझ्या 12 वर्षांच्या मुलाचा विचार करा...' )
'कबीर सिंग'मध्ये लक्षवेधी भूमिका
आपल्या उत्तरार्धातही कामिनी कौशल हिने मुख्य प्रवाहातल्या चित्रपटांमध्ये सक्रिय सहभाग कायम ठेवला. त्यांनी 'चेन्नई एक्सप्रेस' (2013) आणि 'कबीर सिंग' (2019) या यशस्वी चित्रपटांमध्ये महत्त्वपूर्ण भूमिका साकारल्या. 'कबीर सिंग' मधील त्यांच्या अभिनयासाठी त्यांच्या 'सर्वोत्कृष्ट सहाय्यक अभिनेत्री'चा स्क्रीन पुरस्कार मिळाला, तसंच तिला फिल्मफेअर नामांकनही मिळालं होतं.
Track Latest News Live on Marathi.NDTV.com and get news updates from India and around the world
