Pilot Sumit Kapoor Daughter Emotional Note : बारामतीमध्ये 28 जानेवारी रोजी उपमुख्यमंत्री अजित पवार यांच्या विमानाला झालेल्या भीषण अपघाताने संपूर्ण देशाला हादरवून सोडले होते. या काळजाचा थरकाप उडवणाऱ्या दुर्घटनेला आता एक आठवडा पूर्ण होत आहे, मात्र या अपघातात आपले प्राण गमावलेले कॅप्टन सुमित कपूर यांच्या मुलीचा शोक आजही अनावर आहे.
आपल्या लाडक्या वडिलांना गमावल्याचे दुःख पचवणे सान्या कपूर हिला कठीण जात आहे. सान्याने आपल्या सोशल मीडिया अकाऊंटवर वडिलांच्या आठवणीत एक अत्यंत भावुक नोट लिहिली आहे, जी वाचून कोणाचेही डोळे पाणावल्याशिवाय राहणार नाहीत.
एका वाईट स्वप्नासारखा भास
अजित पवार यांच्या लेयरजेट 45 विमानाची कमान सांभाळणारे पायलट सुमित कपूर यांची मुलगी सान्या हिने इन्स्टाग्रामवर आपल्या भावनांना वाट मोकळी करून दिली आहे.
तिने आपल्या पोस्टमध्ये लिहिले की, हे सर्व एखाद्या भीषण आणि वाईट स्वप्नासारखे वाटत आहे. सान्याला अद्यापही या सत्याचा स्वीकार करणे जड जात आहे की तिचे वडील आता या जगात नाहीत. हे स्वप्न लवकरच संपेल आणि आपण यातून जागे होऊ, अशी आशा तिने व्यक्त केली आहे. सुमित कपूर आपल्या मुलीला प्रेमाने झाशीची राणी म्हणून हाक मारत असत, त्या आठवणीने ती आता व्याकुळ झाली आहे.
( नक्की वाचा : Ajit Pawar: विमानाची ती सुरक्षा यंत्रणा आणि 28 दिवसांची डेडलाईन; अजित पवारांच्या अपघाताबाबत सर्वात मोठा खुलासा )
चमत्कार होईल आणि पप्पांचा फोन येईल
सान्याने आपल्या पोस्टमध्ये पुढे लिहिले आहे की, मला स्वतःलाही माहित नाही की मी हे सर्व का लिहित आहे, पण मनाच्या कोपऱ्यात कुठेतरी एक आशा आहे की एखादा चमत्कार व्हावा आणि तुम्ही हे सर्व वाचावे.
मी आजही या प्रतीक्षेत आहे की तुमचा फोन येईल आणि तुम्ही मला नेहमीप्रमाणे विचाराल की, माझी झाशीची राणी कुठे आहे? वडिलांच्या आवाजातील ते शब्द ऐकण्यासाठी सान्याचे कान आसुसले आहेत. हा अपघात इतका अचानक झाला की कुटुंबातील कोणालाही या धक्क्यातून सावरता आलेले नाही.
( नक्की वाचा : Ajit Pawar Plane Crash : अजित पवारांच्या विमानाचे सारथ्य करणाऱ्या कॅप्टन शांभवी पाठक होत्या तरी कोण? )
'आकाशावर राज्य करण्यासाठीच तुमचा जन्म झाला'
आपल्या वडिलांच्या कर्तृत्वाचा अभिमान व्यक्त करताना सान्या म्हणाली की, तुम्ही आकाशावर राज्य करण्यासाठीच जन्माला आले होते. तुम्हाला विमान उडवणे प्रचंड आवडायचे आणि आपल्या आवडत्या कामातच तुम्ही अखेरचा श्वास घेतलात.
तुम्ही केवळ एक उत्कृष्ट पायलटच नव्हता, तर जगातील सर्वात चांगले वडील आणि एक अतिशय प्रेमळ व्यक्ती होतात. तुम्ही आम्हाला खूप लवकर सोडून गेलात, अशी खंतही तिने व्यक्त केली आहे. सान्या सांगते की, ती आयुष्यभर पप्पांची परी म्हणूनच राहील.
पाच जणांचा झाला होता मृत्यू
बारामती येथील या दुर्दैवी विमान अपघातात ज्या 5 लोकांचा मृत्यू झाला, त्यामध्ये कॅप्टन सुमित कपूर यांचा समावेश होता. अपघाताच्या वेळी सुमित कपूर हेच विमान चालवत होते. या घटनेनंतर कपूर कुटुंबावर दुःखाचा डोंगर कोसळला आहे.
सान्याची ही पोस्ट सध्या सोशल मीडियावर मोठ्या प्रमाणावर व्हायरल होत असून, अनेक जण या कुटुंबाप्रती आपली सहवेदना व्यक्त करत आहेत. वडिलांच्या जाण्याने निर्माण झालेली पोकळी कधीही भरून न निघणारी आहे, हेच तिच्या शब्दातून जाणवत आहे.
