Suvendu Adhikari Oath Ceremony : पश्चिम बंगालच्या राजकारणात आजचा दिवस (शनिवार, 9 मे 2026) ऐतिहासिक आहे. आजच्याच दिवशी बंगालमध्ये पहिलं भाजपा सरकार सत्तेत आलं. सुवेंदू अधिकारी हे बंगालचे पहिले भाजपा मुख्यमंत्री झाले. अधिकारी सरकारच्या शपथविधी कार्यक्रमाला पंतप्रधान नरेंद्र मोदी उपस्थित होते. मोदी यांनी यावेळी एका 97 वर्षांच्या ज्येष्ठ भाजपा कार्यकर्त्यांचे पाया पडून आशीर्वाद घेतले आणि त्यांना मिठी मारली.संपूर्ण देशासमोर पंतप्रधान ज्यांच्यासमोर नतमस्तक झाले ते नक्की कोण आहेत? हे जाणून घेण्याची उत्सुकता सर्वांना लागली आहे.
पंतप्रधानांनी ज्यांचा सन्मान केला ते नाव म्हणजे माखनलाल सरकार. पश्चिम बंगालमधील सिलिगुडीचे रहिवासी असलेले माखनलाल सरकार हे भारतीय जनता पक्षाच्या सुरुवातीच्या काळातील सर्वात ज्येष्ठ नेत्यांपैकी एक आहेत. केवळ राजकीय नेता म्हणूनच नव्हे, तर जनसंघाचे संस्थापक श्यामाप्रसाद मुखर्जी यांचे अत्यंत विश्वासू सहकारी म्हणून त्यांची ओळख होती. श्यामाप्रसाद मुखर्जी यांच्या काश्मीर दौऱ्यात माखनलाल सरकार त्यांच्यासोबत सावलीसारखे होते.
न्यायालयात गायले देशभक्तीपर गीत
माखनलाल सरकार यांच्या आयुष्यातील एक किस्सा आजही कार्यकर्त्यांमध्ये अभिमानाने सांगितला जातो. काँग्रेसच्या काळात एका देशभक्तीपर गीतासाठी त्यांना दिल्ली पोलिसांनी अटक केली होती. त्यानंतर त्यांना न्यायालयात हजर करण्यात आले, तेव्हा न्यायाधीशांनी त्यांना माफी मागण्यास सांगितले.
मात्र, आपण कोणताही गुन्हा केलेला नाही, फक्त गीत गायले आहे, असे ठामपणे सांगत त्यांनी माफी मागण्यास नकार दिला. इतकेच नाही तर न्यायाधीशांच्या विनंतीवरून त्यांनी ते गीत पुन्हा भर न्यायालयात गायले. त्यांचा तो बाणा पाहून न्यायाधीशांनी पोलिसांना त्यांना सन्मानाने आणि प्रथम श्रेणीचे तिकीट देऊन घरी सोडण्याचे आदेश दिले होते, तसेच प्रवासासाठी 100 रुपये दिले होते.
