RBI Repo Rate: जीएसटी 2.0 मुळे सामान्य लोकांना मिळत असलेल्या फायद्यानंतर, आता देशातील मध्यमवर्गीयांना दिवाळी आणि दसऱ्यापूर्वी आणखी एक मोठा दिलासा मिळण्याची शक्यता आहे. भारतीय रिझर्व्ह बँक पुन्हा रेपो दरात 0.25 टक्क्यांची कपात करू शकते. जर असे झाले, तर गृह कर्ज, वाहन कर्ज किंवा वैयक्तिक कर्ज आणखी स्वस्त होऊ शकते. आरबीआयने यावर्षी आतापर्यंत व्याजदरात 1 टक्क्यांची कपात केली आहे. त्यामुळे पुन्हा एकदा दर कमी झाल्यास आर्थिक बाजारात सकारात्मक वातावरण निर्माण होईल.
भारतीय स्टेट बँकेच्या एका रिसर्च रिपोर्टमध्ये ही शक्यता व्यक्त करण्यात आली आहे. या रिपोर्टनुसार, 29 सप्टेंबर ते 1 ऑक्टोबरपर्यंत होणाऱ्या पतधोरण समितीच्या पुढील बैठकीत आरबीआय हा निर्णय घेऊ शकते. रिपोर्टमध्ये म्हटले आहे की, सप्टेंबरमध्ये व्याजदर कमी करणे योग्य आहे.
व्याजदर कपातीची शक्यता का?
व्याजदर कमी होण्याची शक्यता अनेक कारणांमुळे वाढली आहे: अहवालात म्हटले आहे की, सध्या महागाई नियंत्रणात असून ती आर्थिक वर्ष 2026-27 मध्येही नरम राहण्याची शक्यता आहे. जीएसटीमध्ये (GST) कपात झाल्यामुळे सप्टेंबर आणि ऑक्टोबरमध्ये महागाई 2 टक्क्यांपेक्षा कमी राहू शकते. यामुळे पुढील आर्थिक वर्षात ग्राहक किंमत निर्देशांक जास्त चिंताजनक नसेल. तसेच जीएसटी 2.0 मुळे लोकांकडे जास्त पैसा बचत करण्यासाठी शिल्लक राहील. यामुळे कर्जाची मागणी वाढू शकते.
आरबीआयची आधीच रेपो दरात कपात
- 7 फेब्रुवारी 2025: आरबीआयने 25 आधार अंकांची कपात करून रेपो रेट 6.50% वरून 6.25% केला.
- 9 एप्रिल 2025: पतधोरण समितीने पुन्हा 25 आधार अंकांची कपात केली.
- 6 जून 2025: आरबीआयने सर्वात मोठी कपात करत व्याजदर 50 आधार अंकांनी कमी केले.
यापूर्वीच्या कपातीचा फायदा कर्जदारांना झाला असून, आता पुन्हा एकदा कपात झाल्यास कर्ज आणखी स्वस्त होण्याची शक्यता आहे. यामुळे देशातील आर्थिक वाढीलाही चालना मिळेल.
