संजय तिवारी, नागपूर
HSRP Number Plate News : महाराष्ट्र परिवहन विभागाने वाहनांवर हाय सिक्युरिटी नंबर प्लेट बसवण्याची अंतिम मुदत तिसऱ्यांदा वाढवली आहे. एप्रिल 2019 पूर्वी विकल्या गेलेल्या वाहनांसाठी हाय सिक्युरिटी रजिस्ट्रेशन प्लेट्स (HSRP) अनिवार्य करण्यात आल्या आहेत. परिवहन विभागाने अंतिम तारीख 31 मार्च, त्यानंतर ती 30 एप्रिलपर्यंत वाढवण्यात आली होती. त्यानंतर आता पुन्हा एकदा 30 जून 2025 पर्यंत मुदतवाढ देण्यात आली आहे. एका अधिकृत पत्रानुसार, अपेक्षेपेक्षा कमी वाहनांमध्ये HSRP बसवल्यामुळे परिवहन विभागाने तिसऱ्यांदा अंतिम मुदत वाढवण्याचा निर्णय घेतला आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
HSRP नंबर प्लेट बसवण्यसाठी मुदतवाढ मिळाली असली तरी वाहनधारांचं टेन्शन वाढलं आहे. कारण हाय सिक्युरिटी रजिस्ट्रेशन प्लेट (HSRP) बसवण्याची मुदतवाढ येत्या 30 जूनपर्यंत असली तरी वाहनधारकांना जुलै महिन्याच्या अपॉईंटमेंट्स मिळत आहेत. त्यामुळे वाहनधारकांमध्ये संभ्रमाचे वातावरण आहे. कित्येक वाहन धारकांना 15 जुलै नंतरची अपाईंटमेंट मिळाल्याने वाहनधारक चिंतेत आहेत.
(नक्की वाचा- सावधान! HSRP नंबर प्लेटसाठी नोंदणी करायला जाल आणि डोक्याला हात मारुन घ्याल)
HSRP प्लेट लावून घेण्यासाठी ऑनलाईन नोंदणी केली जात आहे. त्याद्वारे अगदी जुलै महिन्याची अपाईंटमेंट मिळत आहे. राज्य परिवहन विभागाने तीन कंपन्यांना ही काम दिले आहेत. मात्र त्यांचे प्लेट बसवून देणारे फिटमेंट सेंटर्स संख्येने फार कमी आहेत, अशी तक्रार करण्यात येत आहे. काही ठिकाणी एचएसआरपी बसवून देण्यासाठी चक्क अर्धा दिवस लागत असल्याने वाहनधारक संताप व्यक्त करत आहेत.
(नक्की वाचा- Why HSRPs mandatory : हाय सिक्युरिटी नंबर प्लेट अनिवार्य का आहे? फायदे समजून घ्या)
HSRP नंबर प्लेट वापरण्याचे फायदे
HSRP नंबर प्लेट बदलायची असेल तर ती तोडण्याशिवाय पर्याय नसेल. त्यामुळे वाहन चोरीला जाणे कठीण आहे. कोडिंग सिस्टममुळे स्कॅनिंग केल्यानंतर लगेचच वाहनाशी संबंधित माहिती उपलब्ध होते. प्लेटवर लिहिलेल्या नोंदणी क्रमांकात कोणताही बदल करता येणार नाही. नंबर प्लेट हाय रिझोल्यूशन कॅमेऱ्यांच्या नजरेत लगेचच येते. क्यूआर कोडमधून डेटा वाचणे सोपे आहे. अपघात झाल्यास, वाहन मालकाची संपूर्ण माहिती क्यूआर कोडद्वारे काही सेकंदात उपलब्ध होते.
HSRP प्लेट्स स्टीलच्या बनवलेल्या असतात आणि त्यांच्यावर लेसर-प्रिंट केलेले क्रमांक असतात, ज्यामुळे त्यांची कॉपी करणे कठीण होते. एकदा लावल्यानंतर, कोणतेही नुकसान न होता ते काढणे कठीण आहे. ज्यामुळे गुन्हेगारांना नंबर प्लेट बदलण्याची संधी मिळणे कठीण होईल.
(नक्की वाचा- वाहनांना HSRP नंबर प्लेट कधीपर्यंत बसवता येणार? मुदतवाढीबाबत परिवहन आयुक्तांचं मोठं वक्तव्य)
अपाईंटमेंट कशी बुक कराल?
महाराष्ट्रातील रहिवाशांना हाय सिक्युरिटी नंबर प्लेटसाठी अपॉइंटमेंट बुक करण्यासाठी ऑनलाइन अर्ज करावा लागेल. परिवहन विभागाने राज्यातील सर्व आरटीओ तीन झोनमध्ये विभागले आहेत. तुमचे वाहन नोंदणीकृत योग्य आरटीओ निवडल्यानंतर, कृपया आवश्यक माहिती द्या आणि तुम्ही तुमच्या पसंतीच्या तारखेला आणि वेळी तुमच्या जवळच्या विक्रेत्याकडे अपॉइंटमेंट घेऊ शकता.
Track Latest News Live on Marathi.NDTV.com and get news updates from India and around the world
