जेवणात उंदीर, पाल, झुरळ इत्यादी आढळल्याच्या अनेक घटना तुम्ही पाहिल्या असतील किंवा वाचल्या असतील. मात्र बिहारमधून एक संतापजनक आणि तितकीच चिंताजनक घटना समोर आली आहे. शाळेच्या माध्यान्ह जेवणात चक्क साप आढळल्याने एकच खळबळ उडाली आहे. बिहारच्या सहसा जिल्ह्यातील महिषी ब्लॉक अंतर्गत असलेल्या बलुआहा माध्यमिक शाळेत ही घटना घडली. या घटनेमुळे अनेक विद्यार्थी देखील आजारी पडले आहेत.
नेमकी घटना काय?
नेहमीप्रमाणे एका स्वयंसेवी संस्थेने (NGO) पुरवलेले माध्यान्ह भोजन विद्यार्थ्यांना वाढले जात होते. मुले जेवण करत असतानाच एका विद्यार्थ्याच्या ताटात लहान साप असल्याचे निदर्शनास आले. विशेष म्हणजे हा साप जेवणात शिजून निघाला होता. हे समजताच मुलांमध्ये भीतीचे वातावरण पसरले आणि एकामागून एक विद्यार्थी पोटाच्या दुखण्याने विव्हळू लागले.
(नक्की वाचा- Pandharpur-Tirupati Train: विठूरायाची पंढरी तिरुपतीशी जोडली! 16 मेपासून नियमित रेल्वे धावणार, वाचा टाईमटेबल)
प्रशासनाकडून तातडीने मदत
मुलांची प्रकृती बिघडत असल्याचे पाहून शाळा प्रशासनाने तातडीने पोलीस आणि रुग्णालयाशी संपर्क साधला. घटनेचे गांभीर्य ओळखून पोलिसांनी काही मुलांना त्यांच्या स्वतःच्या गाड्यांमधून स्थानिक आरोग्य केंद्रात पोहोचवले, तर इतरांना रुग्णवाहिकेतून नेण्यात आले. अनेक मुलांची प्रकृती बराच काळ चिंताजनक होती.
(नक्की वाचा- Ashok Kharat: भोंदू खरातचं बँक लॉकर पाहून ईडीचे अधिकारीही थक्क! काय-काय सापडलं?)
अनेक विद्यार्थ्यांना सहसा येथील सदर रुग्णालयात हलवण्यात आले असून त्यांच्यावर उपचार सुरू आहेत. जिल्हा दंडाधिकाऱ्यांनी या प्रकरणाची गंभीर दखल घेतली आहे. ज्या स्वयंसेवी संस्थेच्या क्लस्टरमध्ये हे अन्न शिजवले गेले, तिथे तपास पथक पाठवून सखोल चौकशीचे आदेश देण्यात आले आहेत. या घटनेने सरकारी शाळांमधील मुलांच्या आरोग्याबाबत आणि अन्नाच्या दर्जाबाबत पुन्हा एकदा प्रश्नचिन्ह उपस्थित केले आहे.
Track Latest News Live on Marathi.NDTV.com and get news updates from India and around the world
