US Iran War : येत्या काळात जागतिक राजकारणात मोठे बदल होण्याची शक्यता असून, विशेषतः इराण आणि अमेरिका यांच्यातील तणाव आता टोकाला पोहोचला आहे. अमेरिकेचे राष्ट्राध्यक्ष डोनाल्ड ट्रम्प यांनी आपल्या मुलाच्या लग्नाला जाणे रद्द करून वॉशिंग्टनमध्ये राहण्याचा निर्णय घेतल्याने युद्धाच्या चर्चांना उधाण आले आहे. याच पार्श्वभूमीवर, भारत दौऱ्यावर असलेले अमेरिकेचे परराष्ट्र मंत्री मार्को रूबियो यांनी अत्यंत सूचक आणि महत्त्वाचे वक्तव्य केले आहे.
मुलाचे लग्न सोडून ट्रम्प वॉशिंग्टनमध्येच!
वॉशिंग्टनमध्ये शुक्रवारी राष्ट्राध्यक्ष ट्रम्प यांनी आपल्या उच्चस्तरीय सुरक्षा आणि लष्करी अधिकाऱ्यांसोबत एक महत्त्वाची बैठक घेतली. या बैठकीला संरक्षण मंत्री, सीआयए प्रमुख आणि राष्ट्रीय सुरक्षा टीमचे दिग्गज अधिकारी उपस्थित होते. या बैठकीत इराणविरोधातील संभाव्य लष्करी पर्याय आणि रणनीतीवर सविस्तर चर्चा झाल्याचे वृत्त आहे. ट्रंप यांनी स्वतः सोशल मीडियावर पोस्ट करत स्पष्ट केले की, मुलाच्या लग्नात जाण्यापेक्षा सध्या देशासाठी वॉशिंग्टनमध्ये राहणे जास्त गरजेचे आहे. व्हाईट हाऊसनेही त्यांचा न्यू जर्सीचा दौरा अचानक रद्द केला, ज्यामुळे इराणविरुद्धच्या कारवाईची शक्यता अधिक बळकट झाली आहे.
( नक्की वाचा : भारताचा सातवा दरवाजा ते मेक्सिकोचे पाताल लोक; या 7 जागा उघडण्याचं धाडस कोणतंही सरकार का करत नाही? )
चर्चा फिस्कटली तर हल्ला?
एनडीटीवीने जेव्हा मार्को रूबियो यांना इराणवरील संभाव्य हल्ल्याबाबत विचारले, तेव्हा त्यांनी थेट 'नाही' असे म्हटले नाही. रूबियो म्हणाले की, सध्यातरी वाटाघाटी सुरू आहेत, पण अमेरिका इराणला कधीही अण्वस्त्र बनवू देणार नाही. इराणने होर्मुज समुद्रधुनीमध्ये व्यापारी जहाजांवर जे हल्ले सुरू केले आहेत, ते बेकायदेशीर असून ते रोखावेच लागतील. जर मुत्सद्देगिरीने हा प्रश्न सुटला नाही, तर अमेरिका 'दुसऱ्या मार्गाचा' वापर करण्यास मागे-पुढे पाहणार नाही, असे संकेत त्यांनी दिले आहेत.
लष्करी तयारी आणि होर्मुजचा वाद
अमेरिकेने केवळ चर्चेवर भर न देता प्रत्यक्षात लष्करी हालचालीही वाढवल्या आहेत. कॅरेबियन क्षेत्रात अमेरिकेचे एअरक्राफ्ट कॅरिअर आणि युद्धनौका तैनात करण्यात आल्याच्या बातम्या आहेत. इराणकडून होणाऱ्या युरेनियम संवर्धनामुळे आणि होर्मुज समुद्रधुनीतील धमक्यांमुळे अमेरिका आक्रमक झाली आहे. रूबियो यांनी स्पष्ट केले की, इराणचा हा प्रश्न कायमचा सोडवावा लागेल आणि त्यासाठी वेळप्रसंगी लष्करी बळाचा वापरही केला जाऊ शकतो.
( नक्की वाचा : Elon Musk: एलॉन मस्क यांच्यावर चीनची करडी नजर? मेजवानीत वेट्रेस बनून वावरत होती चिनी जनरल! वाचा संपूर्ण प्रकरण )
काय आहे वादाचे मुख्य कारण?
या संघर्षाच्या मुळाशी दोन मुख्य गोष्टी आहेत: पहिली म्हणजे इराणचा अण्वस्त्र कार्यक्रम आणि दुसरी म्हणजे होर्मुज समुद्रधुनीतील व्यापारी मार्गावर इराणने निर्माण केलेले धोके. जगभरातील तेलाच्या वाहतुकीसाठी होर्मुज हा मार्ग अत्यंत महत्त्वाचा आहे. तिथे इराणकडून होणारे अडथळे जागतिक अर्थव्यवस्थेसाठी घातक ठरू शकतात. त्यामुळेच, जर इराणने चर्चेतून मार्ग काढला नाही, तर येत्या काही दिवसांत आखाती देशांमध्ये युद्धाचे ढग दाटण्याची शक्यता वर्तवली जात आहे.
