HSRP Update: जुन्या वाहनांसाठी HSRP प्लेट लावण्यासाठी महाराष्ट्रासह 20 राज्यांमध्ये हे दर निश्चित 

HSRP Update: केंद्रीय मोटार वाहन नियम 1989च्या तरतुदीनुसार जुन्या वाहनांना उच्च सुरक्षा नंबर प्लेट (HSRP) बसवणे बंधनकारक आहे. या निर्णयाच्या अंमलबजावणीसाठी 1 एप्रिल 2019 पूर्वी नोंदणीकृत वाहनांना HSRP बसवण्याची योजना आखण्यात आली आहे. 2019 नंतर नोंदणीकृत सर्व नव्या वाहनांना निर्माता कंपन्यांकडूनच एचएसआरपी (HSRP News) बसवून देण्यात आल्या आहेत, अशी माहिती परिवहन मंत्री प्रताप सरनाईक (Pratap Sarnaik) यांनी विधान परिषदेत दिली. विधान परिषद सदस्य ॲड.अनिल परब, शशिकांत शिंदे यांनी जुन्या वाहनांना उच्च सुरक्षा नंबर प्लेटच्या दरासंदर्भात लक्षवेधी सूचना मांडली होती, त्यास मंत्री सरनाईक यांनी उत्तर दिले.  

('NDTV मराठी' चं अधिकृत व्हॉट्सअ‍ॅप चॅनल जॉईन करा )

मंत्री सरनाईक म्हणले की, आतापर्यंत 16 लाख 58 हजार 495 वाहनांनी एचएसआरपीसाठी नोंदणी केली असून त्यापैकी 3 लाख 73 हजार 999 वाहनांवर उच्च सुरक्षा नंबर प्लेट लावण्यात आल्या आहेत. निविदा प्रक्रियेत कार्यक्षमतेसाठी तीन विभाग तयार करण्यात आले असून वेगवेगळ्या क्लस्टरच्या माध्यमातून कामाचे नियोजन आखण्यात आले असल्याचेही त्यांनी सांगितले. शासनाने विविध राज्यांतील एचएसआरपी लावण्याच्या दरांबाबतही स्पष्टता यावेळी दिली आहे. महाराष्ट्र (Maharashtra) राज्यामधील दर इतर राज्यांच्या तुलनेत कमी आहेत, असे परिवहन मंत्री सरनाईक यांनी सांगितले. उच्च सुरक्षा नंबर प्लेटच्या दरांमध्ये विसंगती असल्याचे आरोप होत आहेत. तरी सर्व पुरावे तपासून घेऊन योग्य ती चौकशी केली जाईल. तथापि दरामध्ये बदल होणार नसल्याचेही परिवहन मंत्र्यांनी यावेळी सांगितले.

महाराष्ट्रामध्ये दुचाकी वाहनासाठी एचएसआरपी बसवण्यासाठी रुपये 450 हा दर निश्चित करण्यात आला असल्याचे सांगून परिवहन मंत्री यांनी एचएसआरपी संदर्भात अन्य राज्यातील दराची माहिती दिली. 

(नक्की वाचा: HSRP प्लेट्ससाठी 30 जूनपर्यंत मुदवाढ; वाहनधारकांचं टेन्शन कायम, काय आहे कारण?)

अन्य राज्यांमध्ये दुचाकी वाहनांना HSRP लावण्यासाठी किती दर आकारण्यात येत आहेत?

आंध्र प्रदेश - 451रुपये 
आसाम - 438 रुपये 
बिहार - 451 रुपये 
छत्तीसगड - 410 रुपये 
गोवा - 465 रुपये  
गुजरात - 468 रुपये  
हरियाणा - 468 रुपये  
हिमाचल प्रदेश - 451 रुपये 
कर्नाटक - 451 रुपये 
मध्य प्रदेश - 468 रुपये   
मेघालय - 465 रुपये 
दिल्ली - 451 रुपये  
ओडिशा - 506 रुपये 
सिक्कीम - 465 रुपये 
अंदमान निकोबार - 465 रुपये 
चंडीगड - 506 रुपये 
दिव आणि दमण -  465 रुपये
उत्तर प्रदेश - 451 रुपये 
पश्चिम बंगाल - 506  रुपये 

त्याचबरोबर थ्री व्हीलर आणि फोर व्हीलरसाठी वेगवेगळे दर असल्याचेही मंत्री सरनाईक यांनी सांगितले. 

(नक्की वाचा: Why HSRPs mandatory : हाय सिक्युरिटी नंबर प्लेट अनिवार्य का आहे? फायदे समजून घ्या)

एचएसआरपी लावण्याची मुदत 30 जून 2025 पर्यंत वाढवण्यात आली आहे. यामुळे वाहनचालकांना त्यांच्या वाहनांवर उच्च सुरक्षा नंबर प्लेट बसवण्यासाठी पुरेसा अवधी मिळणार असल्याचेही मंत्री सरनाईक यांनी सांगितले.
सरकारच्या या योजनेंतर्गत 2019च्या पूर्वी नोंदणीकृत सुमारे 1.75 कोटी वाहनांना एचएसआरपी बसवली जाणार आहे. नागरिकांनी या प्रक्रियेस सकारात्मक प्रतिसाद दिला असून लवकरच सर्व वाहनांना एचएसआरपी बसवण्याचे उद्दिष्ट पूर्ण करण्यात येईल, अशी खात्री परिवहन मंत्री सरनाईक यांनी यावेळी दिली.