Banking News: मुंबईच्या RBL बँकेवर आता दुबईचा ताबा; 26,853 कोटी रुपयांच्या महाकाय डीलवर शिक्कामोर्तब!

RBL Bank Emirates NBD Deal: दुबईची सरकारी बँक असलेल्या एमिरेट्स एनबीडी (Emirates NBD Bank) ने भारतीय खासगी क्षेत्रातील प्रमुख बँक, आरबीएल बँकेत (RBL Bank Ltd.) 26,853 कोटी रुपये (Rs 26,853 crore) गुंतवण्याचा निर्णय घेतला आहे. हा करार भारतीय बँकिंग क्षेत्रातील सर्वात मोठ्या परदेशी गुंतवणुकीपैकी एक ठरणार आहे. आरबीएल बँकेने शनिवारी या महत्त्वपूर्ण प्राथमिक भागभांडवल विक्रीला (Primary Stake Sale) नियामक फाइलिंगद्वारे मंजुरी दिली असून, या गुंतवणुकीमुळे बँकेच्या मालकीमध्ये आणि भांडवली रचनेत मोठा बदल होणार आहे.

काय आहे करार?

या करारांतर्गत, आरबीएल बँक एमिरेट्स एनबीडीला प्रति शेअर 280 रुपये दराने 95.9 कोटी शेअर्सची विक्री करणार आहे. हा दर आदल्या दिवशीच्या बाजारातील बंद किमतीपेक्षा (Closing Price) सुमारे 7% कमी आहे. विशेष म्हणजे, ही प्रचंड गुंतवणूक पूर्ण झाल्यानंतर एमिरेट्स एनबीडी बँकेला आरबीएल बँकेच्या विस्तारित समभाग भांडवलापैकी (Post Preferential Equity Share Capital) तब्बल 60% इतके नियंत्रक भागभांडवल (Controlling Stake) मिळणार आहे. 

या निधी उभारणीनंतर, एमिरेट्स एनबीडीची भारतातील शाखा आरबीएल बँकेत विलीन केली जाणार आहे. या विलीनीकरणासाठी एमिरेट्स एनबीडीला 10 रुपये दर्शनी मूल्याचे (Face Value) सुमारे 8.7 कोटी अतिरिक्त शेअर्स देखील दिले जातील.

( नक्की वाचा : Sachin Tendulkar: 10 रुपयांचा शेअर थेट 9 हजारांवर! 'क्रिकेटचा देव'च ठरला शेअरमागचा 'खेळाडू'? कंपनीनं मौन सोडलं )
 

कशी असेल पुढील वाटचाल?

हा मोठा व्यवहार बाजारातील नियमांनुसार एमिरेट्स एनबीडीला आरबीएल बँकेच्या भागधारकांसाठी 'ओपन ऑफर' (Open Offer) आणण्यासाठी देखील बंधनकारक ठरवतो. दरम्यान, सूत्रांनी दिलेल्या माहितीनुसार, एमिरेट्स एनबीडी आरबीएल बँकेच्या सध्याच्या व्यवस्थापनात त्वरित बदल करण्याची शक्यता नाही. बँकेचे बहुतांश व्यवस्थापन सदस्य त्यांच्या भूमिकांमध्ये कायम राहतील आणि नव्या मालकाच्या इनपुटसह बँकेचे धोरणात्मक निर्णय घेतले जातील. हा करार पूर्ण होण्यापूर्वी त्याला भारतीय रिझर्व्ह बँक (RBI), कॉम्पिटिशन कमिशन ऑफ इंडिया (CCI) आणि इतर सरकारी संस्थांकडून नियामक मंजुरी मिळणे आवश्यक आहे.

काय आहे बँकेचा इतिहास?

1943 साली रत्नाकर बँक म्हणून स्थापन झालेल्या आणि 2010 नंतर झपाट्याने राष्ट्रीय स्तरावर विस्तारलेल्या आरबीएल बँकेसाठी हा करार अत्यंत महत्त्वाचा ठरणार आहे. व्यवस्थापन बदल आणि नियामक देखरेखीच्या अलीकडील टप्प्यातून गेलेल्या या बँकेने शनिवारी सप्टेंबर तिमाहीचे आर्थिक निकालही जाहीर केले. यानुसार, बँकेचा निव्वळ नफा (Net Profit) गेल्या वर्षीच्या याच तिमाहीच्या तुलनेत 20% ने घसरून 178 कोटी रुपये झाला आहे. तर, निव्वळ व्याज उत्पन्न (NII) देखील 4% ने कमी होऊन 1,551 कोटी रुपये नोंदवले गेले आहे.