New ATM Rule: प्रत्येक महिन्याची पहिली तारीख अनेक अर्थांनी महत्त्वाची असते, कारण याच दिवशी अनेक मोठ्या नियमांमधील बदल लागू होतात. यातील अनेक बदल थेट सामान्य माणसाच्या जीवनावर परिणाम करतात. 1 एप्रिलपासून नवीन आर्थिक वर्ष सुरू होत असल्याने, बहुतांश संस्था याच काळात आपल्या नियम आणि धोरणांमध्ये बदल करतात.
1 एप्रिलपासून देशभरात बँकांकडून ATMशी संबंधित कित्येक मोठे बदल करण्यात येणार आहेत. हे बदल नवीन आर्थिक वर्षासह लागू होतील. मोठ्या खासगी आणि सरकारी बँकांकडून जे नियम घोषित करण्यात आले आहेत, त्याचा परिणाम पैसे काढण्याच्या मर्यादा, ATM व्यवहार शुल्क आणि ATMमधून पैसे काढण्याच्या पद्धतीवर होईल.
HDFC बँकेचे नवीन नियम
HDFC बँकेने दिलेल्या माहितीनुसार, आता ATM वरून UPI द्वारे पैसे काढणे देखील तुमच्या महिन्याच्या 'फ्री ट्रान्झॅक्शन लिमिट' (मोफत व्यवहार मर्यादा) मध्ये मोजले जाईल.
नवे बदल: पूर्वी UPI-आधारित ATM पैसे काढणे वेगळे मानले जात असे, आता ते सामान्य ATM व्यवहारासारखेच धरले जाईल.
शुल्क: जर तुम्ही तुमच्या मोफत व्यवहारांची मर्यादा ओलांडली, तर तुम्हाला प्रति व्यवहार 23 रुपये (अधिक कर) द्यावे लागतील.
मर्यादा: HDFC बँकेच्या ATM वर 5 मोफत व्यवहार मिळतात. इतर बँकांच्या ATM वर मेट्रो शहरांमध्ये 3 आणि नॉन-मेट्रो शहरांमध्ये 5 मोफत व्यवहार मिळतात.
पूर्वी UPI-आधारित ATM मधून पैसे काढणे ही एक वेगळी श्रेणी मानली जात होती आणि या गोष्टीचा तुमच्या मोफत मर्यादेत समावेश नव्हता, पण आता UPI द्वारे केलेले पैसे काढणे देखील तुमच्या एकूण मोफत ATM व्यवहारांचा भाग म्हणून गणले जाईल.
(नक्की वाचा: नोकरदारांसाठी मोठी बातमी! 1 एप्रिलपासून बदलणार सॅलरी स्ट्रक्चर; पगारावर काय होणार परिणाम? वाचा सविस्तर)
PNB चे नवीन नियम
पंजाब नॅशनल बँकेने (PNB) देखील काही बदल केले आहेत. नवीन व्यवस्थेनुसार:
- काही विशिष्ट डेबिट कार्डांद्वारे ग्राहक आता दररोज 50,000 ते 75,000 रुपयांपर्यंत रोख रक्कम काढू शकतील. ही मर्यादा तुमच्या कार्डच्या प्रकारावर अवलंबून असेल.
- काही डेबिट कार्ड्स ज्यांची मर्यादा पूर्वी 1,00,000 रुपयांपर्यंत होती, ती आता कमी करण्यात आली आहे.
- जिओ पेमेंट्स बँकेने एक नवीन पद्धत सुरू केली आहे. आता ग्राहक QR कोड स्कॅन करून पैसे काढू शकतील.
- बँकेचे प्रतिनिधी एक UPI QR कोड देतील. ग्राहक आपल्या मोबाइलवरून तो QR कोड स्कॅन करतील आणि UPI ॲपद्वारे पेमेंटला परवानगी देतील. त्यानंतर त्यांना रोख रक्कम मिळेल.
- ही सुविधा रोख रक्कम काढण्याची प्रक्रिया अधिक सोपी आणि सुरक्षित बनवते.
Photo Credit: NDTV Marathi
Track Latest News Live on Marathi.NDTV.com and get news updates from India and around the world
