Chhava Movie : छावा सिनेमाला 'मराठी क्रांती मोर्चा'चा विरोध; तर संभाजीराजे छत्रपती म्हणाले, "अजूनही वेळ गेली नाही" 

रेवती हिंगवे/विशाल पुजारी, NDTV मराठी

'छावा' सिनेमाचा ट्रेलर 22 जानेवारीला रिलीज झाला आहे. ट्रेलरचं प्रेक्षकांकडून भरभरुन कौतुक होत आहे. विकी कौशल, रश्मिका मंथानाच्या अभिनयाचीही वाहवा होत आहे. मात्र आता छावा चित्रपटाला विरोध केला जात आहे. समन्वयक मराठा क्रांती मोर्चा पुणे शहर यांनी चित्रपटाच्या प्रदर्शनाला विरोध केला आहे. तर माजी खासदार संभाजीराजे छत्रपती यांनी देखील चित्रपट प्रदर्शनाआधी इतिहासकारांना दाखवण्याची मागणी केली आहे. 

('NDTV मराठी' चं अधिकृत व्हॉट्सअ‍ॅप चॅनल जॉईन करा)

पुण्यात समन्वयक मराठा क्रांती मोर्चा पुणे शहर यांनी छावा चित्रपटात छत्रपती संभाजी महाराजांबाबत चुकीचे व खोटे प्रसंग दाखवल्याचा आरोप करत विरोधात आंदोलन पुकारलं आहे. चित्रपटामध्ये छत्रपती संभाजी महाराज व येसूबाई यांच्याबद्दल आक्षेपार्ह प्रसंग दाखवण्यात आल्याचंही संघटनेचं म्हणणं आहे.

"जगाच्या पाठीवर छत्रपती शिवाजी महाराज हे एकमेव राजे आहेत ज्यांच्या दरबारात स्त्री अथवा नर्तकी नाचली नाही. अशा राजांच्या राज्याभिषेक सोहळ्यात युवराज संभाजीराजे नाचताना दाखवले आहेत. तसेच महाराणी येसूबाई या देखील चित्रपटात नृत्य करताना दाखवले आहेत. या दोन्ही गोष्टी आक्षेपार्ह असून चित्रपटाच्या निर्मात्यांनी त्वरित हे दोन्ही प्रसंग चित्रपटातून वगळावे. अन्यथा मराठा समाज व शिवप्रेमी हा चित्रपट महाराष्ट्रात कुठेही प्रदर्शित होऊ देणार नाही", अशी भूमिका समन्वयक मराठा क्रांती मोर्चा पुणे शहर यांनी मांडली आहे. 

(नक्की वाचा-  Kapil Sharma: कॉमेडियन कपिल शर्मासह बॉलिवूडच्या या कलाकारांना धमकी, तक्रार दाखल - सूत्र)

संभाजीराजे छत्रपती यांनी याबाबत म्हटलं की, दिग्दर्शक लक्ष्मण उतेकर यांच्या टीमने भेटून मला या चित्रपटाबाबत माहिती दिली होती. मी त्यांना सांगितलं होतं की हा चित्रपट मला पूर्ण पाहायला द्या.  इतिहासकारांकडून याबाबतची माहिती घेऊन दुरुस्त्या सुचवू, असं मी सांगितलं होतं. मात्र त्यांच्याकडून कोणत्याही इतिहासकार मंडळींना बोलावलं गेलं नाही, जेणेकरून आपण त्याला ग्रीन सिग्नल देऊ शकतो.

(नक्की वाचा-  Ram Gopal Verma: चित्रपट निर्माता रामगोपाल वर्माला जेलमध्ये जावं लागणार, कारण काय?)

अजूनही वेळ गेलेली नाही- संभाजीराजे छत्रपती

आपण जर आता चित्रपटचा ट्रेलर पहिला तर यामध्ये लेझीम खेळत असल्याचे दाखवलं गेलं आहे. ही खरंतर आपली संस्कृती आहे, पण ती कशापद्धतीने दाखवली गेली आहे हे पाहणं गरजेचं आहे. मी अजून ते पाहिलं नाही. संभाजी महाराजांवर हिंदीत चित्रपट येतोय चांगली गोष्ट आहे. मात्र इतिहासकारांना त्यांनी बोलावून घ्यावं त्यानंतर या चित्रपटबाबत बोलता येईल.  महाराष्ट्रासह जगभरात हा चित्रपट पोहोचणं महत्वाचं आहे.  लक्ष्मण उतेकर यांनी पुन्हा एकदा आमच्याशी बोलावं अजूनही वेळ गेलेली नाही, असंही संभाजीराजे छत्रपती यांनी म्हटलं.