जर तुम्ही या जुलै महिन्यात नवीन कार खरेदी करण्याचा विचार करत असाल, तर हा निर्णय थोडा थांबवणे तुमच्यासाठी फायदेशीर ठरू शकते. भारतीय ऑटोमोबाईल बाजारात या महिन्यात अनेक मोठ्या कार कंपन्या त्यांच्या बहुप्रतीक्षित एसयूव्ही (SUV), लोकप्रिय मॉडेल्सचे फेसलिफ्ट व्हर्जन आणि प्रीमियम हाइब्रिड-इलेक्ट्रिक कार्स लॉन्च करणार आहेत. नवीन फीचर्स, अपडेटेड डिझाइन आणि अत्याधुनिक तंत्रज्ञानाने सुसज्ज असलेल्या अशा 5 मोठ्या कार्सबद्दल सविस्तर जाणून घेऊया.
निसान टेक्टॉन (Nissan Tekton)
निसान कंपनी भारताच्या वेगाने वाढणाऱ्या मिडलसाईझ एसयूव्ही सेगमेंटमध्ये पहिल्यांदाच 'टेक्टॉन' या कारसह पदार्पण करत आहे. कंपनीसाठी हे मॉडेल अत्यंत महत्त्वाचे मानले जात आहे. यामध्ये 1.3-लीटर टर्बो पेट्रोल इंजिन मिळण्याची शक्यता असून, मॅन्युअल आणि ऑटोमॅटिक दोन्ही ट्रान्समिशनचे पर्याय असतील. बाजारामध्ये या कारची थेट टक्कर ह्युंडाई क्रेटा, किया सेल्टोस, मारुती सुझुकी ग्रँड विटारा, टोयोटा अर्बन क्रूझर हायरायडर, होंडा एलिव्हेट, रेनॉल्ट डस्टर आणि टाटा सिएरा यांसारख्या प्रस्थापित कार्सशी होईल.
मारुती सुझुकी ब्रेझा फेसलिफ्ट (Maruti Suzuki Brezza Facelift)
भारतातील सर्वात पसंतीची कॉम्पॅक एसयूव्ही असलेल्या ब्रेझाचे नवीन फेसलिफ्ट मॉडेल या महिन्यात लॉन्च होऊ शकते. नवीन ब्रेझामध्ये बाह्य आणि अंतर्गत रचनेत अनेक कॉस्मेटिक बदल पाहायला मिळतील. यात 1.0-लीटर टर्बो पेट्रोल आणि 1.5-लीटर नॅचरली एस्पिरेटेड पेट्रोल इंजिनचा पर्याय मिळू शकतो. नवीन मॉडेलमध्ये अंडरबॉडी सीएनजी (CNG) टँक मिळण्याची शक्यता आहे, ज्यामुळे गाडीचा बूट स्पेस (डिग्गी) आधीपेक्षा जास्त मोकळा आणि उपयोगी होईल. टाटा नेक्सॉन, किया सोनेट, महिंद्रा एक्सयूव्ही ३एक्सओ, ह्युंडाई व्हेन्यू आणि स्कोडा कायलाक यांच्याशी ही कार स्पर्धा करेल.
होंडा झेडआर-व्ही हायब्रिड (Honda ZR-V Hybrid)
होंडा कंपनी आपली प्रीमियम एसयूव्ही 'ZR-V Hybrid' भारतात थेट पूर्णपणे तयार युनिट म्हणून आयात करून लॉन्च करणार आहे. ही कार एलिव्हेट पेक्षा वरच्या श्रेणीत असेल. यामध्ये होंडाची 'e:HEV' स्ट्रॉन्ग हायब्रिड तंत्रज्ञान वापरण्यात आले असून, 2.0-लीटर हायब्रिड पेट्रोल इंजिन आणि e-CVT ऑटोमॅटिक ट्रान्समिशन दिले जाईल. 40 लाख रुपयांच्या बजेटमधील प्रीमियम ग्राहकांसाठी हा उत्तम पर्याय असेल. फोक्सवॅगन टिगुआन, फोक्सवॅगन टॅरॉन, स्कोडा कोडियाक आणि जीप मेरिटियन यांसारख्या गाड्यांना ही टक्कर देईल.
2026 टोयोटा हिलक्स (2026 Toyota Hilux)
टोयोटा आपले प्रसिद्ध आणि मजबूत पिकअप ट्रक 'हिलक्स'चे 2026 व्हर्जन या महिन्यात सादर करू शकते. यामध्ये 2.8 लीटर टर्बो डिझेल इंजिनसह 6-स्पीड मॅन्युअल आणि 6-स्पीड ऑटोमॅटिक गियरबॉक्स मिळेल. तसेच, ऑफ-रोडिंगसाठी 'फोर-व्हील ड्राईव्ह' (4WD) सिस्टीम देखील दिली जाईल. मजबूत आणि विश्वासार्ह पिकअप शोधणाऱ्यांसाठी हा एक सर्वोत्तम पर्याय ठरेल.
JSW-MG 3-Row SUV
जेएसडब्ल्यू एमजी मोटर इंडिया (JSW MG Motor India) या महिन्यात एक मोठी 3-Row) एसयूव्ही सादर करणार आहे, जी जागतिक बाजारातील 'Wuling Starlight 560' वर आधारित असेल. यामध्ये 7-सीटर केबिन, मोठी टचस्क्रीन आणि पॅनोरॅमिक सनरूफ यांसारखे प्रगत फीचर्स मिळतील. ही कार दोन पर्यायांमध्ये उपलब्ध असू शकते. पहिला 1.5-लीटर प्लग-इन हायब्रिड इंजिन (195 hp) जे 1000 किमीपेक्षा जास्त रेंज देईल. तर दुसरा 69.2 kWh बॅटरी असलेला ऑल-इलेक्ट्रिक (EV) व्हर्जन (201 hp), जो 530 किमीपर्यंतची रेंज देईल असा दावा केला जात आहे.
